نوكه سترانا سینگل پتر رۆلێ خوه هه‌یه
ئه‌ڤرۆ نیوز ، زنار تۆڤى:
سترانبێژ میرا عه‌لى د دیداره‌كێ دا بۆ ئه‌ڤرۆ نیوز دیاركر: كو ئه‌و ل سالا 1986 ل باژێركێ دیانا ژ دایك بوویه و د بنیاتدا ئه‌و خه‌لكێ ده‌ڤه‌را بادینایه، ل سالا 2000 من د وارێ هونه‌رى دا كاركریه و من پشكدارى د ئاهه‌نگێن قوتابى و لاوان دا كریه، هه‌روه‌سا هه‌تا نوكه من پێنج ئه‌لبۆم تۆماركرینه و ئه‌لبۆمه‌ك ژ وان ژى كو ژ 12 تراكان پێك دهێت من ب شێوێ دویت چێكریه ل گه‌ل كۆمه‌كا سترانبێژێن ژن، دیسا ئه‌ز ژ وان هه‌موو كارێن خوه یێ رازیمه یێن كو من ئه‌نجامداین و من ب شێوه‌كێ پرۆفشیۆنال چێكرینه و هه‌روه‌سا پشتى پشكداریا من د پرۆگرامێ ستودیۆیا ستێران دا ئه‌ز باشتر هاتیمه نیاسین و هه‌لكه‌وت زاهرى گه‌له‌ك هاریكاریا من كریه.
ناڤهاتى گۆت ژى: هه‌ر چه‌نده نوكه گه‌له‌ك كارێن باش ل به‌ر ده‌ستێ من هه‌نه، لێ نوكه دا ئه‌و ده‌مه نه‌مایه كو سترانببێژ بشێت ئه‌لبۆمه‌كێ چێكه‌ت و دیسا خه‌لك ژى ئێدى ئه‌لبۆمان وه‌كو به‌رێ ناكریت و بازارێ چێكرنا ئه‌لبۆمان نه‌مایه، له‌وما نوكه سترانا سینگل پتر رۆلێ خوه هه‌یه، هه‌روه‌سا سترانبێژ دشێت ب رێیا تۆرێن جڤاكى كار و به‌رهه‌مێن خوه به‌لاڤ بكه‌ت.
میرا عه‌لى دیاركر ژى: نوكه پرۆژه‌كێ نوو ل به‌رده‌ستێ من هه‌یه، كو ئه‌و ژى من هنده‌ك ستران ب سه‌ركردێن كورد گۆتینه، دیسا من كلیپه‌ك ژى ل سه‌ر پێشه‌وا قازى محه‌مه‌د چێكریه و ل ڤان نێزیكان دێ به‌لاڤه بیت، هه‌روه‌سا ئه‌ز نوكه كار د چێكرنا سترانه‌كا ئه‌ڤینى دا دكه‌م و ئێدى من ل به‌ره ب تنێ سترانێن سینگل به‌لاڤ بكه‌م و من هزر د چێكرنا ئه‌لبۆمان دا نه‌كریه، چونكى سترانبێژ سه‌ركه‌فتنێ د چێكرنا ئه‌لبۆمان دا نائینیت، دیسا دڤێت سترانبێژ یێ سه‌رنجراكێش بیت دناڤا خه‌لكى دا و دڤێت خودان كاریزما بیت، هه‌روه‌سا باشتره سترانبێژ بزانیت موزیكێ ب ژه‌نیت و ئه‌ڤ چه‌نده دێ پتر بیته هوكارێ سه‌ركه‌فتنا هونه‌رێ وى.