ناڤەندا خانی سێ پرتووكێن نوو گەهاندنە چاپێ
ئەڤرۆ
شاكر ئەتروشی:
ناڤەندا خانی یا رەوشەنبیری و راگەهاندنێ ل پارێزگەها دهۆكێ، ل چەند رۆژێن بۆری سێ پرتووكێن نوو گەهاندنە چاپێ و پشتی ب دووماهی دهێن د رێورسمەكێ ژهەژیدا دێ هێنە ئیمزاكرن و بەلاڤكرن، هەروەسا ل دەمژمێر پێنجی ئێڤاریا رۆژا چارشەمبی، رێكەفتی 3/5/2023 دێ سمینارەك بۆ بەرێز (سەربەست مستەفا ئامێدی) سەرۆكێ بەرێ یێ كۆمسیونا بلندا هەلبژارتنان ل عیراقێ ل بن ناڤێ (هەلبژارتنێن پەرلەمانێ كوردستانێ، بەربەست و چارەسەری) ل هولا ناڤەندێ هێتە گێڕان و هاتن بۆ هەموویانە.
موسەدەق تۆڤی، بەرپرسێ پشكا رەوشەنبیری ل ناڤەندا خانی بۆ رۆژناما ئەڤرۆ گۆت: هەر سێ پرتووكێن گەهشتینە چاپێ ئەڤە نە:
بەیتا حەفت تەبەق، بەیتێن سەیدایێ عەبدولقادرێ گیزەرەشی نە، ب چیا و گەلی و رووبار و كانی و زۆزانێن كوردستانێ ڤەهاندینە، ب هەر دوتیپێن كوردی (لاتینی و عەرەبی) دێ كەڤنە بەر دەستێن خواندەڤاان، دڤێ پرتووكێ دا هەموو ئەو ناڤێن د بەیتاندا هاتین داینە نیاسین و شرۆڤەكرن.
دین و جهانا نوو، كۆمەكا گۆتارێن زانایێ ناڤدارێ ئیرانی (عەبدولكەریمێ سرووش) ن، ژلایێ لەزگینێ چالی ڤە هاتینە هەلبژارتن و وەرگێڕان بۆ سەر زمانێ كوردی، پرتووك ژ (464) بەرپەران پێك دهێت و كۆردویێ چالی ب كارێ راچاندنا بەرپەران و بەرگێ پرتووكێ رابوویە.
چەند راوەستگەه د دیرۆكا میرگەها بەهدیناندا، چەند ڤەكۆلینێن دیرۆكی یێن نڤیسكار (سەعید دێرەشی) نە، تایبەتن ب دیرۆك و رەوشا رەوشەنبیریا میرگەها بەهدینان دگەل چەند دیكیۆمێنت و دەستنڤیسەكێن دیرۆكی د (250) بەپەران دا هاتینە ئامادەكرن.
