نه‌ته‌وه‌یێن ئێكگرتی:ژ بلی چاره‌سه‌ریا سیاسی چو رێیێن دی ل پێشیا سووریێ نینن
ئه‌ڤرۆ:
نوونه‌رێ تایبه‌ت یێ نه‌ته‌وه‌یێن ئێكگرتی بۆ چاره‌سه‌ریا قه‌یرانا سووریێ راگه‌هاند كو ره‌وشا نها ل سووریێ گه‌له‌ك خرابه و ب شه‌ری قه‌یرانا سووریێ ناهێته چاره‌سه‌ركرن و ژ بلی چاره‌سه‌ریا سیاسی چو رێیێن دی ل پێشیا سووریێ نینن.
گیر پێده‌رسۆن نوونه‌رێ تایبه‌ت یێ نه‌ته‌وه‌یێن ئێكگرتی بۆ چاره‌سه‌ریا قه‌یرانا سووریێ راگه‌هاند كو وان ده‌ست ب قۆناغه‌كا نوو بۆ چاره‌سه‌ریا قه‌یرانا سووریێ كرینه، به‌ری نها ئه‌و ل گه‌ل به‌رپرسێن سووریێ ل شامێ كۆمبوویه و هه‌روه‌سا كۆمبوونا وی ل گه‌ل ئالیێن ئۆپۆزسیۆنێ ژی ب ره‌نگه‌كێ ئه‌رێنێ برێڤه چوویه لێ دڤێت رژێما سووریێ هه‌لوه‌ستێ خوه ل هه‌مبه‌ر ره‌وشا نها بگوهۆڕیت و گۆت: (هێشتا هنده‌ك ژ به‌رپرسێن شامێ وه‌سا هزر دكه‌ن كو دێ شێن وه‌كو به‌ری سالا ٢٠١١ حوكمێ ل سووریێ بكه‌ن، ئه‌و ل دژی هندێ نه كو دستووره‌ك نوو بۆ سووریێ بهێته ئاماده‌كرن و وان دڤێت ب رێیا شه‌ری جاره‌كا دی هه‌موو ئاخا سووریێ بكه‌نه ژێر كۆنترۆلا خوه، ئه‌و یه‌ك گه‌له‌ك شاشه چونكو ره‌وشه‌كا نوو ل سووریێ هاتیه پێش و پێدڤیا سووریێ ب گه‌له‌ك گوهۆرینان هه‌یه، دڤێت دستووره‌ك نوو بۆ سووریێ بهێته ئاماده‌كرن و دستوور ببیته ژێده‌ریێ چاره‌سه‌ریا قه‌یرانا سووریێ، لێ مخابن هه‌لوه‌ستێ هنده‌ك ژ به‌رپرسێن شامێ ل دۆر چاره‌سه‌ریا سیاسی گه‌له‌ك خرابه و ئه‌و یه‌ك ژی دێ ئه‌نجامێن خوه یێن گه‌له‌ك خراب بۆ پاشه‌رۆژا سووریێ هه‌بن).
نوونه‌رێ تایبه‌ت یێ نه‌ته‌وه‌یێن ئێكگرتی بۆ چاره‌سه‌ركرنا قه‌یرنا سووریێ ئه‌و یه‌ك ژی دیار كر كو به‌ری نها ژی مه گه‌له‌ك جاران دیار كریه كو ژ به‌ر شه‌رێ ١١ سالێن بۆری زیانێن گه‌له‌ك مه‌زن گه‌هشتینه سووریێ، چه‌ند ملیۆن وه‌لاتی ئاواره و په‌نابه‌ر بووینه، ژ به‌ر ئالۆزیێن ل سووریێ گرۆپێن تیرۆرستی ژی شیان پێگه‌هێ خوه بهێز بكه‌ن، هه‌كه جاره‌كا دی شاشیێن سالێن بۆری بهێنه دوباره‌كرن ئه‌و یه‌ك دێ جاره‌كا دی رێ بۆ بهێزبوونا تیرۆرستان خوه‌ش كه‌ت، ژ به‌ر هندێ ژی گرنگه به‌رپرسێن سووریێ هه‌ست ب به‌رپرسیاریا خوه یا دیرۆكی ل هه‌مبه‌ر گه‌ل و وه‌لاتێ خوه بكه‌ن و ژ بۆ چاره‌سه‌ریا سیاسی ل سووریێ هاریكاریا مه بكه‌ن و گۆت: (ڤێ مه‌هێ دێ جاره‌كا دی لیژنا دستووری یا سووریێ ل جنێڤێ كۆمبیت، ئه‌و یه‌ك پێنگاڤه‌ك گه‌له‌ك باشه و ئه‌م پشته‌ڤانیێ ل كارێن وێ لیژنێ دكه‌ین، لێ د هه‌مان ده‌می دا ئه‌م داخواز ژ شامێ و هه‌موو ئالیێن دی ژی دكه‌ین كو ئاسته‌نگیان ل هه‌مبه‌ر كار و خه‌باتا لیژنا دستووری دروست نه‌كه‌ن، چونكو پێدڤیا سووریێ ب دستووره‌كێ نوو و دیموكراتی هه‌یه، پێكهاتێن ل سووریێ ژی دخوازن د چارچۆڤێ سووریایه‌ك نوو و دیموكراتی دا ل گه‌ل شامێ پێكڤه بژین، دستوورێ نوو دێ شێت بیته ژێده‌رێ چاره‌سه‌ریا گه‌له‌ك ئاریشێن نها ل سووریێ، ژ به‌ر هندێ ژی دڤێت ئه‌مریكا، رۆسیا، توركیا و هه‌موو وه‌لاتێن دی هاریكاریا مه بكه‌ن).
ناڤهاتی د دووماهیا ئاخڤتنا خوه دا ئه‌و یه‌ك ژی نه‌ڤه‌شارت كو هه‌كه ب رێیا دستوورێ نوو یێ سووریێ كار بۆ چاره‌سه‌ریا قه‌یرانا وی وه‌لاتی نه‌هێته كرن و هه‌لوه‌ستێ شامێ ژی وه‌كو نها بیت ره‌نگه روودانێن گه‌له‌ك خراب ل سووریێ روو بده‌ن، وی ده‌می دێ كاره‌ساتێن گه‌له‌ك مه‌زنتر ژ نها روو ده‌ن، ژ به‌ر هندێ ژی ئه‌م د رژدین كو دڤێت قه‌یرانا نها یا سووریێ ب رێیێن سیاسی بهێته چاره‌سه‌ركرن و هه‌موو بزاڤێن مه بۆ چاره‌سه‌ریێ ژی د به‌رده‌وامن.
