نزا بۆچی ژ ملله‌تی دترسن؟
ده‌مێ هه‌ر ئالۆزیه‌كا سیاسی ل ده‌وله‌تێت جیهانێ یێت پێشكه‌فتی چێ دبیت، په‌ڕله‌مان و ئه‌نجوومه‌نا وه‌زیران نه‌شێن چاره بكه‌ن، ئه‌و حوكمه‌ت یان دامه‌زرایێت سیاسی ل وێ ده‌وله‌تێ د زڤڕنه ناڤ ملله‌تی دا پرسا خۆ پێ بكه‌ن و ڕایا وی ب ئه‌نجامدانا ریفڕاندۆمه‌كا بله‌ز بزانن و بڕیارێ لسه‌ر وێ گرفتاریێ وه‌ربگرن، چه‌ندین نموونێت زیندی د وی واریدا لبه‌ر چاڤن، یا ژ هه‌میان نویتر، ئه‌و بوو ده‌مێ ل ڤێ داویێ ده‌وله‌تا (یۆنان) كه‌فتیه د قه‌یرانه‌كا ئابووریدا و حوكمه‌تا وێ ده‌وله‌تێ نه‌شیای وێ قه‌یرانێ چاره‌سه‌ر بكه‌ت، ملله‌تێ یۆنانێ وه‌سا د دیت كو هه‌بوونا وان د ناڤ ناوچه‌یا (یۆرۆ) یدا سه‌ده‌ما وێ ته‌نگاڤیا ئابووریه، له‌وما حوكمه‌تێ ریفراندۆمه‌ك ئه‌نجام دا، ئایا (یۆنان) وه‌ك ده‌وله‌ت د ناڤ ده‌ڤه‌را (یۆرۆ) یدا بمینیت یان نه؟ و د ئه‌نجامدا بارا پتر ژ ملله‌تێ وێ ده‌وله‌تێ وه‌سا دیت، ئه‌و د ناڤ ده‌ڤه‌را یۆرۆیدا نه‌مینن و حوكمه‌تا وی وه‌لاتی ژی ئه‌و بڕیار په‌سه‌ند كر، ئه‌ڤه نموونه‌یه‌كا ساناهی و نێزیك بوو بۆ وه‌رگرتنا رایا ملله‌تی ب ئاوایه‌كێ شارستانی و چه‌ندین نموونێت دی ژی یێت هه‌ین یێت دویر و نێزیك لسه‌ر وێ مژارێ. له‌وما د بێژم ئه‌و ئاڕێشا سیاسیا نها ل كوردستانی هه‌ی، چاره‌كرنا وێ گه‌له‌ك یا بساناهی یه ئه‌گه‌ر مه‌به‌ستێت خراب ل دوی نه‌بن، بلا ژڤانه‌ك بۆ وه‌رگرتنا رایا ملله‌تی بێته دانان بۆ چه‌ند مه‌هه‌كا، دا كۆمیسیۆنا هه‌لبژارتنا ل كوردستانێ بگه‌هیت كارێ خۆ بكه‌ت و ریفراندۆمێ ئه‌نجام بده‌ت، ئه‌م دێ وی ده‌می زانین، ئه‌رێ گه‌لێ كوردستانێ سیسته‌مێ په‌ڕله‌مانی یان یێ ئێكسه‌ڕه ژ ملله‌تی بۆ هه‌لبژارتنا سه‌رۆكێ هه‌رێمێ دڤێت؟ وی ده‌می كه‌س نه‌شێت دژی حه‌زا ملله‌تی راوه‌ستیت، لێ مخابن وه‌سا دیاره هنده لایه‌ن خۆ د داننه جهێ ملله‌تی و پێش وی ڤه بڕیارێ د ده‌ن. دڤێت ئه‌م بزانین ملله‌ت ژ هه‌می حزبان بلندتر و مه‌زنتره، ئه‌ندامێت په‌ڕله‌مانی ژی نوینه‌رێت حزبێت خۆنه پتر ژ هندێ كو نوینه‌رێت ملله‌تی بن و ته‌خێت مه‌زن ژ ملله‌تی د ناڤ چو حزباندا نینن و ملله‌تی ده‌نگێ خۆ یێ دایه وان نوینه‌ران بۆ خزمه‌تكرنا وان ب رێیا یاسادانانێ و به‌ڕه‌ڤانیكرنێ ژ وان و ل ده‌مێ خۆ كه‌سێ نه گۆتیه ملله‌تی ئه‌ڤ نوینه‌ره دێ سه‌رۆكێ هه‌رێمێ هه‌لبژێرن!! ئه‌گه‌ر نوكه وان نوینه‌ران راسپێرن دا سه‌رۆكێ هه‌رێمێ هه‌لبژێرن، ئه‌ڤه جۆره‌كێ خیانه‌تكاریێ یه د گه‌ل ملله‌تی، چنكی ئه‌ڤ چه‌نده لسه‌ر ده‌مێ خۆ نه هاتیه راگه‌هاندن. ژ بلی هندێ د ڤێت ئه‌م بزانین كو هه‌لبژارتنا وی سه‌رۆكی ژ لایێ ئه‌ندامێت په‌ڕله‌مانیڤه، دێ ئه‌و سه‌رۆك سه‌رۆكه‌كێ لاواز و بێ ده‌سهه‌لات بیت وه‌كی سه‌رۆكێ ئیراقێ بۆ نموونه، ده‌وله‌تێت هه‌ڤسۆیێت مه ژی وه‌كی توركیا و ئیرانێ سه‌رۆك ب رێیا ملله‌تی تێته هه‌لبژارتن زێده‌باری ده‌وله‌تێت زلهێز وه‌كی ئه‌مریكا و فه‌ره‌نسا بۆ نموونه، لێ نزا بۆچی هنده‌ك حزبێت مه هه‌تا نوكه ژی ژ ملله‌تی د ترسن و نه‌ڤێت د گه‌ل ملله‌تی روی ب روی ببن؟ بلا هه‌لبژارتن ب رێیا ملله‌تی بن و بلا هه‌ر كه‌سه‌كی ئه‌و ئازادی هه‌بیت، خۆ بۆ سه‌رۆكاتیێ به‌ربژێر بكه‌ت. دوور نینه وه‌سا چێببیت هنده‌ك كه‌سێت بێ لایه‌ن خۆ به‌ربژێر بكه‌ن، ئانه‌كو نه لسه‌ر لیستێت چو حزبا. هیڤیدارین رێ ل خه‌لكێ كوردستانی نه ئێته گرتن بۆ ده‌ربڕینا حه‌زا خۆ بۆ هه‌لبژارتنا سه‌رۆكێ خۆ.
