نامەیەکا پڕ ژ هەستێن ئەنفالکری
دلدار محەمەد
1
ئۆمێد
وەکی وێ دایکا سەرانسەری کۆمەکا سالان و هەمی سپێدەیان چاڤەرێیی ڤەگەڕیانا کوڕێ خۆ یێ ئەنفالکری دکەت، بۆ هەلاتنا رۆژێ لسەر ڤێ ئاخێ ب ئۆمێدم.
2
مرنا ب گڕنژین
ئەو زارۆیێ هە، یێ ل ناڤ سرایا بن ئاخکرنا خۆ دگڕنژیت، مە فێردکەت بۆ بەردەوامیا ژیانێ؛ یاریا ب خەمێن خۆ بکەین.
3
هەڤالا رۆندکا
پێنج وێنە دناڤ دەستێن وێ یێن قورمچی دا ڤەدلەرزین، کەلەگریێ گەوریا وێ گرت :
کی دبێژیت هەڤالێن سەردەمی دبێ وەفانە ، سیهـ و پێنج سالە رۆندک هەڤالێن ب وەفا یێن چاڤێن منن.
4
گۆڕ
سەرێ خۆ بۆ ئەسمانی بلندکر، قێریێن وێ ب سەر وی تاخی دا چوون. من زانی دڤیا نامەیەکێ بگەهینیتە کوڕێ خۆ یێ ئێکانە:
کۆڕێ من، بۆ بێ گۆڕیا خۆ ب خەم نەکەڤە، ئاسایی یە سیهـ و پێنج سالە ئەز ژی یا بێ گۆڕم.
5
لێگەڕیان
بۆ سەرەدانا بابێ خۆ، هەر سال دەستکەکێ گولان دکڕیت، ئەڤ سالە ژی دەستکێ گولێن وێ د دەستێن وی دا ژ دێمێ وێ قورمچی تر لێهاتن، هەمی گۆڕستان تێکڤەدان؛ چ کێلیا ناڤێ بابێ وێ لسەر نەبوو.
6
رەنگێ زێمارێ
هەکو ئەز زارۆک، ئەو پیرە ژنا جیرانا مە د گۆتە هەمی رەنگا رەش، من هزردکر پیریێ رەنگ یێ ژ بیرێ برین، لڤێ دوماهیێ من زانی کوڕێ وێ یێ هاتیە ئەنفالکرن.
