نهجمهددین یوسڤى ژ پێشمهرگاتیێ تێر نابیت
ئهڤ مرۆڤێ دبێژنێ نهجمهددین یوسڤى یێ بوویه هێما، هێمایهكه هنده دێ بیته دیارده و پهند د ناڤ هزر و دهروونێ مللهتێ خوه دا، سیڤیێ وى هندهك ئاماژهیێن سهیر ژێ دپهشن، ل سالا 1941ێ یێ هاتیه دونیایێ، پشتى هینگێ ب بیست سالان یێ گههشتیه رێزێن شۆرهشا مهزنا ئیلۆنێ، پشتى هینگێ ب سالهكێ بوویه كادر و ب درێژاهیا سالان ب دههان پۆست و پێگه وهرگرتینه، چ جاران خوه دوورى سهنگهران نهدیتى یه، هێشتا پتر روودان د ژیێ وى یێ درێژ و پڕى تێكۆشان دا ههنه، ئهگهر پێشمهرگاتى قووناغ بن و ههر قووناغهكێ مێرچاكێن خوه ههبن ئهڤ مرۆڤه پێشمهرگێ ههموو قووناغانه و ناسنامهكه ژ كار و خهباتێ، ئهگهر ل ڤى تیۆرى بنێرین دێ خویا بیت كو ژیێ وى نێزیكى ههشتێ سالانه و دۆرێن شێست سالانه ئهڤ مرۆڤه د خهبات و تێكۆشانهكا بێ راوهستیان دایه، سالهكا ب تنێ ژ ژیێ وى بێى پێشمهرگاتى دهرباز نهبوویه، خولهكهكا ب تنێ ژى دوورى مللهت و وهلاتێ خوه نهبوویه، رهوشتهكێ بهرز و كهسایهتیهكا ئاڤا و پڕ ژ سنج و رهوشتێن بلند، ئایینپهروهرهكێ نهرم و ناڤین، د ئێك دهم دا خودێ نیاسى و مللهتپهروهرى و وهلاتپهروهرى و شۆرهشگێریێ بهرچاڤى رهخ و دۆرێن خوه دكهت.
مام نهجمهددین خودان پێگهههكێ رهوشتیێ بلند و ئایینپهروهرهكێ باوهردار و خودێ نیاس و مللهتپارێزه، د ڤى واری دا و بهرۆڤاژى ههمى بۆچوون و بیردۆزێن زانستى و سیاسى و جڤاكى رها سهلماند كو ئاسایى یه د ئێك دهم دا مرۆڤ خودانیاس و باوهردار و پێشمهرگه و خودان ژێیاتیهكا حزبى و نیشتیمان پهروهر بیت، نه حزبى بوون ههڤدژى نیشتیمان پهرهوهریێ بیت نه ژى باوهردارى دژى حهزژێكرنا خاك و وهلاتى بیت، نه ژى سۆزدارى یا ئایینى دژى گرێدانا مرۆڤى بیت ب ئاخ و پیرۆزى یێن مللهتیێ ڤه، بهرۆڤاژى وان تیۆرێن سیاسى یێن رێگر ل ههمبهر ڤان تێگههـ و چهمكێن هزرى داناین و هندهك ههڤبڕى هندهكان كرین، بهلكو ل چهند جهێن دى ههڤدژى ئێك هاتینه دانان ڤى مرۆڤى ههمى چهمك نێزیكى ههڤ كرن و رێككهفتنهكا پراكتیكى یا ل سهر ئهردى د ناڤبهرا وان دا دروست كر.
پشتى سالێن درێژ یێن ژیێ ڤى مرۆڤى د پێشمهرگاتیێ دا بۆراندین و پشتى گههشتیه پاییزا ژیێ خوه یێ دێرین ههر ئێك ژ مه ل وێ باوهریێ بوو كو دهمێ خانهنشینى و روونشتن و بێهنڤهدان و پالدانێ هات، لێ وهكى مه هزر كرى دهرنهكهت، ئهڤ مرۆڤه هێشتا یێ بهردهوامه و ژ پێشمهرگاتیێ تێر نابیت، حهزا وى بۆ كوردینیێ و كارێ رۆژانه ل سهر ئهردى تێر نهبوویه، ئهگهر ئهز نهشێم وهكى جاران برنۆیێ هلگرم و بزاڤێن لهشى تێرا من نهكهن گر و بهتهن و ژێههلییان ببڕم ئهز دشێم ل پشتا بهرۆكێن جهنگێ خوارن و پێدڤییان بگههینمه پێشمهرگهی، ئهز دشێم دناڤ هندهك خوهبهخشان دا ژ بهرۆكێن جهنگێ دوور نهكهڤم، ب وى لهشێ لاوازێ سالان كز و بێهێزكرى خوارنا پێشمهرگهیى ل سهر ملێ خوه دانم و تێهنا خوه یا پێشمهرگاتیێ بشكێنم. ل ڤى ژیێ مهزن هێشتا نهجمهددین یوسڤى پێشمهرگهیه و ژ بێهنا بارووتا تڤهنگێن پێشمهرگاتیێ تێر نهبوویه، حهز و هیڤییا وى ب دووماهى نههاتیه، هێشتا پێشمهرگهیه و هزرا رۆژێن گهنجاتیێ دكهت.
