نه‌ته‌وه‌یێن ئێكگرتی: هه‌لبژارتنێن لیبیا بۆ پاشه‌رۆژا وی وه‌لاتی گرنگن
ئه‌ڤرۆ:
نوونه‌رێ تایبه‌ت یێ سكرتێرێ گشتی یێ نه‌ته‌وه‌یێن ئێكگرتی بۆ كاروبارێن لیبیا راگه‌هاند كو هه‌لبژارتنێن دووماهیا ئه‌ڤساله یێن لیبیا بۆ پاشه‌رۆژا وی وه‌لاتی گه‌له‌ك گرنگن و دڤێت ب رێیا هه‌لبژارتنان و ئاڤاكرنا حوكمه‌ته‌كا نوو پرسێن نها ل لیبیا بهێنه چاره‌سه‌ركرن، لێ هه‌كه ب رێیا هه‌لبژارتنان ئالۆزیێن ل لیبیا نه‌هێنه چاره‌سه‌ركرن دێ لیبیا تووشی قه‌یرانه‌كا گه‌له‌ك مه‌زنتر ژ یا نها بیت و وی ده‌می ژی دێ چاره‌سه‌ری گه‌له‌ك یا ب زه‌حمه‌ت بیت.
جان كوبیس ئه‌و یه‌ك ژی دیار كر كو دووماهیا ئه‌ڤساله دێ ل لیبیا هه‌لبژارتن هێنه كرن، بێگومان دڤێت هه‌موو هێز و ئالیێن سیاسی یێن لیبیا كار بكه‌ن دا هه‌لبژارتن د ده‌مێ خوه دا برێڤه بچن، چونكو ب رێیا هه‌لبژارتنان و ئاڤاكرنا حوكمه‌ته‌كا نوو دێ گه‌له‌ك پرسێن نها یێن لیبیا هێنه چاره‌سه‌ركرن، لێ هه‌كه ره‌وش ئالۆزتر لێ بهێت و هه‌لبژارتن ژی نه‌هێنه كرن وی ده‌می دێ لیبیا تووشی قه‌یرانه‌كا گه‌له‌ك مه‌زن هێت و ره‌نگه شه‌رێ ناڤخوه‌یی ژی ل لیبیا دروست ببیت، ئه‌و یه‌ك ژی دێ وه‌سا كه‌ت كو لیبیا به‌ر ب پاشه‌رۆژه‌كا نه‌دیار ڤه بچیت.
ل دۆر هه‌بوونا هێزێن بیانی ل لیبیا ژی نوونه‌رێ تایبه‌ت یێ سكرتێرێ گشتی یێ نه‌ته‌وه‌یێن ئێكگرتی بۆ كاروبارێن لیبیا راگه‌هاند كو وان به‌ری نها چه‌ندین جاران دیار كرینه كو دڤێت هه‌موو هێزێن بیانی ژ لیبیا ده‌ركه‌ڤن، چونكو هه‌بوونا چه‌كدارێن بیانی ل لیبیا ئێكه ژ ئاریشێن گه‌له‌ك مه‌زن و گۆت: (هه‌بوونا گرۆپێن چه‌كدارێن بیانی بوویه ئه‌گه‌رێ هندێ ئالۆزیێن ل لیبیا نه‌هێنه چاره‌سه‌ركرن، دڤێت چه‌كدارێن بیانی ژ لیبیا ده‌ركه‌ڤن دا هێزێن و ئالیێن سیاسی ل لیبیا بشێن ب رێیا دانوستاندنان هه‌موو پرسێن هه‌ی چاره‌سه‌ر بكه‌ن، بێگومان هه‌بوونا هێزێن چه‌كدارێن بیانی ئاسته‌نگیێن مه‌زن ل هه‌مبه‌ر پرۆسێسا سیاسی ل لیبیا دروست دكه‌ت).
