نـان و رەمـەزان
غیاس خـالد زێباری
نان دان ئانكۆ تێركرنا مرۆڤەكی یان گیاندارەكی كریارەكا مەزنا مرۆڤایەتیێ یە و د ئایینێن ئاسمانی ژی دا ب كارەكێ زۆرێ باش دهێتە هژمارتن و ئەوێ وی نانی ددەت دبیتە خۆدان خێرێن مەزن، ب تایبەت ئایینێ ئیسلامێ گرنگیەكا زۆر دایە تێركرنا خەلكەكی نەخاسمە ل مەها رەمەزانا پیرۆز.
د ناڤ جڤاكێ كوردستانێ ژی دا دانا خوارنێ ب تایبەت خارنێن گەرم بۆ دەر و جیرانان كولتۆرەكێ كەڤنە و هەتا نهۆ یێ بەردەوامە، ئەگەر پسیارێ ل دایك و داپیرێن خوە بكەین، ئەرێ چ شەڤە ئەینی بوورینە تە خوارنا گەرم بۆ جیرانان نەبربیت؟ یان چ رۆژێن پاتنا نانێ تەنوورێ ل سەر تە بوورینە، تە چەندین نانێن گەرم ( سەوك) نەكربنە خێر ..؟ نە تنێ بەرسڤ نەخێرە بەلكی بێ دانا وان ب حەفكا وانڕا نە دچوو خار، ئانكۆ بەری ئەو تام بكەن ب ئەركەكێ ئایینی و جڤاكی زانییە پشكەكێ بكەنە خێر و سەدەقە.
رەوشا ئەڤرۆ یا ئابووری ئەوا ژلایێ نەیارێن كورد و كوردستانیا ب پیلان و بەرنامە هاتیە دانان كاریگەریەكا نەرێنی ل سەر جڤاكێ كوردستانێ كریە و رێژا هەژاریێ و كەسێن پێدڤی زێدەكریە، لەوما زۆرا گرنگ و فەرە كەس و ئالیێن كوردستانی ئەوا د شیاندا بیت بۆ خەلكێ هەژار و پێدڤیێن كوردستانێ بكەت بۆ ل سەر سڤككرنا ڤێ رەوشا ئابووری، ب تایبەت ل ڤێ مەها رەمەزانا پیرۆز، چونكی د ڤێ هەیڤێ دا بارێ خەلكی گرانتر دبیت و بهایێ خێرێ ژی زێدەتر دبیت . جهێ دلخۆشیێ یە ل ڤان سالێن داویێ كۆمكرنا هاریكاریان بۆ خەلكێ هەژار ل هەرێما كوردستانێ یا دبیتە دیاردە و بەرەڤ زێدەبوونێ دایە، لێ جهێ مخابنیێ یە هندەك كەنال و سۆشیال مەدیایێن ئاراستەكری ل كوردستانێ ب چاڤەكێ كێم بەرێ خوە دایە پرۆژەیەكێ خێرخوازیێ پارتی دیموكراتی كوردستان، ئەو ژی پرۆژێ دابینكرنا نانێ فرنیا یە بۆ خەلكی بێ بەرامبەر د هەیڤا رەمەزانا پیرۆز دا ژبلی چەندین گاڤێن دیتر یێن خێر خوازی.
ڤێ دەستپێشخەریا پارتی كۆ رۆژانە دلێ دەهان هزار خێزانان خۆش دكەت و خەلكەكێ نە مفا دار ژی بڤان هاریكاریان دلخوەش دبن و د خازن بەردەوام و بەرفرەهتر بن، پارتی ژی بڤێ چەندە ئەرك و بەرپرسیاریەتیەكا ئایینی و مرۆڤایەتی بجهــ ئینایە و كولتۆر و داب و نەریتەكێ كەڤن و جوانێ كوردستانێ ژی پاراست كو دانا نانێ گەرمە ب خەلكی، خەلك ژی راستی و پرۆپاگندەیان ژێكجودا دكەت.
