نهخۆشیێن دوهی، بزاڤێن ئهڤرۆ، بهرههمێن سوبههی دارێژتنا نهخشێ دهولهتبونێ یه
گهلهكان ژمه ل بیره دهمێ بابێن مه دگوتن: خوهزی ب چاڤێن خوه مه ئالایێ كوردستانێ دیت بایه ب ئازادانه بههژیێت، مه پوَلیس و حوكمهتا خوه دیت بایه، خوهزی ئهم ب ئازادانه و ئارام ژیاباین، بلا پشتی هینگێ دوو رۆژ ژ تهمهنێ مه مابانه”.
خهون و خوهزیێن بابێن مه ب جه هاتن ئهم بووینه خوَدان ئالا و ل سهر ههموو دام و دهزگا و چیا و ههتا مال و بازران ژی دههژیێت، مه پوَلیسێن خوه ب ههموو جورانڤه (پوَلیسێن نافخۆیی، پوَلیسێن هاتن و چوونێ، دارستانێ.. هتد) ههنه، مه دیت ئهم ب ئازادانه دژین، دنڤێسین، دئاخڤین، ئارام دهێن ودچێن، دنڤین رادبین، گهریانان دكهین، ب شهڤ ل چوول و بهیاران دنڤین، ههتا سپێدێ بازارێن مه دڤهكرینه ل باژێرێن مه شهڤ وهكو رۆژێ لێ هاتینه، بێ زالگهه و پهیڤێن كرێت هاتن و چونێ دكهین، بێی ئێك ب زجرڤه پێناسا مه ژمه داخواز بكهت، لهشكهرێ مه پێشمهرگهیه ب زمانێ كوردی دئاخڤیت بهرهڤانیێ ژ مه دكهت و هێشتا ئهم دنهرازینه و خهلكهك ههیه داخوازا ژ ناڤ چوون دووباره زڤرین بۆ بن دهستییێ و تهپهرهسهریێ دكهن. ل ڤێره پرسیار ئهوه، ئهو كینه زهحمهت دیتیینه یان هاتینه سهر سفرهكا ئامادهكری و ههر دبێژن هێشتا؟
ئهز باوهر دكهم ههر كهسهكێ نهخوهشیێن دوهی شوَڕهشێن چیا و برس و تێهنی و سهرما و گهرما و بن شكهفت و تراش و بهر دیت بن، ئهو كهس درازینه و بهردهوام ئاموَژگاریا ل زارۆكێن خوه دكهن و سهربوَرا خوه وهكو چیرۆكهكا تراژیدی بۆ زارۆكێن خوه رۆژێ چهند جارهكان ڤهدگێرن و دهزرا وان دا وێنهیێ خوه یێ دوهی چێدكهن داكو ئهڤرۆ د ڤان دهلیڤێن بهرتهنگ دا ئهوژی بشێن خوه راگرن و بزانن مادهم باب و باپیر و دایك و برا و خووشك و گهلێ وی ئهو نهخوهشی ههموو ب درێژایا دههان سالان برینه، ل سهر وی ژی یه دان سالهكێ خوه راگریت و بهرگیریا هندهك كاودانان بكهت كو هێژ ئهو كاودان نه گهلهك بهرتهنگ و بن بهستن و ژیان هێژ گهلهك یا باشه.
ل بیرا مهیه، ل دهمێ حوكمهتا عێراقێ ئیدارێن خوه ڤهكێشاین ژ ههرێما كوردستانێ و مووچێن فهرمانبهرێن ههرێمێ بڕین، ههمان ئهڤ خهلكێ نهرازی نوكه بوو دهست دایه پرۆپاگندێ دژی دهستههلاتا كوردستانێ و گوتی ئهم ههموو دێ مرین ژبرسا و گهلهك ژلایهن و كهسهیهتیێن سیاسی بزاڤا ڤهگهریانا همبێزا حوكمهتا عێراقێ ود كتاتور صهدام حسێنی دكر، ناڤهشێرین هندهك خهلك چوونه بهغدا و مووسل، بهلێ خهلكێ نهخوهشی دیتن و خوهراگرت و دهست نهداهێلان و بزاڤا خوه ئاڤاكرنێ و برێڤهبرنێ كر. راسته بۆ دهمهكی مووچێن ههموو فهرمانبهران هاتنه پاش ئێخستن بهلێ ب هیمهتا دلسوَزێن كوردستانێ حوكمهت ل سهر پێن خوه راوهستیا و ههموو مووچه و قهرێن وهلاتیان ل جهم حوكمهتێ هاتنه دان، كاودانێن سیاسی و جڤاكی ههموو دبهرژهوهندا خهلكێ كوردستانێ دا شكهستن و بهرههموو وێ پشتی هینگێ دیار بوون، خهلكێ ههموویان گوتن: ڤهكێشانا دام و دهزگایێن حوكمهتا (مهركهزی) پێنگاڤهكا باش بوو هاتیه هاڤێژتن ژلایێ حوكمهتا عێراقێ ڤه. ههمان دیروَك ئهڤرۆكه یا خوهه دوباره دكهت، بهلێ ب سیناریوَیهكا دیتر، حوكمهتێ مووچێن فهرمانبهرێن كوردستانێ بڕین، بهلێ ئهم شیایێن سهربهخوَیا دارایی راگههینینن و پهتروَلا خوه بفروَشین، حوكمهتا عێراقێ ب ههموو شیانێن خوه بزاڤێ دكهت كوردان لاواز بكهت و ههموو كارتێن خوه ب كارئیناینه و بتنێ كارتا دووماهیێ ئهڤه بوو بڕینا مووچێن فهمانبهران وبۆدجا ههرێما كوردستانێ. لهورا دڤێت ئهم ههموو پێكڤه بزاڤێ بكهین چاوان ئهم ب ئێك دهست ل سهر قهیران و كاودانێن بهرێ زالبووین و مه گهمیا خوه گههاندیه كهنارێ ئارام، ههر ب وێ زاخێ دڤێت بزاڤێ بكهین و ئارامیێ و دل نهوایێ ل جهم نفشێ نوو پهیدا بكهین، ههر چهنده نوكه هندهك لایهنێن سیاسی و كهسایهتێن سیاسی و هندهك خهلكێ گشتی یێ بهرۆڤاژی ڤێ چهندێ دكهن و بهردهوام بزاڤا تێكدانا ئاسایشا جڤاكی و نهتهوهیی دكهن و دوو دلیێ ل جهم خهلكێ پهیدا دكهن و وهسان تێدگههینن كو خهلكێ كوردستانێ دێ مریت ژبرسا، ژیان دێ راوستیت وهسان ددهنه خویاكرن كاربهدهست و خهلكێ كوردستانێ ههموو گهندهل و دزن و چ ئومێدێن چارهسهركرنا كێشێن دارایی نینن، بزاڤێ دكهن كێشێ ژ قالبێ وێ دهربێخن بهلكو هندهك ژوان كرێگرتیێن حوكمهتا عێراقێ بن چنكو ههموو بزاڤا وان ئهوه ڤهگهریانه بۆ باوهش و همبێزا حوكمهتێ و جارهكا دی سهرێ گهلێ كورد بێخنه بن پهستالێن وانڤه و بكهیفا خوه سهرهدهریا نهباش دگهل خهلكێ كوردستانێ بكهن. لهوما دڤێت رێ ل ئهڤێ بزاڤێ بهێته گرتن و خهلك و جادا مه هشیار بیت ب گوتن و پروَپاگندێن وان دسهردا نهچن، بهلكو ئهم پێكڤه خوه ئاماده بكهین بۆ گوهوَڕینا مهزن چنكو كاودان یێن بهرهڤ گوهوَڕینان دچن و ئهگهر ئهم دئاماده نهبین دێ شهمهندهفرا گوهوَڕینان مه هێلیت.
