نزار بابێ هەردەمی: هونەر نانی نادەتە هونەرمەندی
زاخۆ، دلۆڤان هالۆ:
هونەرمەندێ سترانێن فولکلۆری یێ ئیدارا سەربخوە یا زاخۆ نزار بابێ هەردەمی د دیدارەکا هونەری دا بۆ ڕۆژناما ئەڤرۆ دیارکر کو ل دەستپێکا خوە یا هونەری من حەز ژ سترانێن فولکلۆری کرینە و تا نوکە ژی هەر ل سەر شێوازێ خوە یێ گۆتنا سترانێن فولکلوری بەردەوامم، و من چەندین سترانێن فۆلکلوری یێن تۆمارکری هەنە کو هندەك ژ وان بووینە ڤیدیۆ کلیپ و ل کەنالێن نافخۆیی و ئاسمانی بەلاڤ بووینە، زێدەباری بەلاڤکرنا وان ل تۆڕێن جڤاکی.
ناڤهاتی ئاماژە ب وێ چەندێ ژی کر کو هەر هونەرمەندەکێ شێوازێ خوە یێ تایبەت هەیە کو هونەرمەند هەیە وەکو من بتنێ گرێدایە ب سترانێن فۆلکلوری ڤە، و هونەرمەند هەنە تایبەتن ب گۆتنا سترانێن هەڤچەرخ یان سترانێن ڕاپ، لەوما یا پێدڤیە هەر هونەرمەندەکێ شێوازێ خوە یێ تایبەت هەبیت و یێ بەردەوام بیت ل سەر وی شێوازی نەکو شێوازێ خوە یێ هونەری جار جاران بگۆهۆڕیت، سەرکەفتن ئەوە مرۆڤ بەردەوام بیت ل سەر شێوازێ خوە یێ تایبەت.
گۆت ژی:»ب شێوەیەکێ گشتی هونەر نانی نادەتە هونەرمەندی چونکی چ هاریکاریا ماددی یا باش بۆ هونەرمەندان نینە، بتنێ ب هیڤیا داهاتێ ئاهەنگەکێ نە کو هەیڤێ جارەکە، ب تایبەت ئەم وەکو هونەرمەندێن فولکلوری یێن کۆچك و دیوانان نەشێن وەك هونەمەندێن دی ژی بچینە شەهیانان داهاتەك بۆ مە ژێ بهێت، بتنێ ئەم دچینە ڕۆژێن تل خەنایێ و ئاهەنگان لێ ئەو ژی هەیڤێ چەند جارەکێن کێمن».
