ناڤ دێ بۆ تاخ و كولان و جاده‌یێن سه‌نته‌رێ ناحیا كانى ماسێ هێنه دانان
ئەڤرۆ نیۆز،زنار تۆڤى:
نێزیكى 90 سالانه كانى ماسێ بوویه ناحیه،لێ هه‌ر ژ دامه‌زراندنا ڤێ ناحیێ هه‌تاكو نوكه ناڤ بۆ كۆلان و تاخ و جاده‌یێن سه‌نته‌رێ ڤێ ناحیێ نه هاتینه دانان،لێ بریاره ل ڤان نێزیكان ناڤ بۆ هه‌موو تاخ و كولانێن سه‌نته‌رێ ناحیا كانى ماسێ ل گه‌ل كومه‌لگه‌ها بریفكا بهێنه دانان،كانى ماسێ ل سالا 1928 بوویه ناحیه و سه‌ر ب قه‌زا ئامێدیێ ڤه‌یه.
سه‌رۆكێ لیژنا دانانا ناڤا بۆ كولان و تاخ و جاده‌یێن ناحیا كانى ماسێ و كومه‌لگه‌ها بریفكا كامیران محه‌مه‌د بۆ ئه‌ڤرۆ نیۆز دبێژیت:نڤێسیه‌ك ژ قه‌زا ئامێدیێ بۆ مه هاتیه بۆ دانانا ناڤێن كولان و تاخ و جاده‌یان ل سه‌نته‌رێ ناحیا كانى ماسێ و كولگه‌هێن سه‌ر ب ناحیێ ڤه،له‌ورا مه ژى لیژنه‌یه‌كا 4 كه‌سى پێكئینایه كو ژ كریستیان و موسولمانان پێك دهێت،هه‌روه‌سا ل سه‌نته‌رێ ناحیا كانى ماسێ مه ناڤ ب زمانێ كوردى مه‌سیحى بۆ كولان و تاخ و جاده‌یان داناینه،لێ ل كومه‌لگه‌ها بریفكا ناڤ هه‌موو ب كوردى هاتینه دانان.
ناڤهاتى هێشتا دیاركر:ئه‌ڤه ئێكه‌م جاره ناڤ دێ بۆ هه‌موو تاخ و كولان و جاده‌یان ل سه‌نته‌رێ ناحیا كانى ماسێ و كومه‌لگه‌ها بریفكا هێنه دانان،له‌ورا پشتى كو مه وه‌كو لیژنه ناڤ بۆ هه‌موو تاخ و كولان و جاده‌یان داناین ل ڤان نێزیكان دێ تابلۆیان بۆ هه‌موویان دورست كه‌ین و ل ڤان نێزیكان دێ دانین و ژ ئه‌ڤرۆ پێڤه ئه‌و تاخ و كولان و جاده ب وان ناڤان دێ هێنه نیاسین.