نایف سەیدۆ: چو دەستھەلات ل سنوونێ د دەستێ حەشدا شەعبی دا نەمایە
ئه‌ڤرۆ نيوز:
رێڤەبەرێ ناحیا سنوونێ دیار کر کو چو دەستھەلات د دەستێ حەشدا شەعبی دا ل سنوونێ نەمایە، نوکە بتنێ پۆلیسێن فیدرال دەڤەرێ دپارێزن و ئیدارا پارێزگەھا مووسل ژی سەرەدەریێ دگەل ئیدارا شەرعی یا سنوونێ دکەت ئەوا بەری نوکە ل سنوونێ د ھاتەکرن نەمایە.
نایف سەیدۆ، رێڤەبەرێ ناحیا سنوونێ بۆ رۆژناما ئەڤرۆ دیار کر کو رێڤەبەرێ نە شەرعی یێ حەشدا شەعبی بۆ ناحیا سنوونێ دانای ب تنێ نوکە ھەیکەل مایە و چو دەستھەلات د دەستی دا نەمایە بۆ ئیمزاکرنا نڤیسارێن فەرمی و گۆت: “نوکە نڤیسارێن رێڤەبەریا ئاڤێ و کارەبێ و باژێرڤانیێ ھەتا نەخۆشخانێ ژی نابیت بھێنە ئیمزاکرن ژ لایێ ئیدارا نەشەرعیی یا حەشدا شەعبی ڤە ل سنوونێ، چونکی ئیدارا پارێزگەھا مووسل دانپێدانی ب ئێمزا و نڤیسارێن وان ناکەت، بتنێ نوکە ل سنوونێ نڤیسار ژ لایێ ئیدارا شەرعی یا سنوونێ ڤە دھێنە ئێمزا کرن”.
ناڤھاتی ئاماژە دا وێ چەندێ کو ئەو ل کۆمەلگەھا دومیز یا سەر ب پارێزگەھا دھۆکێ ڤە دەوامێ دکەن و ھەر دەمێ دامودەزگەھێن حکومی ل سنوونێ پێدڤی ب ئیمزایا ناحیێ بن بۆ پارێزگەھا مووسل قەستا وان دکەن و ئەو کاروبارێن وان ب رێڤەدبەن و ھەموو نڤیسارێن فەرمێ ئیمزا دکەن و گۆت: “ئیدارا پارێزگەھا مووسل ب چو شێوەیان نوکە وان نڤیساران ب رێڤەنابەت یێن ژ لایێ ئیدارا نەشەرعیی یا سنوونێ ڤە دھێنە بلندکرن بۆ مووسل، ب ھەر شیوەیێ ھەبیت پێدڤیە ئێدارا شەرعیی یا سنوونێ ئێمزا بکەت و پاشی مووسل ب رێڤەببەت”.
ل دووماھیێ رێڤەبەرێ ناحیا سنوونێ خویا کر کو ئەو خەلکێ ڤەگەڕیاینە سنوونێ گەلەک جاران داخواز ژ وان کریە پێشمەرگە ڤەگەڕیتە دەڤەرێ و ئیدارا ھەڤپشک بھێتە دروستکرن و گۆت: “ئەم چاڤەرێ بڕیارا حوکمەتا ھەرێما کوردستانێ نە بۆ ڤەگەراندنا ھێزێن پێشمەرگەی بۆ سنوونێ”.
