نان ب تاما خوینێ
ئارین عیسا عەبدلرحمان
دەمژمێر ببوو ١٢ی شەڤ، تاریاتییێ هەمی کونجێن مالا مە نخاڤتبوون، ڕۆژا مە بۆری بوو و بێی کو پارییەک د گەورییا مەدا بچتە خوار، دەنگێ لەرزینا سەڕمایا خویشک و برایێن من وەکی دوژمنەکێ ترسنۆک مێشکێ من دخوار. چرکە و خۆلەک و دەمژمێر بۆرین لێ ئەو دیار نەبوو، من دەستێن خوە یێن زڤر و لەرزۆک ب سەرێ خویشک و برایێن خوەدا ئینا، لێ دەنگێ گری یا ئەوان ب سەر برسا مە کەڤتبوو، من نەدزانی هزر د چ دا بکم، ئەز زارۆکەکێ ١٠ سالی، شیانێن من ژ تێگەهشتنێ ژی دەربازنابن.
ژیانێ خواست بوو ئەم هەر ژ زارۆکینییێ پیر ببین و داڤێن پرچا مە سپی ببن؛ چونکی بابێ من قەستا ڕێکەکێ کربوو، ب ناڤێ بەرخوەدان، لێ پشتی زڤڕی ناڤێ وی هاتە گوهۆڕین بۆ شەهید، ئێکانە تشتێ ژ ئەوی مای وێنەیێ ئەوی بوو، سیبەرا ئەوی ئەم ژ ترسێ دپاراستین، دەیکا من ژی پشتی چوونا ئەوی مینا شەمالکەکێ ڕۆژ بۆ ڕۆژێ د حەلیا هەتا ب ئێکجاری ڕۆناهییا ئەوێ د ناڤ مەدا ڤەمری. دەر و جیرانان بەردەوام دگۆت شەهید «ئەحمەد»، لێ بەردەوام من د ڕوویێ ئەواندا دگۆت: ناڤێ بابێ من نە گوهۆڕن، ناڤێ ئەوی نە شەهیدە، ئەو ئەحمەدە و هەر ب ناڤێ ئەحمەد د دلێ مندا دژیت.
د ئەوێ بێدەنگییا تەحلدا کەسەکی بهێز دەرگەهـ قوتا، من هزرکر داپیرا منە و تژی کۆشا ئەوێ نانە، دا برسا مە نەهێلیت و مە ب باوەشا خوە گەرم بکت. پشتی من دەرگەهـ ڤەکری، من دیت داپیر یا ل سەر چۆکان و نان یێ ل بەر سینگی، لێ ب سۆری یێ هاتییە ڕەنگکرن، دەست و پێ یێن من لەرزین، دەستێ خوە درێژکر و گۆت:
– شەڕڤان، شێرێ داپیرێ، ها بگرە، ئەڤە نانێ کەرامەتێ یە، من گیانێ خوە گۆری کر، دا ڕوحا وە تێربکم، هشیاربی نانێ سەرشوڕییێ نەخۆی و ڕازی نەبە نەحەز بهێنە د ناڤ ئاخا وەدا و هوین برسی بمینن و ژبیرنەکە پشتی دەیکا تە، من دەیکینی بۆ تە کر و نوکە بزانە کوردستانا چار پارچە چار دەیکن بۆ تە.
د دەستەکیدا گیانێ سارێ داپیرێ و د دەستەکێ دیدا نانەک ب تاما خوینێ، بۆ ئالییێ خویشک و برایێن خوە زڤڕیم و دویماهیک ڕۆندک ل سەر دێمێ من پەشی، چوومە د هەمبێزا خویشک و برایێن خوەدا، من بەرێ خوەدا چیایان، ئەو چیایێن بابێ من بۆ من بەحس لێ دکر کو تاکە هەڤالن، من چاڤێن خوە گرتن دا بچمە د ڕاستییەکێدا، چیا و شکەفت هاتنە بەرچاڤێن من، ئەو چیایێن بووینە گۆڕستانا پیرۆزا شەهید ئەحمەدی و هزارێن وەکی ئەوی. ئەوی نانی برسا من نە شکاند لێ ترسا من شکاند و من زانی دەم هات بەرەڤ ڕێکا بابێ خوە بچم یا ب ناڤێ بەرخوەدان، خوە ئەگەر چارەنڤیسێ من ئەوبیت بگەهمە ئەوی ئەحمەدی ژی یێ دگۆتنێ شەهید.
