نزار مه‌حرۆس بۆ راهێنه‌رێ زاخۆ
ئەڤرۆ
زاخۆ، عەلی حاجی:
ژێده‌ره‌كێ باوەرپێکری ل یانه‌یا زاخۆ یا وەرزشی دا بۆ رۆژناما ئەڤرۆ دیار کر کارگێریا یانێ راهێنەر حەیدەر عەبدولئەمیر دوورئێخستیە و ل جهێ وی راهێنه‌رێ سۆری نزار مه‌حرۆس هاتیه دانان ژبۆ برێڤه‌برنا یاریێن مایی ژ خولا پلا نایابا ئیراقێ یا ته‌پا پێی.
هەر وی ژێدەری دیار کر ژی پشتی خوسارەتیا شەشێ ل دووڤ ئێک د خولا ئیراقێ دا بەرانبەر کەربەلا کارگێریا یانێ گەهشتبوو وێ باوەرێ راهێنەرێ خوە حەیدەر عەبدولئەمیر دووربێخیت و داخواز ژێ هاته كرن دەست ژ کار بکێشیت و پشتی چه‌ندین دووڤچوون و دانۆستاندنان بریار هاته دان ل جهێ وی راهێنه‌رێ سۆری نزار مه‌حرۆس بهێته دانان ژبه‌ركو رەوشا یانێ ژ روویێ ئەنجامان یا خرابە و جەماوەرێ یانێ ژی ژ ڤان ئەنجامان رازی نینە،ب گورەیی باوەریا کارگێریا یانێ ژی ئەو یاریزانێن دناڤ تیما زاخۆ دا ژ هەژی هندێ نینن ل رێزبەندیا ١٦ بن ژبەر کو یاریزانێن باش ناڤ تیمێ دا هەنە ژ هەژی رێزبەندیەکا باشترن.
هه‌روه‌سا گۆت ژی: سوری نزاز مەحروز ژ هەر راهێنەرەکێ دی پتر نێزیکی زاخۆیە و د ڤی بارودوخی دا ئەو ب راهێنەرەکێ گونجایی دبینن دا کو بشێت د یاریێن بهێت دا تیمێ ژ ڤێ رەوشا ب زەحمەت رزگار بکەت و ئاستێ یاریزانێن زاخۆ ڤەگەرینتە ڤە و تیم بەر ب قۆناغێن پێشڤە بچیت .
بۆ زانین پشتی یاریا زاخۆ دگه‌ل كه‌ربلا ب دووماهی هاتی ژبه‌ر خوساره‌تیا تیمێ كارگێریا یانێ بڕیار دابوو هه‌ر یاریزانه‌ك ب 20% وه‌كو سزا ل سه‌ر مووچه‌یێ وان بهێته كێمكرن.
