نه‌هلا قادر :به‌غدا دێ پشكا زه‌مالێن خواندنا بلند بۆ هه‌رێما كوردستانێ دیار كه‌ت
هه‌ولێر، قائید میرۆ
جێگرا سه‌رۆكا لیژنا خواندنا بلند ل په‌رله‌مانێ عێراقێ ئاشكراكر، ئه‌ڤ ساله ژی دێ هژماره‌كا زه‌ماله‌یێن خواندنێ بۆ عێراقێ هێنه دابین كرن، و بڕیاره پشكا هه‌رێما كوردستانێ بهێته جوداكرن، وقوتابیێن هه‌رێمێ دێ مفاداربیت ژ خواندنا ماسته‌ر و دكتۆرایێ.
نه‌هله قادر، جێگرا سه‌رۆكێ لیژنا خواندنا بلند ل په‌رله‌مانێ عیراقێ بۆ رۆژناما ئه‌ڤرۆ راگه‌هاند، سالانه زه‌ماله‌یا خواندنێ بۆ عیراقێ دهێته دابینكرن و ئه‌ڤساله ژی وه‌ك سالێن بۆری دێ زه‌مالا خواندنێ بۆ خواندنا بلند هه‌بیت، چونكه عیراقێ هژماره‌كا زۆرا زه‌ماله‌یێن خواندنێ بۆ دهێنه دابینكرن ل وه‌لاتێن جیهانێ ل سه‌ر ئاستێ خواندنا ماسته‌ر و دكتۆرا و پشتی دكتۆرایێ ژی بۆ ڤه‌كۆلینان زه‌ماله هه‌نه بۆ عیراقێ، سالانه هژماره‌كا زۆرا عیراقیان مفادارن و ب مه‌ره‌ما ب ده‌ستڤه‌ئینانا باوه‌رنامێن ماسته‌ر و دكتۆرایێ ل زانكۆیێن جیهانێ به‌رده‌وامیێ ب پرۆسا خواندنا بلند دده‌ن، ئه‌ڤه ژی ده‌لیڤه‌یه‌كا باشه بۆ كه‌سێن دخوازن باوه‌رنامه‌یێن بلند ب ده‌ستڤه بینن، چونكی هاریكاریه بۆ وه‌لاتیان و ده‌لیڤه‌یه‌كا زێڕینه، بتایبه‌تی زانكۆیێن ناڤوده‌نگ هه‌نه ل جیهانێ و قوتابی دشێن مفادارببن.
نه‌هله قادر گۆت:” هه‌ر پشكه‌كا زه‌مالێ بۆ عێراقێ بهێت پشكا هه‌رێما كوردستانێ ژی تێدایه و ئه‌م یێ كار دكه‌ین وه‌كی لیژنا خواندنا بلند ل په‌رله‌مانێ عیراقێ دگه‌ل وه‌زاره‌تا خواندنا بلند، هه‌تا سالانه ده‌مێ زه‌مالا خواندنێ دهێته دابینكرن، پشكا هه‌رێما كوردستانێ بهێته دیاركرن، و خه‌لكێ هه‌رێما كوردستانێ یێن دخوازن و ماف هه‌یه بۆ ماسته‌ر و دكتۆرایێ بچنه ده‌رڤه و مفاداربن، به‌لێ هێشتا دیار نینه دێ چه‌ند به‌ر هه‌رێما كوردستانێ كه‌ڤیت، به‌لێ چه‌ند پشك بۆ عێراقێ بهێن ئه‌ڤه دێ به‌هرا هه‌رێما كوردستانێ هێته جوداكرن و ل سه‌ر بنه‌مایێ وه‌رگرتنا سیڤیان دێ قوتابی شێن داخوازیێن خۆ پێشكه‌ش كه‌ن، ئه‌س باوه‌رم سالێن بۆری چه‌ندین قوتابیێن هه‌رێما كوردستانێ چووینه ده‌رڤه و مفا ل زه‌ماله‌یا خواندنێ دیتنه.
