ناڤەندا خانی چالاكیەكا رەوشەنبیری ل دەڤەرا بارزان گێڕا
شاكر ئەتروشی:
پشكا رەوشـــــــــــــەنبیری ل ناڤەندا خانــــــــی یا رەوشـــــــــــــــەنبیری و راگەهاندنـــــــــێ، ب هەڤكاری ل گەل رێڤەبەریا رەوشەنبیری و هونەری ل بارزان، دوهی ئێڤاری 22 تەباخێ، چالاكیەكا رەوشەنبیری ل هولا رێڤەبەریا رەوشەنبیری ل بلێ گێڕا و دوێ چالاكیێ دا كو هژمارەكا نڤیسەر و رەوشەنبیرێن دەڤەرێ تێدا د بەرهەڤبوون، دو سمینار هاتنە پێشكێشكرن و هژمارەكا پرتووكان ژی كو ژ وەشانێن ناڤەندا خانی بوون ب دیاری ل سەر بەرهەڤبوویان هاتنە بەلاڤكرن.
بەرنامێ چالاكیا دوهی ل دەمژمێر چاری ئێڤاری ب سمینارا بەرێز(د. بێكەس بریفكانی) ل ژێرناڤێ (شكەفتا شانەدەر و گرنگیا وێ یا شینواری و گەشت و گوزارێ) دەستپێكر، سمینارا دویێ ژی ژلایێ نڤیسكار (فاخر عەلی) ل ژێر ناڤێ (ڤەخواندنەك مەعریفی بۆ مەم و زیناخانی) هاتە پێشكێشكرن، د دوڤدا رۆمانا (مەلە فەخری) یا نڤیسكار (كرمانجێ چالی) هاتە ئیمزاكرن و د بڕگا دووماهیێ ژی دا پرتووكێن ناڤەندا خانی هاتنە بەلاڤكرن.
