ناڤەندا خانی هەلبەستڤان و ڤەكۆلەرێ مەزن (د. عەبدولرەحمان مزووری) ب مەدالیا زێڕی خەلاتكر
شاكر ئەتروشی:
ب بەرهەڤبوونا (سەربەست لەزگین) ئەندامێ مەكتەبا سیاسی یا پارتی دیموكراتی كوردستان و (د.سالار عوسمان) بەرپرسێ بەشێ رەوشەنبیری و راگەهاندنا پارتی و (ئحسان ئامێدی) بەرپرسێ ناڤەندا خانی یا رەوشەنبیری و راگەهاندنێ، ل دەمژمێر سێی پشتی نیڤرۆا رۆژا پێنجشەمبی، رێكەفتی 13/2/2025 ناڤەندا خانی یا رەوشەنبیری و راگەهاندنێ د چالاكیەكا تایبەتدا كو ل هۆلا ئێكەتیا نڤیسەرێن كورد/ تایێ دهۆكێ دهاتە گێڕان، رێز ل هەلبەستڤان و ڤەكۆلەرێ مەزن (د. عەبدولرەحمان مزووری) گرت و ب مەدالیا زێڕی خەلاتكر، هەروەسا چوار پرتووكێن وی یێن نوو ب دباری ل سەر بەرهەڤبوویان بەلاڤكرن و كەنالێ دهۆك تیڤی ژی بەلگە فلمەكێ دكیۆمەنتاری ل دۆر ژیان و بەرهەمێن (مزووری) نیشادا و سێ سمینار ژی هاتنە نیشادان.
پشتی راوەستیان دەقیقەكێ رێزگرتن بۆ گیانێ پاقژێ شەهیدان و سەروەرێ وان بارزانیێ نەمر و ئدریسێ جوانەمەرگ، بەرێز (ئحسان ئامێدی) بەرپرسێ ناڤەندا خانی یا رەوشەنبیری و راگەهاندنێ پەیڤەك پێشكێشكر و تێدا گۆت:
میهڤانێن خۆشتڤی.. ئامادەبویێن هێژا..
بناڤێ ناڤەندا خانی یا روشەنبیری و راگەهاندنێ بخێرهاتنەكا گەرم ب وەیێن هێژا دكەین، و سەر چاڤان هاتن بۆ رێورەسمێن رێزگرتنێ ل هۆزانڤان و ڤەكۆلەرێ كورد د. عەبدولرەحمان مزووری..
هێژایان..
د دەمەكی دا دەنگێ تەقا خەباتێ نزم بوو، هیڤی و ئۆمێد لاواز بوون.. پەیڤ و ئاوازان سەنگەر گرتن و بەرنەدان و گۆت ژ ڤێرە ناچین، و درێژی دا خەباتێ ب پەیڤ و ئاواز و سترانان.. و مزووری ژی ب دەنگەكێ بلند گۆت:
ئەگەر ئەز كوچەرەك بامە و گۆتبانە من،
كەوالێن خۆ ببە بەحەشتێ ب بچەرینە،
بەحەشت جهێ وارێ شینە،
دا بێژم نە
بەرێ پەزی دێ دەم زۆزان و كێریا،
وارێ نەفەل و تەڤریا،
بو ناڤ گوند و شەرگەها شەنگە بیا،
دا نە بیژن،
چ وارەكێ بێ خودانە
خودانێن وی ژ خۆ ناگرن،
بۆ خۆ بكەنە
هەڤشی و كۆز و چەروانە
هەڤشی و كۆز و چەروانە
پەیڤ و هۆزانێن عەبدولرەحمانێ مزووری هنگی مەیدان بۆ دژمنان چوول نەكر و بەرخودانكر، و هیڤی و ئومێدێن كوردینیێ دناڤ گەنج و قوتابیاندا زیندی هێلان و هشیاركرن. دەمێ دگۆت:
گەر پەرێن مێوێ ببڕن،
دێ دەتن ئویشیا گەلەكا،
گەر سەرێ تەیری ببڕن،
دێ كەڤیتە چەرخا گوڤەند و حەنەكا،
شڤێ ژ تەراشێ ببڕن،
دێ بیت گۆپال
ژبۆ زەندێن خورتە شڤان و چەلەكا،
رەهێن من ژی هوین ببڕن،
وەك فریزی دێ ڤەگەرم،
لات و مشار و كەلەكا
لات و مشار و كەلەكا
ئەڤە و ب دەهان هۆزان و نڤیسینێن دی، مزیری خزمەتا ئەدەب و روشەنبیریا كوردی كر، و حەزا كوردینیێ و پەیڤ و نڤیسینا كوردی خورت كر.
هێژایان..
خوشحال و بەختەوەرین ئەڤرۆكە هوینێن هێژا ل ڤێرە ئامادەنە بو رێزلێنانێ ل شاعر و نڤیسەر و ڤەكۆلەرێ هێژا د عەبدولرحمان مزووری.
رێزلێنان ل زانا و رەوشەنبیر و هونەرمەند و ئەدیب و كەسانێن داهێنەرێن مللەتی ئەركەكێ مرۆڤی و جڤاكی و نیشتیمانی یە، و هاندانە بو گەشەبوونا بزاڤا رەوشەنبیری و هونەری و ئەدەبی ل كوردستانێ، لەوان مە وەكو ناڤەندا خانی یا رەوشەنبیری و راگەهاندنێ ب ئەركێ خو زانی د چارچۆڤەیێ بەرنامەیێ خۆ یێ رێزلێنانێ دا، ڤێجارێ رێزێ ل بەرێز د عەبدولرەحمانێ مزوورێ شاعیر و نڤیسەر و ڤەكۆلەر بگرین هیڤیە جهێ خۆشحالیا بەرێزی و ئامادەبویێن هێژا و تەڤ هەڤكارێن وی بیت.
سەیدایێ عەبدولرەحمان مزووری مامۆستایەك هێژایە و ستێرەكا گەشا ئاسمانێ رەوشەنبیری و ئەدەبیاتا كوردستانێ یە، بتایبەتی ل دەڤەرا بەهدینان.
د عەبدولرەحمان مزووری ئەڤە نێزیكی 60 سالانە د مەیدانا رەوشەنبیری و ئەدەبیاتا كوردی دا یێ چالاك و بەرهەمدارە، هزر و پەیڤ و خامەیێ وی یێن كار دكەن دا زانینێن دروست نیشا بدەت و مللەتی هشیاركەت، ژ بەر ڤێ چەندێ و بڤێ هەلكەفتنێ مە چەندین بەرهەمێن وی وەكو پرتوەك بەرهەڤكرن و چاپكرن و ئێخستنە بەر دەستێن خویندەڤانێن هێژا ئەو ژی:
1-دیوانا مزووری. كو سەرجەم هۆزانێن وی نە.
2-دیوانا شێخ نورەلدینێ بریفكی. كۆمكرن و تویژاندنە.
3-دەورێ بەدەویێن بیابانان. ڤەكۆلین.
4-نەورۆز و ئەژدەها و كورد. ڤەكۆلین.
یا زانایە د عەبدولرەحمان مزووری گەلەك بەرهەمێن دی ل رۆژنامە و گۆڤار و ل چاپەمەنیێن دی دا بەلاڤ كرینە، ئەڤ رەوشەنبیرێن بەرهەمدار ل جهێ سەرفرازیا مللەتی نە،. هیڤیا سەركەفتنێ و ساخلەمیەكا باش و تەمەنەكێ درێژ بو د عەبدولرەحمانێ مزووری دخوازین.
و هەر سەرفراز بن..
د دووڤدا (د.سالارعوسمان) بەرپرسێ بەشێ رەوشەنبیری و راگەهاندنا پارتی، پەیڤەك پێشكێشكر و تێدا گۆت:
ئەڤرۆ ئەم خوە سەربلند دبینین ل باژێرێ دهۆكا رەنگین رێزێ ل كەسایەتەكێ مەزن بگرین، ئەو ژی هەلبەستڤان و ڤەكۆلەرێ مەزن (د. عەبدولرەحمان مزووری) یێ كو پتر ژ (50) سالێن ژیێ خۆ بۆ خزمەتكرنا ئەدەب و رەوشەنبیریا كوردی و پەیڤا رەسەن تەرخانكرین و (12) پرتووكێن پر ب مفا داناینە بەر دەستێن خواندەڤانان و ئەڤە ژی جهێ خۆشحالیەكا مەزنە، لەورا مە وەك بەشێ رەوشەنبیری و راگەهاندنا پارتی ب فەر دیت رێزێ ل (مزووری) بگرین و ئەڤا مە بۆ كری خزمەتەكا بچووكە بەرانبەر كار و ئەركێن وی یێن مەزن و دێ ل سەر ڤێ چەندێ دبەردەوام بین و ئەم سۆزێ د دەین ئەوا ژ دەستێن مە دهێت بۆ هەر نڤیسەرەكی یان هونەرمەندەكی ئەوێن خزمەتی كرین تەخسیریێ نەكەین و دێ ل سەر خەلاتكرنا وان د بەردەوام بین و ئەم ڤێ چەندێ ب ئەركێ خوە دزانین.
د پەنەلێ دووڤدا سێ سمینار ژلایێ بەرێزان (موئەیەد تەیب، د. محەمەد سالح زێباری، د.عارف حیتۆ) هاتنە پێشكێشكرن و پەنەل ژلایێ بەرێز (موسەدەق تۆڤی) بەرپرسێ پشكا رەوشەنبیری ل ناڤەندا خانی هاتە ب رێڤەبرن، پاشان بەلگە فلمەكێ دكیۆمەنتاری ل دۆر ژیان و بەرهەمێن (مزووری) كو ژئالیێ كەنالێ دهۆك تیڤی ڤە هاتبوو بەرهەڤكرن، هاتە نیشادان، پاشان چەند خەلات و قەفتێن گولان پیشكێشی (مزووری) هاتنە كرن، ژوانا خەلاتێ مەكتەبا رێكخستنا پارتی ل دهۆكێ و خەلاتێ بەشێ رەوشەنبیری و راگەهاندنا پارتی و خەلاتێ مەدالیا زێڕی ژئالیێ ناڤەندا خانی ڤە و خەلاتێن ئێكەتیا نڤیسەرێن كورد/تایێ دهۆك و رێڤەبەریا گشتی یا رەوشەنبیری و هونەری ل دهۆكێ و مالباتا (مزووری).
د برگەیا دوماهیێ ژی دا هەلبەستڤان و ڤەكۆلەرێ مەزن (د. عەبدولرەحمان مزووری) پەیڤەك پێشكێشكر و تێدا گۆت: ئەڤرۆ ئەز گەلەكێ دلخۆشم بڤێ رێزلێنانا ل من هاتیە گرتن و سوپاسیا بەشێ رەوشەنبیری و راگەهاندنا پارتی دیموكراتی كوردستان و ناڤەندا خانی یا رەوشەنبیری و راگەهاندنێ و هەموو وان هەڤالێن ب رێكخستنا ڤێ چالاكیێ رابووین، هەروەسا سوپاسی و دەستخۆشیێ ل وان هەڤالان دكەم یێن كو ل گەل من ماندیبووین و ئەم شیاین پێكڤە وان چوار پەرتووكان بگەهینە چاپێ و ئەڤرۆ ب دانینە بەردەستێن هەوە یێن هێژا، ل دوماهیێ ژی سێ هەلبەستێن خوە خواندن و ڤێ چالاكیێ نێزیكی دو دەمژمێران ڤەكێشا و هژمارەكا زۆرا ئەدیب و نڤیسكار و هەلبەستڤان و رەوشەنبیر و هەڤال و دۆستێن (مزووری) و هژمارەكا ئەندامێن مالباتا وی لێ دبەرهەڤ بوون.
