ناڤه‌ندا چاڤدێریا مافێن مرۆڤی یا سووریێ:هژماره‌ك چه‌كدارێن داعشێ ژ زیندانا حه‌سه‌كێ ره‌ڤینه و چووینه توركیا
ئه‌ڤرۆ:
ناڤه‌ندا چاڤدێریا مافێن مرۆڤی كو بنگه‌هێ وێ یێ سه‌ره‌كی ل بریتانیا یه دیار دكه‌ت كو ژ ئه‌نجاما ئێرشا داعشێ ل سه‌ر زیندانا حه‌سه‌كێ پتر ژ دوسه‌د چه‌كدارێن داعشێ شیاینه ژ زیندانێ بڕه‌ڤن و هنده‌ك ژ وان چووینه توركیا.
ناڤه‌ندا چاڤدێریا مافێن مرۆڤی یا سووریێ راگه‌هاند كو ئه‌مریكا و وه‌لاتێن دی یێن هه‌ڤپه‌یمانیا شه‌رێ ل دژی داعشێ هه‌تا نها ژی دووڤچوونا وان گرتیێن داعشێ دكه‌ن یێن كو شیان ژ زیندانا حه‌سه‌كێ بڕه‌ڤن و هژماره‌ك ژ وان ژی چووینه توركیا و هنده‌ك ژ وان ژی به‌رێ خوه داینه سنۆرێ ئیراقێ، ئه‌مریكا و ده‌زگه‌هێن هه‌والگیریێ ب باشی دووڤچوونا بابه‌تی دكه‌ن و به‌رپرسه‌كێ ده‌زگه‌هێ هه‌والگیریا ئه‌مریكا ئه‌و یه‌ك پشتراست كریه كو هنده‌ك ژ وان چه‌كدارێن داعشێ چووینه توركیا و دڤێت توركیا وان زیندانی بكه‌ت یان ژی راده‌ستی وه‌لاتێ وان بكه‌ت دا نه‌بنه مه‌ترسی ل سه‌ر وه‌لاتێن رۆژهه‌لاتا ناڤین.
ناڤه‌ندا چاڤدێریا مافێن مرۆڤی یا سووریێ ئه‌و یه‌ك ژی دیار كریه كو هنده‌ك ژ وان كه‌سان ژی هه‌تا نها ل هنده‌ك تاخێن باژێرێ حه‌سه‌كێ و گوندێن ده‌وروبه‌رێن حه‌سه‌كێ خوه ڤه‌شارتینه و ئۆپه‌راسیۆنا هێزێن سووریا دیموكرات و هێزێن تایبه‌ت یێن ئه‌مریكا بۆ ده‌سته‌سه‌ركرنا وان كه‌سان ژی به‌رده‌وامه، چونكی ئه‌و چه‌كدارێن ڕه‌ڤینه دشێن گه‌له‌ك ئاریشان بۆ رۆژئاڤایێ كوردستانێ و سووریێ دروست بكه‌ن و هه‌روه‌سا هه‌كه ئه‌و كه‌سه بشێن بچنه ئیراقێ ژی دشێن ده‌ست ب كریارێن تیرۆرستی ل وێرێ بكه‌ن، ژ به‌ر هندێ ژی به‌رپرسێن ئه‌مریكا داخواز ژ حوكمه‌تا ئیراقێ ژی كرینه كو ب باشی سنۆرێن خوه یێن ل گه‌ل سووریێ بپارێزن دا نه‌هێلن ئه‌و چه‌كدارێن تیرۆرست ده‌ربازی ئیراقێ ببن.
ئه‌و یه‌ك د ده‌مه‌كێ دایه كو به‌ری نها رۆژنامه‌یه‌كا ئه‌مریكی ژی دیار كربوو كو ژ ئه‌نجاما ئێرشا رێكخستنا تیرۆرستی یا داعشێ ل سه‌ر زیندانا حه‌سه‌كێ پتر ژ دوسه‌د چه‌كدارێن داعشێ یێن كو د زیندانێ دا بوون شیاینه بڕه‌ڤن و هنده‌ك ژ وان ژی به‌رێ خوه داینه ئیراقێ، لێ هنده‌ك ژ وان كه‌سان هه‌تا نها د ناڤ باژێرێ حه‌سه‌كێ و گوندێن ده‌وروبه‌رێن حه‌سه‌كێ دا خوه ڤه‌شارتینه و هه‌روه‌سا شانێن نهێنی یێن داعشێ ژی هه‌ڤكاریا وان كه‌سان دكه‌ن دا بشێن وان ده‌ربازی ده‌ڤه‌ره‌كێ دی بكه‌ن، ئه‌و یه‌ك ژی مه‌ترسیه‌كا خوه یا مه‌زن بۆ پاشه‌رۆژا رۆژئاڤایێ كوردستانێ هه‌یه و هێزێن ئه‌مریكا ژی ب هه‌موو ره‌نگه‌كێ هاریكاریا هێزێن سووریا دیموكرات دكه‌ن دا بشێن چه‌كدارێن كو ژ زیندانێ ڕه‌ڤینه ده‌سته‌سه‌ر بكه‌ن.
چاڤدێرێن سیاسی ژی دیار دكه‌ن كو هنده‌ك ژ وه‌لاتێن رۆژهه‌لاتا ناڤین ل گه‌ل رۆسیا ده‌ست ب پیلانه‌كا نوو كرینه و وان دڤێت جاره‌كا دی داعشێ بۆ مه‌ره‌مێن خوه یێن سیاسی بكار بینن و روودانا ل زیندانا حه‌سه‌كێ ژی نیشا دده‌ت كو داعشێ ئه‌و شیان هه‌نه بشێت جاره‌كا دی ده‌ست ب ئێرشێن مه‌زن بكه‌ت، لێ كوشتنا خه‌لیفێ داعشێ ب ده‌ستێ هێزێن ئه‌مریكی و ب پشته‌ڤانیا هێزێن سووریا دیموكرات دربه‌كا گه‌له‌ك مه‌زن بوو و ره‌نگه ئه‌و یه‌ك ببیته ئه‌گه‌ر كو داعش لاواز ببیت و گه‌له‌ك پیلانێن وێ ژی سه‌ر نه‌گرن، لێ دڤێت هه‌ڤپه‌یمانیا نێڤده‌وله‌تی یا شه‌رێ ل دژی داعشێ خوه بۆ قۆناغه‌كا نوو یا شه‌ری به‌رهه‌ڤ بكه‌ت، چونكی رۆسیا، توركیا و رژێما سووریێ ل گه‌ل ئیرانێ دخوازن بۆ تێكدانا ئارامیا ل ده‌ڤه‌رێ و پاراستنا به‌رژه‌وه‌ندیێن خوه جاره‌كا دی داعشێ بكار بینن و ئه‌و یه‌ك ژی دێ بیته ئه‌گه‌رێ روودانا گه‌له‌ك كاره‌ساتان.
