نووترین سترانا خوه دێ كلیپ كه‌ت
ئه‌ڤرۆ، رێوار:
مه‌سعود مه‌حمود قامشلۆ، سترانبێژه‌كێ رۆژئاڤایێ كوردستانێ یه كو نوكه ل پارێزگه‌ها دهۆكێ دژیت د دیداره‌كێ دا بۆ رۆژناما ئه‌ڤرۆ دیار كر: نوكه و ئه‌و مژوولی تۆماركرنا سترانه‌كێ یه كو بابه‌تێ وێ ل دۆر ئه‌ڤینیێ یه و ژ په‌یڤ و ئاوازێن وی ب خوه یه، هه‌روه‌سا ل رۆژێن داهاتی دێ سترانا خوه یا بناڤێ (ئه‌زم دلدارێ ته) كو ئه‌ڤ سترانه ژی ژ په‌یڤ و ئاوازێن وی یه دێ ل باژێرێ دهۆكێ كلیپ كه‌ت و گۆت: “نوكه من ستودیۆیه‌كا بچووك د ناڤ مالا خوه دا ڤه‌كریه و ئه‌ز كارێن خوه یێن هونه‌ری ل وێرێ ئه‌نجام دده‌م و خزمه‌تا هه‌ڤالێن خوه یێن هونه‌رمه‌ند ژی دكه‌م”.
ناڤهاتی ئاماژه دا وێ چه‌ندێ كو هه‌ر ژ ده‌ستپێكا كارێ وی یێ هونه‌ری بابێ وی سترنبێژ (هه‌ژار دلخاز قامشلۆ) ئه‌و فێری گۆتنا سترانان و ژه‌نینا ئامیرێ سازێ كریه و سترانه‌كا دوقۆلی ژی بناڤێ (هه‌یڤ) دگه‌ل بابێ خوه گۆتیه وهه‌ر ژ ده‌ستپێكا كارێ خوه یێ هونه‌ری د ژیێ زارۆكینیێ دا وی سترانێن سترانبێژ (عه‌دنان سه‌عید قامشلۆ) گۆتینه و داخباری ده‌نگێ وی بوویه.
ل دووماهیێ مه‌سعودی ئاشكرا كر: ئه‌ڤه چه‌ندین جاران وی ب رێیا ده‌زگه‌هێن راگه‌هاندنێ داخواز كریه كو ئه‌و دخوازیت سترانه‌كا دوقۆلی دگه‌ل سترانبێژا كورد (نازدار جزیری) بێژیت، به‌لێ هه‌تا نوكه نه‌شیایه په‌یوه‌ندیێ ب سترانبێژا ناڤهاتی بكه‌ت و ڤێ داخوازێ ژێ بكه‌ت و گۆت: “پشتی ل هه‌یاما بۆری ژ به‌ر پاراستنا گیانێ وه‌لاتیان ژ ڤایرۆسێ كۆرۆنایێ ده‌وات هاتینه قه‌ده‌غه‌كرن ل هۆلان نوكه ئه‌ز بتنێ دچمه روونشتنێن تایبه‌ت سسترانان دبێژم”.
