ناڤه‌ندا چاڤدێریا مافێن مرۆڤی: سووریێ به‌ر ب گوهۆڕینێن نوو ڤه دچیت
ئه‌ڤرۆ:
ناڤه‌ندا چاڤدێریا مافێن مرۆڤی یا سووریێ راگه‌هاند كو چه‌ند رۆژن ل ئالیه‌كێ توركیا ئێرشێ گۆندێن كۆبانێ و قامشلۆ ل رۆژئاڤایێ كوردستانێ دكه‌ت و ل ئالیێ دی رۆسیا ژی ل ئدلبێ ئێرشی چه‌كدارێن سه‌ر ب توركیا دكه‌ت و ئه‌و یه‌ك ژی نیشا دده‌ت كو سووریێ به‌ر ب گوهۆرینێن نوو ڤه دچیت.
ناڤه‌ندا چاڤدێریا مافێن مرۆڤی یا سووریێ راگه‌هاند كو چه‌ند رۆژن توركیا گۆندێن كۆبانێ و قامشلۆ یێن رۆژئاڤایێ كوردستانێ به‌رده‌وام تۆپباران دكه‌ت و د ئه‌نجاما تۆپبارانا له‌شكرێ دا توركیا هه‌تا نها گه‌له‌ك كه‌سێن سڤیل بریندار بووینه و خه‌لكێ هنده‌ك گۆندان ژی ژ ترسان مالێن خوه چۆل كرینه و ل ئالیێ دی رۆسیا ژی ل ئدلبێ چه‌ند رۆژن ئێرشی هێزێن سه‌ر ب توركیا دكه‌ت و د ئه‌نجاما ئێرشێن چه‌ند رۆژێن بۆری یێن فرۆكێن شه‌ری یێن رۆسیا دا ٤٥ چه‌كدارێن سه‌ر ب توركیا هاتینه كوشتن و گه‌له‌ك چه‌كدار ژی بریندار بووینه.
ناڤه‌ندا چاڤدێریا مافێن مرۆڤی ئه‌و یه‌ك ژی دیار كریه كو ژ ئالیه‌كێ رۆسیا داخواز دكه‌ت كو توركیا و سووریێ ده‌ست ب دانوستاندنان بكه‌ن و ل ئالیێ دی ژی ئێرشی چه‌كدارێن سه‌ر ب توركیا دكه‌ت و ئه‌مریكا ژی بنگه‌هێن نوو ل باكورێ سووریێ ئاڤا دكه‌ت و چه‌كێ گران ل وان بنگه‌هان بجه دكه‌ت، ئه‌ڤ پێشهاتێن نوو ل سووریێ ژی نیشا دده‌ن كو دێ گوهۆرین د ره‌وشا سیاسی یا سووریێ دا روو ده‌ن و هه‌ر ئالیه‌ك نها بزاڤا هندێ دكه‌ت كو پێگه‌هێ خوه ل سووریێ بهێز بكه‌ت.
ل ئالیێ دی ده‌زگه‌هێن راگه‌هاندنا توركیا دیار دكه‌ن كو چه‌ند رۆژن سه‌رۆكێ ده‌زگه‌هێ هه‌والگیریا توركیا ل سووریێ یه و ل گه‌ل به‌رپرسێن وی وه‌لاتی چه‌ندین كۆمبوون كرینه و د كۆمبوونان دا به‌رپرسێن سووریێ داخواز ژ توركیا كرینه كو هه‌موو هێزێن خوه ژ ئاخا سووریێ ڤه‌كێشیت و پشته‌ڤانیێ ل چه‌كدارێن سووری نه‌كه‌ت و ل هه‌مبه‌ر دا توركیا ژی دیار كریه كو دڤێت به‌ری هه‌ر تشته‌كێ ره‌وشا سووریێ ئاسایی بیت، دڤێت هه‌لبژارتن ل سووریێ بهێنه كرن دا حوكمه‌ته‌كا نوو ب پشته‌ڤانیا خه‌لكی بهێته سه‌ر ده‌ستهه‌لاتێ و وی ده‌می توركیا دێ ل گۆر راستیا هه‌ی سه‌ره‌ده‌ریێ ل گه‌ل ره‌وشا سووریێ دكه‌ت.
چاڤدێرێن سیاسی ژی دیار دكه‌ن كو ده‌مه‌كه توركیا هۆشداری دایه هێزێن ئۆپۆزسیۆنا سووریێ كو ژ ئاخا وێ ده‌ركه‌ڤن و ئێدی توركیا پشته‌ڤانیێ ل ئۆپۆزسیۆنا سووریێ ناكه‌ت و ل ئالیێ دی رۆسیا ژی نه‌ڤێت ئه‌و ئۆپۆزسیۆنا سووریێ كو هه‌تا نها شه‌رێ به‌شاری و كوردان كرینه د كۆمبوونێن ل گه‌ل شامێ دا پشكدار بن، ئه‌و یه‌ك ژی بوویه ئاریشه‌كا گه‌له‌ك مه‌زن بۆ توركیا، چونكی ئه‌ردۆغانی دڤێت ئه‌و په‌نابه‌رێن سووری یێن نها ل توركیا نه ڤه‌گه‌رنه ڤه وه‌لاتێ خوه لێ ژ به‌ر مه‌رجێن شامێ ئه‌و یه‌ك بۆ توركیا ب ساناهی نابیت.
