ناڤه‌رۆكا كه‌ڤالێن من ل سه‌ر شەڕی و حه‌زژێكرنێ و كۆچبه‌ریێ و ژیانا كوردانه ل رۆژئاڤایێ كوردستانێ
زنار تۆڤی:
شێوه‌كار خدر عه‌بدولكه‌ریم، خه‌لكێ باژێرێ عامۆدێ یه ل رۆژئاڤایێ كوردستانێ و نوكه ل وه‌لاتێ ئه‌لمانیا دژیت، د دیداره‌كێ دا بۆ رۆژناما ئه‌ڤرۆ دیار كر: ئه‌ز ل باژێرێ حه‌سه‌كێ مه‌زن بوویمه و من خواندنا خۆ ل وی باژێری ب دووماهی ئینایه، ل سالا 1967 ئه‌ز ژ دایك بوویمه، من دخواست ئه‌ز پشكا شێوه‌كاری بخوینم، به‌لێ ژبه‌ر بابه‌تێ سیاسی ئه‌ز ژ لایێ رژێما سووریێ ڤه هاتمه گرتن، ئه‌ز حه‌فت سالان، ژ سالا 1987 ێ هه‌تا سالا 1993 ێ مامه د زیندانێ ڤه، ده‌مێ ئه‌ز د ناڤا زیندانێ دا، من ده‌ست ب كارێ شێوه‌كاری دكر، ب ڤی ره‌نگی ئه‌ز فێری چێكرنا وێنه‌یان بووم، هه‌تا نوكه ژی ئه‌ز ل سه‌ر كارێ خوه یێ به‌رده‌وامم.
ناڤهاتی گۆت ژی: هه‌تا نوكه من چه‌ندین پێشانگه‌هێن شێوه‌كاری ڤه‌كرینه، هه‌روه‌سا ده‌مێ ئه‌ز ل رۆژئاڤایێ كوردستانێ من پێنج پێشانگه‌هێن شێوه‌كاری یێن تایبه‌ت ڤه‌كرینه، د هه‌مان ده‌مدا من پشكداری ژی د چه‌ندین پێشانگه‌هێن دیتر یێن شێوه‌كاری دا كرینه ل چه‌ندین باژێرێن سووریێ و رۆژئاڤایێ كوردستانێ ژی، نوكه ئه‌ز ل باژێرێ پۆتستان ل وه‌لاتێ ئه‌لمانیا دژیم، ئه‌ڤه 10 سالن ئه‌ز ل وه‌لاتێ ئه‌لمانیا دژیم، هه‌تا نوكه من شه‌ش پێشانگه‌هێن شێوه‌كاری یێن تایبه‌ت ڤه‌كرینه، دیسان من پشكداری ژی د چه‌ندین پێشانگه‌هێن دیتر یێن شێوه‌كاری دا كریه ل ئه‌لمانیا.
خدر هێشتا دبێژیت: نوكه ژی من پێشانگه‌هه‌ك ل باژێرێ بۆن ل وه‌لاتێ ئه‌لمانیا ژ بۆ باژێرێ عه‌فرینێ ڤه‌كریه، د هه‌مان ده‌مدا من پێشانگه‌هه‌كا دیتر یا تایبه‌ت ل باژێرێ به‌رلینێ ڤه‌كریه، كو ئه‌و پێشانگه‌ها شێوه‌كاری بۆ ده‌مێ هه‌یڤه‌كێ دێ یا به‌رده‌وام بیت، من 55 كه‌ڤال نیشانداینه، من ناڤێ كریه پێشانگه‌ها ناسناما ره‌نگین، من سه‌ربورا خۆ ژ سالا 2018 ێ هه‌تا سالا 2024 ێ د وێ پێشانگه‌هێ دا دیاركریه، هه‌روه‌سا من هنده‌ك كه‌ڤالێن پۆرترێت و شه‌ری و حه‌زژێكرنێ و باژێرێرێن كوردان ل رۆژئاڤایێ كوردستانێ د وێ پێشانگه‌هێ دا نیشانداینه، هه‌روه‌سا من ژیانا خۆ
ژی د ده‌مێ زیندانێ دا من دناڤا وان كه‌ڤالان دا دایه دیار كرن و دیسان ناڤه‌رۆكا هنده‌ك كه‌ڤالان به‌حسێ كۆچبه‌ریێ و ژیانا كوردان ل رۆژئاڤایێ كوردستانێ دكه‌ن.
