نامەیەكا سۆتی
فهیمە ئیبراهیم
نە یا ب هێزم وەكو خوە دیار دكەم، من هێزا پەلاتینكەكا بۆ حەزكرنا ئازادیێ خوە د ئاگری وەردكەت نینە، د ناڤبەرا دیوارێن زیندانا هزر و بیرێن خوە دا، نەشێم پێنگاڤەكێ بۆ ژ دەرڤە پاڤێژم. تۆكا بێزاریێ ستۆیێ من یێ گران كری. هەمی سپێدەهیان ب دەروونەكێ گرانتر چاڤێن خوە ڤەدكەم.
من وەسا هزر دكر كو، بێدەنگی ب زەحمەترین قۆناغە مرۆڤ تێدا دەرباز دبت. هەر تشت مرۆڤی دئێشینت و هەر بێدەنگ دمینت، ژ بەر كو باش دهێتە زانین ئاخفتن چ گوهۆڕینان پەیدا ناكەت.
هەستپێدكەم ل سەر دەروونێ خوە یا بوویمە بارگرانی. ئەو ژی ئێدی خوە ل بەر گازندە و گلەیێن من ناگرت، جار لاواز دبت و دكەڤیتە ناڤ نڤینان. ژئالیێ دەروونی ڤە هندا تێكچوویم، ڤێ جارێ ڕابوونا ل سەر پێیان پێدڤی ب دەمەكی درێژە. ئەرێ، پێدڤێ ب گەلەك دەمی مە دا دوبارە ب ڤەگەڕم. ڤێ جارێ برین كوورترە، یا گەهشتیە نیڤا دلی، یا گەهشتیە وی جهێ وی مەرەم پێ هەی.
د دۆلابا كەل و پەلێن خوە دا گەڕیا، پێنۆسەك و دەفتەرەك دیتن، وێ دڤیا چەند پەیڤەكا مینا نامەیەكێ ب دارێژتە سەر وان لاپەرێن سپی، هندەك ژ كەربا دلێ خوە بۆ كەسەكێ د هەبوونێ دا نەی دەربێخت. كەسەكی ئێدی هەبوونا وی چ گرنگی ل نك نەمایی، چەند حەزكرن هەبوو ژ پێش نڤێسینێ ڤە ل هەمبەری وی ڤان پەیڤان ببێژت.
لاپەڕێ ئێكێ ڤەكر و پێنۆس هلگرت. بۆ خوە گۆت: گەلەك یا ماندی مە، من دڤیا هەموو ئازار و دەرد و كولێن خوە دارێژمە بەر سینگی، من دڤیا ب چاڤێن خوە كووراتیا برینێن وی ل ڤی دلی كرین ببینت. شكەستنا هەستێن من، بێئومێدیا من، دا بزانت ئێدی من شیان نینن خوە ل بەر چ تشتان بگرم. بنڤیسم یان نە نڤیسم، نزانم ئەڤ نامەیە دێ گوهۆڕینان پەیدا كەت؟! شوونوارێن هندەك برینان ساخ نابن و شەڤ ب چراكێن كز، قولاچكێن زۆلۆمات ڕۆهن ناكەن.
خۆشیێ یا ژ وارێ من باركری، خەم و خیالان مالا خوە لێ دانایە. رێ ل بەر من دبەرزەنە. ب چ سەمتا ناكەڤم، دەمێ پێنگاڤان ب كۆرەیی ڤە دهاڤێژم، دترسم ب هلنگڤم و كەس نەبت دەستێ من بگرت. دەنگێن ب ترس گوهێن من هێردكەن، من وێرەكی نینە چاڤێن خوە ڤەكەم، لێ گوهێن من ناهێنە گرتن. هندی دەستێ خوە پێڤە د شدینم، هەر دەنگێ ترسێ د ناڤ تبلێن من دا، د ناڤ مێشكێ من دا دبتە ئەهریمەن.
ئەڤ شەڤا تاری یا وەكو دەروونێ من، چ رۆژ بۆ نینن هندەك ڕۆناهیێ بەردەتە سەر، دا هندەك ژ ترسا من ب ڤەرەڤینت. نێ ژ تاریێ دترسم. لێ ئەڤرۆكە ژ نەچاری یا د ناڤ دا دژیم. چەند من دڤیا بێژمە وی ئەڤرۆ ژ هەر ڕۆژەكێ پتر پێدڤی ب گەرماتیا دەستێن تە مە، ب ئێك نێرین ژ وان چاڤان، مینا هەر جار دا ترسا من ڕەڤیت. لێ كەس قەدەرا خوە نزانت. مینا هەیڤا ب تنێ د ناڤ كۆما ستێران دا جار دیار و جار بەرزە دبم.
ب دانپێدانەكا درەنگ، گەلەك درەنگ من زانی هەر تشت مینا جاران نا زڤڕت، بەلكو گەلەك تشت ب ئێكجارێ دوبارە نازڤڕن، تشت مینا شكەستنا شیشێ نە، دوبارە خوەلێكدانەڤە نینە. هەكەر جارەكێ زڤڕی ژی، مینا بەرێ نابت و شووندەوسێن خەمان ب گلواز دێ دیار بن.
وی ب گۆتنەكێ بەرسڤا من دا، گۆت ئەها ئەڤە ئەز زڤڕیم مینا بەرێ دێ بمە مۆمەك و رێیا تە ڕۆهن كەم. ب تنێ ڤێ جارێ ژی دەرفەتەكێ بدە من. باش دزانم ئاخفتن و سۆزێن وی، نڤیسینێن ل سەر بەفرێ بوون، ب ساناهی ل ژێر تیڕۆژكێن ڕۆژێ دحەلیێن.
ڕاستە من حەزا فڕینێ یا هەی، لێ نوكە د ڤالاهیێ دا یا مەلەڤانیا دكەم. ب چاڤێن خوە دبینم ب تنێ دووكێل و تەمەدیمان د رێیا من دا دهێتە دیتن. دەمێ من هەموو كاودان پێخەمەت وی پشتگوه هاڤێتین، ئەز كرمە لەیستۆكەك و یاری ب من كرن. لێ ڤێ جارێ باوەر ژ وی ناكەم، ژ بەر كو ڤێ نامەیێ پشتی ب داوی دهینم، دێ ب ئاگرێ ڤێ مۆما ل هەمبەر من د لەیزت سۆژم، نە نامەیا من د گەهیتێ و نە ئەو وێ نامێ دخوینت.
ریمشاید- ئەلمانیا
2025
