نه‌زیر زاخۆیی: من هونه‌رمه‌ند ئه‌رده‌وان زاخۆیی فێری سترانگۆتنێ كری یه
زاخۆ، عه‌لی حاجی:
هونه‌رمه‌ندێ دێرین (نه‌زیر زاخۆیی) د دیداره‌كێ دا بۆ رۆژناما ئه‌ڤرۆ دیاركر كو ئه‌و كه‌سێ ئێكێ بوو هونه‌رمه‌ندێ نه‌مر ئه‌رده‌وان زاخۆیی ئینایه دناڤ وارێ سترانگۆتنێ دا و به‌ری ده‌ست ب سترانگۆتنێ بكه‌ت ئه‌رده‌وان مۆزیكژه‌ن بوو، ئانكو ب رێیا مۆزیكژه‌نه‌كێ كورد ل رادیۆیا ده‌نگێ كورد ل به‌غدا وی حه‌ز ژ مۆزیكێ كری یه و هه‌ر وی كه‌سی ئامیره‌یه‌كێ مۆزیكێ ب تشتێن ساده دروستكر و ب وێ رێكێ ئه‌و فێری ژه‌نینا مۆزیكێ كر، ل سالا 1977 من هونه‌رمه‌ندێ مه‌زن ئه‌رده‌وان زاخۆیی فێری سترانگۆتنێ كری یه، و د پێنگاڤا دویێ دا مه ئه‌رده‌وان ل رادیۆیا كوردی ل به‌غدا مێهڤان كر ب رێیا په‌یوه‌ندیێن تایبه‌ت كو هه‌ر چه‌نده گه‌له‌ك زه‌حمه‌ت ژی بوو كو د وی ده‌می دا ئه‌رده‌وان زاخۆیی هنده‌ك سترانێن فۆلكلۆری گۆتن، پشتی پێنگاڤا دویێ ب رێیا هه‌لبه‌ستڤانێ نه‌مر(خالس خه‌لیل) مه هنده‌ك په‌یڤ بۆ ئه‌رده‌وان زاخۆیی دروستكرن و ئاواز ژی ژلایێ من ڤه دهاته دانان و هه‌ر ل مالا من ژی مه پرۆڤه دكرن و مه شیا ده‌ه ستران حازركه‌ین، پشتی وێ قوناغێ كاسێتا وی یا ئێكێ تۆماركر، به‌لێ پشتی من گوهداری كری ب دلێ من نه‌بوو، ئه‌ز رازی نه‌بووم بهێته به‌لاڤكرن و هه‌تا نوكه ئه‌و كاسێت ل ده‌ڤ منه و نه‌هاتیه به‌لاڤكرن و ئه‌م نه‌چار بووین دوباره وێ كاسێتێ تۆماربكه‌ین و پشتی به‌لاڤ بوونێ ئه‌و كاسێت گه‌له‌ك به‌لاڤ بوو دناڤ خه‌لكی دا.
نه‌زیری گۆت: ئه‌رده‌وان زاخۆیی بۆ من كاسێته‌كا تایبه‌ت تۆمار كری یه و هه‌تا نوكه من به‌لاڤ نه‌كری یه و من ل به‌ر نینه ژی به‌لاڤكه‌م، پشتی قوناغا به‌رنیاسبوونا ئه‌رده‌وانی زێده‌تر نێزیكی هونه‌رمه‌ند سه‌باح زاخۆیی بوو، هه‌تا نوكه ژی ئه‌ز به‌رده‌وامم ل سه‌ر كارێ خوه‌یێ هونه‌ری و پشته‌ڤانیكرنا هونه‌رمه‌ندان.
