نوشدارەک کەلوپەلێن نەشتەرگەریێ دھێلیتە د لەشێ نەخۆشەکی دا
ئەڤرۆ نيوز:
پشتی نەشتەرگەریەک ل نەخۆشخانەکا باژارێ ھەولێرێ بۆ نەخۆشەکی کری نوشدارەکی ھندەک کەلوپەلێن نەشتەرگەریێ ھێلاینە د لەشێ نەخۆشی دا، ژ ئالیێ خوەڤە کەس و کارێن نەخۆشی دخوازن سکالایێ تۆمار بکەن.
ڕەشاد حسێن برایێ ئەوی نەخۆشی یە بۆ (باسنیوز) خویا کریە کو ناڤێ برایێ وی (فریاد حسێن عەبدولقادر) و پشتی ئەنجامدانا نەشتەرگەریێ بەردەوام برایێ وی ھەست ب ئێشانێ و گۆت “ئەم ژی نەچار بووین کو ببەینە ولاتی توریکا ل نەخۆشخانەکا باژارێ ئەنقەرە و پشتی پشکنین بۆ کرین بریار دا کو نەشتەرگەریێ بۆ بکەن”.
ڕەشاد حسێن ئاشکرا ژی کر کو پشتی نەشتەرگەریێ دیار بوو کو نوشدارێ ھەولێرێ لفافە و ھەستی و تێل ھێلاینە د پشتا برایێ وی دا و گۆت “ب ھەموو شێوەیەکی دێ سکالایەکا قانوونی ل سەر وی دکتۆرێ ب ناڤێ (ئ. ب) تۆمار کەین و ب رێیا قانوونێ دێ مافێن خوە وەرگرین”.
سەبارەت ھەلویستێ وەزارەتا ساخلەمیا ھەرێما کوردستانێ برایێ ئەوی نەخۆشی گۆت “وەزارەتا ساخلەمیێ سۆز دایە کو ئەو ژی رێکێن قانوونی بگرن و لێکۆلینێ ل سەر بکەن”.
ھەژی گۆتنێ یە ئەڤ نەخۆشە مامۆستایێ زانکۆیێ یە، ئەڤجا زێدەباری کو ژ بەر خەمساریا نوشداری ل کوردستانێ ھەیامەکا درێژە مایە ل سەر تەختی، لێ ل ھەمان دەمی قوتابیێن وی ژی ژ خواندنێ ھاتینە دابرین.
