ناڤەك ل سەر کنارێ دەریایێ
ناسح کامکاری
دەنگێ زەنگا تەلەفۆنێ ژ چ ئامیرێ موزیکا خوەش وەرگرتیە؟ نە ئەو تەلەفۆنێن رەش یێن کەڤنار کو زەنگا وێ وەکو زەنگا پایسکلەکا ژ کارکەفتی کو دەمێ دوگما وێ دزڤراند بتنێ خڕ خڕ دکر، بەلکو ئەو تەلەفۆنا بێ تێل کو ل هەر دەمەکی ژ کوژیەکا مالێ زەنگا وێ لێ ددا، وەکو ئاوازا ترومپێت کو تە دبهیست لێ تە خەم ژ وێ نەدخوار.
هزربکە ئەو پەیوەندیا چارەنڤیسسازا ژیانا تە بیت و تو تێلەفونێ درەنگ هەلگری و ئەو تەلەفۆنێ بگریت و چ جاران دەنگێ وێ نەبهیسی، کو ئەو بێژیت (جهێ نادر)یە و تە دزانی کو ئەڤە رەمزا پەیوەندیا هەوە یە، ئەگەر ل جهێ بابێ تە یێ دەست نەخوەش تە ب خوە تەلەفۆن هەلگرتبا و د بەرسڤدا بێژی: بەلێ فەرموو. و ئەو پشتراست بیت یێ کو د پەیڤیت تو ب خوەی و ژ رێیەکا دویر، و ژ باژێرەکێ گەلەک دویر خەبر دابا تە کو خوازگینەک سەرسەخت هاتیە رێکا وێ دا، و تو دبێژی نەکو قەبوول بکەی و بزڤریت و پەیوەندیا هەوە یا ب نهێنی ب خێر و خوەشی بدووماهی بهێت و هەڤژینیێ پێک بینن و پشتی دو سالان زارۆکا بینن، خانی، ترومبێلێ ب کریت و زارۆکا ب هنێریتە قوتابخانێ وهەر بهێنڤەدانەکێ بچنە باکوری و دەستێن هەوە تێکدابن..
ل کنارێ دەریایێ پیاسا بکەن و ناڤێ هەڤدو ب سەرێ تبلکێن پی یێن خوە ل سەر كناری بنڤیسیت.
دەریایێ ژی پێل ل سەر پێلان هاڤێتبان، و پشتی چەند هەولدانەکان گوزەکێن پی یێن هەوە یێن رویس گەزتبان و پیستێ تە تو هشیارکربا و ئینابا بیراتە کو بتنێ ئێهمالیەک بوو، پشتگوههاڤێتنا تە ژ زەنگا ترومپێتا تەلەفۆنێ، دێ ژیانا تە گوهۆڕیت و ئەو دێ ل هەما باژێرێ دویر مینیت و دێ بەرسڤا خواستیێ خوە یێ بێزارکەر ددەت و دێ شویکەت و دێ بتە خودان زارۆک ودێ خانیەکی کریت و هەمی کریسمسان زڤریتە وەلاتی، بەلکو ژ بەر شیماتیەکی یان ژ مەرەقێ پەیوەندیەکا تەلەفۆنی بکەت یان نەکەت؛ داکو پشتی چەندین سالان تو بکەڤیە د هزران دا و ل دووماهیێ بێژی: ئەرێ بۆچی وان ئاوازەکا خەمگین یا ترومپێتێ بۆ دەنگێ تەلەفۆنێ هەلبژارت بوو…؟
ژێدەر: ناصح کامکاری، سقف این خانە کوتاه است، ل ١٢٢-١٢٣
