نان
عەبدولڕەحمان بامەرنی
برایێ من یێ بچویك دكرە گری. خویشكا من یا بچویك دكرە گری. برایێ من یێ دی ژی دكرە گری و بابێ من ب ژوور كەفت و برایێ من دا بەر پێھنا و پرچا خویشكا من راكێشا و برایێ من یێ دی خوە ل دەرگەھی دا و تەقیا.
مە ھەمیان نان دڤیا، خوە دەیكا من ژی ل ھیڤیا بابێ من بوو نان ددەستاندا بیت و كەسێ ژمە چ نان ڤێ نەدیت. خویشكا من ب چاڤێن گریڤە گۆت بۆ من نانی و برایێ من یێ ب بەرپێھنا بابێ من كەفتی دا رابیتە ژپێرڤە و ھێشتا پشتا وی راست نەبووی، بابێ من گەھشتێ و پێھنەكا دی و پێھنەكا دی و بابێ من گۆتێ روینە خوارێ ھەی كوڕێ.. و مە ھەمیان گوھێن خوە گرتن و بابێ من گۆت: ئەگەر پرتەكا نانی ژی ھەبا، دا بۆ برایێ وە یێ ل سەر قوونێ ئینم و دەستێ خوە درێژكرە من و گۆتە ھەمیان ھوین ژی …… بزوقنن و ل كوژییەكێ روونشتە خوارێ و سەرێ خوە كرە دناڤ لنگێن خوەرا و ئەم ھەمی بێدەنگ بووین، ب تنێ دایكا من نە بیت.
لێڤەگەرا و گۆت: ئەز تە ب رەش كەم زەلامۆ، ما تە چ ھەیە پێ ب زوقنین و ھەر باش بوو كەسێ ژبلی من ئەڤ ب رەشكرنە ژ دەڤێ دایكا من گولێ نەبووی.
د رێكێ دا دەما ئەم ب پیا بەرەڤ سنووری درەڤین، رێك سەرئەڤرازی بوو، ئەسمانی دەرێ خوە ڤەكربوو و ھەر چ د مەشكا ئەوراندا ھەیی، ب سەرێ مەدا دباری.
جلكێن د بەرمەدا، داڤا زوھا تێ نەمابوو. پێلاڤێن مە خوە ل سەر پێن مە نە دگرتن و ھەر چەند پێنگاڤان، دڤیابا تە كتەكا پێلاڤا خوە ژ تەقنێ دەرئێخستبا و مە پیرەمێرەك دیت دناڤ تەقنێ دا روینشتبوو و كەسەك نەبوو دەستێ وی بگریت. مە ژنەك دیت، پشتییەك ل پشتێ بوو و زارۆكەك ل ملێ وێ بوو و كەس نەبوو پشتییێ وێ ژێ ھەلگریت. مە زەلامەك دیت.
پیرەمێرەكێ ل پشتێ بوو و ھەر چەند پێنگاڤا دچوو و پالا خوە ددا بەرەكی و ل وێڤەترەكێ، ھندەك زەلامان كەلەكەكا بەران دروستدكر و ل تەنشت وان بەتەنیەك ل سەر كەلەخەكی بوو و من گۆتە بابێ خوە دایكا من یا دكوخیت، ما دێ مریت؟ بابێ من دەنگ ژخوە نەئینا و من گۆتە بابێ خوە برایێ من یێ دكوخیت، ما دێ ئەو ژی مریت؟ بابێ من دەنگ ژخوە نەئینا و ھندەكان ل بەر رەخێ رێكێ ئاگرەك ھلكربوو و مریشەكەكا ستۆ ناڤ ملكری ددەستێن زەلامەكی دا بوو و ھاڤێتە ناڤ ئاگری.
زەلامەكێ دی لێ قیراند و گۆتێ: ھەی مالمیرات، ھەچكۆ دا پەرێن وێ ڤەرەچكینی و زارۆكەكێ ژنوی ب سەر پێیان كەفتی ل مریشكا خوە دكرە گری و زەلامێ ژ ھەمیان مەزنتر، پێ مریشكێ گرت و ژناڤ ئاگری دەرئێخست و ھندی خودێ قوەت دایێ، ڤڕڤڕاند و گۆتێ ددفنێن وەدا بھێت، ما دێ ھۆسا زكێ خوە تێركەن. چاڤێ من لێ بوو و كەس ددویڤ مریشكێ را نەچوو.
من خوە ژ بابێ خوە و ژ خێزانا خوە ڤەھێلا و ئەز گەھشتمە مریشكێ. من مریشك ھەلگرت و من خوە ژ بەرچاڤێن ھەمیان ڤەشارت، دگەل رێزكا مرۆڤان كو ھندی چاڤێن مرۆڤی قەترە دكەن، زەلام و پیرۆ و ژن و زارۆك بوون و ھەمی سەرئەڤراز دچوون و رێكا چیایی دگرتنە بەر، دگۆتن ئەم دێ سەركەڤینە سەر زێری و بۆ كەسێ خەم نەبوو كا زێر ل وێرێ ھەنە یان ناڤێ گوندەكی و ناڤێ ئاڤاھییەكێ و ناڤێ جھەكێ دەستنیشانكرییە! لێ خەما ھەمیان خوە بگەھیننە سەر سنوورێ وەلاتێ توركیا، ژ فرۆكەیان و عەسكەرێ سەدامی قورتال ببن. ل دویڤ ئەوان گۆتگۆتكێن ھێزا سەركەفتنێ ل ڤی ئەڤرازی ب خەلكی دبەخشی و ھەست ب ترسێ و برسێ نەكەن و بەرەوامییێ بدەنە شەقاندنا رێكێ، عەسكەرێ سەدامی بوو و ھۆڤاتییا وی بەری ناڤێ وی دچوو و ئەز یێ ژدویرڤە بەرێ خوە ددەمە دایك و بابێن خوە و ئەز دناڤ رێزكا مرۆڤاندا ناچم، لێ ئەز وان ژی بەرزە ناكەم و یا من دیتی نزانم سە بوو، گورك بوو، رویڤی بوو، تویری بوو .. خوە ل مریشكا من ددا و ژمن كێش و ژوی كێش، مریشك ژناڤ دەستێن من دەركەفت. ئەز پشت و پشت ب سەرخوەدا چووم و من ھەست ب پێ خوە نەما، پێ من شكەست، پێ من خەلییا، پێ من وەرگەرییا و ئەز نەشیایم بكێشمە بەر خوە و رێزكا مرۆڤان یا دچیت، خالێ من ل بەر چاڤێن مە دكوخی و مر و مە درێكێدا ھێلا، پیرەژن و پیرەمێر درێكێدا بوون و كەسێ خوە لێ نەدكرە خودان و دا ئەز ژی ب دەردێ وان نەچم، ژ قیژیێن من، دایكا من ل دۆر خوە زڤڕی و دەنگێ من ناسكر، خویشك و برایێن من ل دۆر خوە زڤرین و دەنگێ من ناسكرن و بابێ من پشتییێ خوە ھاڤێت و چار پێنگاڤ كرنە ئێك و ئەز راكرمە بەرسینگا خوە و دا ل من حەیتینیت، لێ سەروبەرێ من دیت، ئەز نەشێم رابمەڤە و ئەز ھەلگرتم و كەسێ تاقەتا گازندێ و پرسیاركرنێ ڤێ نەبوو. پشتییێ بابێ من بوومە ئەز و پشتییێ خوە ل پشت كەڤرەكی ڤەشارتی ھێلا و ئەڤە رۆژا دوویێ یە ئەم ل بن ڤی نایلۆنێ مە ب سەر ڤی كەڤری دادایی.
بابێ من ل دەوسا رێكێ دزڤڕیت و پشتییێ خوە نابینیت و ئەم ژی دبرسی. ئەگەر بابێ من زانیبا پێ من نە خەلیایە و نە ژی وەرگەڕیایە و نە ژی شكەستییە، ب تنێ دا ئەو من ل نیڤا رێ نەھێلن! ئها دا نۆكە مە نان ھەبیت و كەسێ دەنگێ خوە ل كەسێ بلند نەدكر، كەس ژ مە ب بەر پێھنێن بابێ من نەدكەفت و دایكا من ژی نە دگۆتە بابێ من ئەز تە ب رەش كەم و ھێشتا كەسێ ژمە دەنگ ژخوە نەئینایی، بابێ من ژ جھێ خوە رانەبووی، برایێ من ئەڤێ بابێ من دایە بەر پێھنا و ژمالێ تەقیای ب ژوور كەفت و سەوكەكا نانێ تەنویرێ یا ددەستیدا! مە ھەمیان دزانی كەسێ ئەو سەوكا نانی ب خێرا خوە نەدایێ و مە ھەمیان گۆمان ژێ برن، كو وی ئەو سەوك یا ژ جھەكی دزی و ھندەكێن دی یێن ھێلاینە برسی، لێ كەس ژ مە ل سەر وی گوھی نە نڤست و دایكا من خوە دێ بێژی میزانە، ھەر ئێك ژمە پرتەكا نانی كرە ددەستی دا.
