نه‌وزاد عه‌لی: تیما زاخۆ ره‌وشه‌كا خراب ده‌رباز دكه‌ت
ئه‌ڤرۆ، عه‌لی حاجی:
د داخویانیه‌كێدا راهێنه‌رێ به‌روه‌خت یێ تیما ته‌پا پێی یا یانا زاخۆ ئه‌وا پشكدار د خولا پلا نایابا كوردستانێ دا دیاركر گوهۆرینا راهێنه‌رێ به‌رێ بتنێ چاره نینه ژبۆ باشتكرنا ئه‌نجام و ئاستێ یاریێ ژبه‌ركو د ره‌وشه‌كا خراب دایه و پێدڤی چاره‌سه‌ریا هه‌موو كێماتیان بكه‌ن.
زێده‌تر نه‌وزاد عه‌لی بۆ رۆژناما ئه‌ڤرۆ گوت: هه‌رچه‌نده گوهۆرین د هه‌ر تشته‌كی دا نیشانێن دانانا پلان و هزرێن نوو یه، لێ بتنێ گوهۆرینا راهێنه‌ری ئاریشێن مه چاره‌سه‌ر ناكه‌ت، ژبه‌ركو تیم پێدڤی هه‌تا شه‌ش یاریزانان هه‌یه بۆ بهێزكرنا رێزێن خوه و كێماتیان نه هێلین و هه‌روه‌سان ئه‌و یاریزانێ هه‌ست ب به‌رپرسیاره‌تیێ نه‌كه‌ت و ب گیانێ هه‌ڤڕكیێ ل گه‌ل تیمێ نه بیت ناهێلین به‌رده‌وامیێ بده‌ته یاریێ ل گه‌ل تیما زاخۆ ژبه‌ركو ئه‌م نوونه‌رێن باژێره‌كێ مه‌زنین و خودان ده‌ستكه‌فت و جه‌ماوه‌رێ خوه هه‌یه، سه‌رباری د ڤێ قۆناغێ دا ئه‌ركێ مه ب سانه‌هی نابیت و ئاریشه د ماوه‌كێ كورت دا چاره‌سه‌ر ژی نابیت لێ ئینانا راهێنه‌ره‌كێ شاره‌زا و خودان سه‌ربۆر ژبۆ ڤێراگه‌هشتن ب كاروانێ تیمێ و راوه‌ستیان ل سه‌ر هه‌موو ئاریشا و چاره‌سه‌ركرنێ دێ پێنگاڤه‌كا باش بیت، له‌ورا ل سه‌ر كارگێریا یانێ پێدڤی یه دووڤچوونه‌كا ته‌سه‌ل ل سه‌ر هه‌موو لایه‌نێن تیمێ بكه‌ت و پشتگۆه ناڤێژن.
ژلایه‌كێ دووڤه ناڤهاتی گازنده هه‌بوون و گۆت، چه‌ندین یاریزان هه‌نه د لیستا تیمێ دا و ل گه‌ل تیما خولا ئیراقێ یاریێ و راهێنانا دكه‌ن ئه‌ڤه مه‌زنترین خه‌له‌تیه بۆ به‌رهه‌ڤیێن مه هه‌رچه‌نده راهێنه‌رێ به‌روه‌ختم و چاڤه‌رێ ئێكێ نوو بین لێ ئه‌وژی دێ هه‌مان بووچوون هه‌بیت ژبه‌ركو هه‌ر راهێنه‌ره‌ك بهێت دێ هزرا باش و چێكرنا تیمه‌كا بهێز كه‌ت.
