ناڤه‌كێ گران و گونده‌كێ وێران
بازرگانێن مه خه‌لكی دخاپینن ب ناڤێن وه‌لاتێن پێشكه‌فتی دا پاره‌ی ژ خه‌لكی چێكه‌ن! كه‌س نینه به‌رپسیاریا خودانێن ڤان جهان بكه‌ت! هنده‌ك بنگه‌ه و نه‌خۆشخانه و قوتابخانه و جهێن خزمه‌تا وه‌لاتیان هاتینه ڤه‌كرن ل باژێرێ مه ب ناڤێن وه‌لاتێن پێشكه‌فتی دا خه‌لكی بكێشنه خوه و ب ناڤێ ئیتالیا، ئه‌لمانیا، ئه‌مریكا، هولندا و.. ته‌شقه‌له و دزیان به‌ریكێن وه‌لاتیێن خشیم و نه خشیم دكه‌ن! دبێژنه ڤێ چه‌ندێ (دزی، ته‌شقه‌له، خاپاندن، دره‌و، دسه‌ردابرن). وه‌لاتیێن مه دونیا نه‌دیتی ژ كیڤه دزانیت ئه‌ڤه ڕاسته؟ ژ شرینیا ناڤێن ڤان وه‌لاتان هه‌می پارێ خوه دكه‌ته ده‌ستێ خودانێ جهی دا. ئه‌زێ جویمه (فلان جهێ ئه‌لمانی)! لێ نه دیوار و نه ده‌رگه‌ه و په‌نجه‌ر، نه سیسته‌م، نه كادر، نه دختۆر، خوه تشته‌كێ وان ئه‌لمانی نینه! خوه نڤیسانه‌كا ئه‌لمانی ژی من نه‌دیت! چ ئه‌لمان ل وێرێ نینن!؟، دبیت ڕۆژه‌كێ هنده‌ك خێرخواز سه‌ره‌دان كربیت بۆ ده‌مێ حه‌فتیه‌كێ ل وی جهی، لێ ئه‌و بخوه چ په‌یوه‌ندیا وه‌لاتێ ئه‌لمانیا لگه‌ل ڤی بنگه‌هی نینه. ما نه دبێژنه ڤێ خاپاندن؟ ئه‌ڤه چ توڤ بازرگانیه‌كا ب حیله و دزیه هنگ ل خه‌لكێ باژێرێ خوه دكه‌ن!. ئیتالی دهۆسا نینن! هوله‌ندا ژی یا هۆسا نینه! سیسته‌م و قوتابخانێن سویدی! سویدا چێ؟ ئه‌ڤه چ دره‌ون هنگ ل ڤی خه‌لكێ ساده دكه‌ن؟ دێ به‌س ته‌شقه‌لان بكه‌ن. دێ هه‌ما هه‌ر ناڤێن خوه و باژێرێن خوه ل خوه بكه‌ن ما ئه‌و خه‌لك دێ كیڤه چیت؟ دێ هه‌ر هێته ده‌ڤ هنگۆ! ئه‌و خه‌لك نه‌شێت بچیته سویدێ هه‌ر ڕۆژ، یان بچیته هۆله‌ندا و ئه‌لمانیا سویكا خوه بكه‌ت!. ب ڤان ناڤێن گران ئه‌م نكارین كه‌ساتیه‌كێ بخوه چێكه‌ین یان خوه بهێز بێخین! و د ناڤ خوه دا ئه‌م د خالی و دره‌وین. تویتنه‌كا پیس ب ناڤێ جگاره‌كا ئه‌مریكی یێ دفرۆشنه مه! هه‌ر ئه‌و تویتن ئه‌گه‌ر ب ناڤه‌كێ كوردی چێكربا ملله‌ت دا هه‌ر كریت! پێدڤی ناكه‌ت خاپاندنێ بكه‌ن! ئه‌ڤه هه‌می ڤه‌دگه‌ریت ب شه‌رمزاری بۆ بێ كونترۆلی و بێ هێزیا ده‌زگه‌هێن چاڤدێری ل سه‌ر ڤان كه‌سێن بازرگان. هیڤیا مه ئه‌وه كوردستان بیته وه‌لاته‌كێ سه‌ربخوه دا بكه‌ڤیته بن به‌ند و مه‌رجێن قانوونێن نیڤنه‌ته‌وه‌ی كار و بارێن خوه یێن بازرگانی ل بن چاڤدێرییا جیهانی بجهبینیت، ل وی ده‌می ئه‌م ژی جگاره و خوارن و فه‌خارنێن سه‌خته نابینین، هه‌روه‌سا وه‌لاتێن بیانی مافی ناده‌ته وان كه‌سان ب ناڤێ وه‌لاتێن وان جهێن هۆسا بێخیر و پیس دورست بكه‌ی. یان ژی راسته‌وخوه وه‌شانێن ته‌له‌فزیون و ڕاگه‌هاندنا وان بدزی.
