ناڤه‌ندا خانی دو نڤیسه‌ر و مه‌دیاكارێن دێرین خه‌لاتكرن
دهۆك، شاكر ئه‌تروشی:
ناڤه‌ندا خانی یا ره‌وشه‌نبیری و راگه‌هاندنێ، دوهی ئێڤاری 11/10/2022 هه‌ردو نڤیسه‌ر و مه‌دیاكارێن دێرین (مه‌عسۆم ئه‌نوه‌ر مایی و مه‌حوود موفتی) ل هولا نالبه‌ند ل پانۆراما ئازادی خه‌لاتكرن، هه‌روه‌سا چه‌ند پرتووكه‌كێن نوو كو ژ وه‌شانێن ناڤه‌ندێ نه به‌رچاڤكرن.
ل ده‌ستپێكێ نڤیسه‌ر و مه‌دیاكار(مه‌عسۆم ئه‌نور مایی) چه‌ند وێستگه‌هه‌كێن ژیانا خوه، هه‌روه‌سا ئه‌و خزمه‌تا وی بۆ ئه‌ده‌ب و ره‌وشه‌نبیریا كوردی كری به‌حسكر و گۆت: ژبه‌ركو خواندنا مه ل قوتابخانێ ب زمانێ عه‌ره‌بی بوو، له‌ورا ده‌ستپێكا نڤیسینا مه ژی ب عه‌ره‌بی بوو، لێ هه‌ر زوو بابێ من شه‌هید ئه‌نوه‌ر مایی ئه‌ز هاندام كو ب زمانێ دایكێ بنڤیسم و هه‌ر تشته‌كێ هه‌تا نوكه من نڤیسیبیت یان پرتووكه‌ك من چاپكربیت ئه‌ز شانازیێ پێ دبه‌م و هیڤیا من ئه‌وه ئه‌ز شیابم هه‌كه خزمه‌ته‌كا بچووك ژی بیت بۆ ئه‌ده‌ب و ره‌وشه‌نبیریا كوردی بكه‌م و نوكه ژی پرۆژێ چه‌ند پرتووكان ل به‌ر ده‌سته و هیڤیا من ئه‌وه ب ساخیا خوه ئه‌ز چاپ بكه‌م.
دووڤدا نڤیسه‌ر و مه‌دیاكار (مه‌حموود موفتی) چه‌نده‌كێ ل سه‌ر ژیانناما خوه و سه‌ربۆرا خوه ل گه‌ل ئێزگێ كوردی ل به‌غدا به‌حسكر و ئاماژه ب وێ چه‌ندێ كر كو رادیۆیا ناڤبری خزمه‌تا ئه‌ده‌ب و ره‌وشه‌نبیریا كوردی كریه.
