نزار دووباره بۆ راهێنه‌رێ یانا هه‌ولێرێ
ئه‌ڤرۆ، زنار زوبێر:
كارگێریا یانا هه‌ولێر ب فه‌رمی نزار مه‌حرووس وه‌كو راهێنه‌رێ تیما خوه یا ته‌پا پێی ده‌ستنیشانكر ژبۆ بڕێڤه‌برنا تیما وان بۆ یاریێن مایی ژ هه‌ڤڕكیێن خولا پلا نایابا ئیراقێ.
لدووڤ ژێده‌رێن راگه‌هاندنێ ل هه‌ولێرا پایته‌خت كو یانا هه‌ولێرێ ب فه‌رمی ل گه‌ل راهێنه‌رێ سوری نزار مه‌حرووس رێكه‌فتینه بۆ ماوێ دو وه‌رزان سه‌رپه‌رشتیا هونه‌ری یا تیما ته‌پا پێی بكه‌ت و ل گه‌ل دا سائد سویدائی وه‌كو هاریكار و هه‌روه‌سان راهێنه‌رێ كوڕد دلشاد ئه‌حمه‌د وه‌كو هاریكارێ دویێ یێ راهێنه‌ری و سامر رێحانی راهێنه‌رێ گۆلپارێزان و پشتی یاریا بهێت یا رۆژا سێ شه‌مبی ل گه‌ل یانا سیناعه ژ خولائیراقێ دێ گه‌هیته هه‌ولێرا پایته‌خت ژبۆ ده‌ست ب كاربوونا خوه و رێو ره‌سمێن ئیمزاكرنێ.
بۆ زانین نزار مه‌حرووس ل وه‌رزێ 2011/ 2012 راهێنه‌رێ تیما یانا هه‌ولێرێ بو و شیابوون ناسناڤێ خولا پلا نایابا ئیراقێ ب ده‌ستڤه بینن و د قاره‌مانیا ئاسیا دا تیما پایته‌ختی گه‌هاندبوو یاریا دووماهیێ ل گه‌ل یانا كوێت یا كوێتی تووشی خوساره‌تیێ بوویی.
