ناڤه‌ندا خانی چار پرتووكێن دی چاپكرن
دهۆك، زنار تۆڤی:
پرۆژێ چاپكرنا پرتووكان ل ناڤه‌ندا خانی یا ره‌وشه‌نبیری و راگه‌هاندنێ یێ به‌رده‌وامه و ل ڤێ دووماهییێ چار پرتووكێن دی چاپكرینه.
ئیسماعیل بادی، ئه‌ندامێ پشكا ره‌وشه‌نبیری، ل ناڤه‌ندا خانی یا ره‌وشه‌نبیری و راگه‌هاندنێ بۆ رۆژناما ئه‌ڤرۆ دیاركر كو ناڤه‌ندا خانی یا ره‌وشه‌نبیری و راگه‌هاندنێ چار پرتووكێن دی چاپكرنیه، ئێك ژ وان پرتووكان ب ناڤێ (خالد شلی رێكێشێ رێبازا بارزانی) یه، ژ نڤێسینا حه‌جی ئه‌حمه‌د بێركیاتی یه، ئه‌ڤ پرتووكه دكیۆمێنتاری یه و به‌حسێ سه‌ربۆرا پێشمه‌رگایه‌تیێ یا خالد شلی دكه‌ت، دیوانا هه‌لبه‌ستا یا ب ناڤێ ( نه‌ره‌ڤی) یا قادر قاچاخ ، كۆمه‌كا هه‌لبه‌ستان ب هه‌ردو زاراڤێن سۆرانی و به‌هدینی تێدا هاتینه ڤه‌هاندن، پرتووكا (شه‌هید)، شه‌هیدێن فه‌رماندا دهۆك ل شه‌رێ دژی تیرۆرستێن داعشێ و حه‌شدا شه‌عبی، ژ به‌رهه‌ڤكرنا رێكخستنا فه‌رماندا دهۆكێ یه، د وێ پرتووكێ دا وێنێن وان پێشمه‌رگێن تێدانه یێن د شه‌رێ دژی تیرۆرستێن داعشێ و حه‌شدا شه‌عبی هاتینه شه‌هید كرن، ل گه‌ل ناڤێن وان و رۆژا شه‌هیدبوونا وان تێدا هاتینه نڤێسین، پرتووكا چارێ ب ناڤێ (رێبه‌رێ گه‌شتییاری یێ ئامێدیێ) یه، ژ به‌رهه‌ڤكرن و دیزاینكرنا زۆهێر یاسین ئامێدی یه،چه‌ندین نه‌خشه و جهێن گه‌شتییاری و پێزانینێن گه‌شتییاری و دیرۆكی، ناڤ و نیشانێن رێكا و ده‌ڤه‌ران تێدا هاتینه نڤێسین، د هه‌مان ده‌مدا چه‌ندین پرتووكێن دی ژی چاڤه‌رێیی چاپكرنێ نه، ل ڤان نێزیكان هنده‌ك ژ وان پرتووكان دێ چنه چاپێ.
