ناڤێن چه‌ند قوتابخانێن سریانى ل په‌روه‌ردا ئامێدیێ دهێنه گوهۆرین
ئامێدیێ، مه‌حمود نهێلى
هژماره‌كا قوتابخانه‌یێن سریانى ل سنورێ په‌روه‌ردا ئامێدیێ ده‌ست ب گوهۆرینا ناڤێن خوه كریه و ئه‌ڤ یه‌كه ژى بوویه فه‌رمى و بۆ لایه‌نێن په‌یوه‌ندیدار هاتیه بلند كرن.
ناسر موحه‌مه‌د سه‌عید رێڤه‌به‌رێ په‌روه‌ردا قه‌زا ئامێدیێ بۆ ئه‌ڤرۆ نیوز دیاركر، نها شه‌ش قوتابخانه‌یێن بنه‌ره‌تى دگه‌ل دو قوتابخانه‌یێن ئاماده‌یى یێن سریانى ل سنورێ په‌روه‌ردا وانا هه‌نه و گۆت: ( د وان قوتابخانه‌یان دا دورێن 600 بۆ 700 قوتابیان هه‌نه و ئه‌ڤ قوتابخانه ل وان جهانه یێن رێژه‌یه‌كا زۆرا مه‌سیحیان لێ هه‌ین).
ناڤبرى دیاركر، كو د ڤێ داویێ دا دوو ژ وان قوتابخانه‌یان ناڤێن خوه گهورینه و هه‌ردوو ژى ل دێره‌لۆكێ نه ئێك ژ وانا یا ئاماده‌یى ب ناڤێ زه‌هریرا ناڤێ وێ هاتیه گهورین بۆ ئێكێ نیسانێ و قوتابخانا دوویێ ژى یا بنه‌ره‌تى بوویه و ژ ناڤێ زاب بۆ لاماسو ئانكو گایێ سور هاتیه گوهورین و گۆت: ( گهورینا ڤان ناڤ ژى ل دووڤ حه‌زا رێڤه‌به‌ر و ماموستایێن وان قوتابخانه‌یان بوویه و ب نڤیسارێن فه‌رمى ژى ئه‌ڤ ناڤ گهورینه هاتیه ئه‌نجامدان.
ناڤبرى ئاشكرا ژى كر، كو كێماسى د میلاكێ ماموستایێن قوتابخانه‌یێن سریانى ژى دا هه‌یه لێ هه‌ر چاوابیت ب رێكا وانه‌بێژیێ د هێنه پركرن و نه‌هێلایه كێماسى بكه‌ڤیته د پروسه‌یا خواندنا سریانى دا ل ده‌ڤه‌رێ.
