نهێنيێن ياريا به‌رشه‌لۆنا و بايرين ميونخ ل ڤێره بخوينه
ئەڤرۆ:
بۆ جارا ئێکێ جوسێپ گواردیولا راھێنەرێ یانا بایرن میونخ یا ئەلمانی دێ ھەڤرکیا یانا خوە یا بەرێ بەرشەلونە کەت د گوپیتکا یاریێن ئێکێ یێن قوناغا پێش دووماھیا قارەمانیا یانێن ئوروپا قارەمانێن خولان ئەف شەڤە ل دەمژمێر ٩:٤٥ ل یاریگەھا کاب نوو.
گواردیولا ئەوێ ب سەرکەفتیترین راھێنەر د دیروکا یانا کاتالونی دا ھاتیە نیاسین و چاردە ناسناڤ بۆ ب دەستڤە ئیناین دێ ل ھەمبەر ھەڤالێ خوە یێ بەرێ لویس ئێنریکی راھێنەرێ بەشەلونە و ھژمارەکا یاریکەرێن ل سەر دەمێ وی مینا لیونێل میسی و ئەندریاس ئەنیستا و چاڤی و بوسکیتس و جیرارد پێکیە و بێدرو رودرێگز ھەڤرکیێ کەت.
یانا بەرشەلونە نوکە یا د دەمەکێ ئاشوپی دا دژیت کو ٢٦ سەرکەفتن د ٢٨ یاریان دا ل قارەمانیێن جودا تومارکرینە و د ١٦ یاریێن ڤێ دووماھیێ دا خوسارەت نەبویە و یا بەرھەڤە دەستکەفتەکا دی یا سیانی وەکو سەردەمێ گواردیولای ب دەستڤە بینت ئەوژی ناسناڤێ قارەمانیا ئوروپا قارەمانێن خولان و کاسا شاھێ ئسپانیا و ناسناڤێ خولا ئسپانیا ژی.
یانا بەرشەلونە د ڤێ یاریێ دا دێ بزاڤێ کەت تولێن پێش دووماھیا سالا ٢٠١٣ ڤەکەت ل وی دەمی تیتو فیلانوڤا راھێنەرێ وێ و ب مەزنتری خوسارەتی د ڤێ قارەمانیێ دا ھاتیە ھژمارتن و ئەڤە دبیتە جارا یازدێ بەرشەلونە یاریان ل ڤێ قوناغێ و یا حەفتێ یە د ھەشت دووماھی وەرزان دا دکەت و بەرامبەر بایرن جارا چارێ یە د مێویا وێ دا.
یانا کاتالونی دێ پشتبەستنا وێ ل سەر ستێرا وێ باشترین یاریکەرێ جیھانێ چار جاران و خودانێ ٥١ گولان ل ڤی وەرزی بیت، ل گەل ھێزا ھەڤالێ وی یێ بەرازیلی نیمار دا سێلڤا خودانێ سێ گۆلان ل قوناغا بوری، زێدەباری یێ ئوروگوای لویس سوارێز و ئەنیستا ئەوێ دوبارە ڤەگەریایە ئاستێ خوە یێ جاران و بو ڤێ یاریێ یاریکەرێ دووماھیێ خویاکریە وان شارەزایەکا باش ل سەر ئێک دوو یا ھەی بو ماوەکێ درێژە و سەرکەفتن دێ یا دلخوشکەر بیت.
ل بەرامبەر یانا بایرن میونخ و راھێنەرێ وێ گواردیولا ژ بەر نە پشکداریا ھژمارەکا یاریکەران د نالن چونکو ستێرێن وێ یێن خودان شیان و ب ناڤ و دەنگ یێ ھولەندی ئاریان روبن و یێ فرەنسی فرانک ریبیری، زێدەباری یێ نەمساوی داڤێد ئالبا شکداریێ ناکەن و د گەل دا بەرەڤان ھولگر بادشتوبر ب ئەگەرا ھنگافتنێ، لێ یاریکەرێ ھێلا ناڤین توماس مولەر خودانێ سێ گۆلێن چارێک دووماھیا ٢٠١٣ یێ ب ئومێدە ئەنجامێن باش یێن یانا وی ڤەگەرن و ئەزمونا خوشا وێ سالێ دوبارەبیت و زێدەتر مولەر دبێژیت: راھێنەرێ مە ژ ھەر کەسەکی باشتر یانا بەرشەلونە د نیاسیت دێ نەخشێ سەرکەفتنێ دەتە مە و یادی بو یاریکەران دمینت.
ژلایەکێ دوڤە ھاتیە دوپاتکرن کو ھێرشبەرێ پولەندی روبرت لیڤاندوڤسکی باشترین یاریکەر ل ناڤا پێکھاتیێ یانا ئەلمانی و خودانێ ٢٣ گۆلان ل ڤی وەرزی دێ یێ بەرھەڤبیت بو ڤێ یاریێ و ماسک ل بەر چاڤان بیت ب ئەگەرا شکەستنا دفنا وی د یاریا ھەمبەر بروسیا دورتموند دا ل یاریا پێش دووماھیا کاسا ئەلمانیا و دیسان یاریکەرێ ھێلا ناڤینا یانا ئەلمانی خافی مارتینز ئەوێ بەری ھەیڤەکێ ژ ھنگافتنێ ڤەگەریای دیارکریە بەرشەلونە ب ھێزترین یانەیە ل جیھانێ لێ باوەریەکا تمام ب یانا خوە ھەیە و نا ترسن و دلێ وان یێ مەزنە.
ل دووماھیێ راھێنەرێ بایرن میونخ مانوێل نویر خویاکریە وەکو ل کاسا جیھانێ ھاتیە پێش ئەو دێ بزاڤێ کەت میسی ژ تومارکرنا گولان بێ بارکەت.
