نوونه‌رێ كۆمپانیه‌كا ڤه‌گۆهاستنا پانزینێ: ئه‌م پێشبینی دكه‌یت پانزین هێشتا گران ببیت
ئه‌ڤرۆ، زنار تۆڤی:
ئه‌ڤه هه‌یامه‌كه ل هه‌رێما كوردستانێ و ب تایبه‌تی ل پارێزگه‌ها دهۆكێ بهایێ پانزینێ گران بوویه، ئه‌ڤه دو رۆژه “75” دینار ل سه‌ر بهایێ لیتره‌كا پانزینا نورمال زێده بووینه، ڤێ چه‌ندێ ژی دلگرانیه‌ك ل نك وه‌لاتیان په‌یدا كریه.
به‌یار شۆفێره‌كه بۆ رۆژناما ئه‌ڤرۆ دبێژیت: هه‌كه ئه‌م رۆژانه پانزینێ نه‌كرین، ئه‌م نه‌شێین كارێ خوه بكه‌ین، دیسا نوكه وه‌رزێ هاڤینێ یه مه پتر پێدڤی ب پانزینێ هه‌یه و نوكه ژی رۆژانه بهایێ وێ یێ گران دبیت و ئه‌ڤ چه‌نده زیانێ دگه‌هینیته مه، مه پێچینابیت ئێدی ب ڤی بهایێ گران پانزینێ بكرین، له‌وما ئه‌م دخوازین بهایێ وێ ئه‌رزان ببیت، دیسا پشتی پانزین كه‌فتیه د ده‌ستێ كۆمپانیان دا بهایێ وێ گران بوویه.
ئه‌حمه‌د جه‌مال، نوونه‌رێ كۆمپانیا مه‌تین یا ڤه‌گۆهاستنا پانزینێ ل دهۆكێ بۆ رۆژناما ئه‌ڤرۆ دیار كر، ئه‌گه‌رێ گرانبوونا پانزینێ بۆ كێمبوونا پانزینێ ڤه‌دگه‌ریت، دیسا 80% یا پانزینا هه‌رێما كوردستانێ ژ وه‌لاتێ ئیرانێ دهێت، لێ نوكه پانزین ل ئیرانێ بوویه ته‌نده‌ر و بهایێ وێ ژی گران بوویه، له‌وما بۆ مه ده‌ست ناده‌ت ب وی بهایێ وان دڤێت بفرۆشین، دیسا بهایێ به‌رمیله‌كا په‌ترۆلێ ژی د بازارێن جیهانی دا گران بوویه.
ئه‌حمه‌د گۆت: “رۆژانه پارزینگه‌ها كار دشێت نێزیكی 30 بارهه‌لگرێن پانزینێ به‌رهه‌م بینیت، هه‌ر چه‌نده هه‌رێما كوردستانێ رۆژانه پێدڤی ب شه‌ش ملیۆن لیترێن پانزینێ هه‌یه، دیسا پارزینگه‌هێن هه‌رێمێ نه‌شێن رۆژانه پێدڤییاتیێن شۆفێران ژ پانزینێ دابین بكه‌ن، هه‌روه‌سا رۆژانه بزاڤان دكه‌ن به‌رهه‌مێ پانزینێ زێده بكه‌ن، رۆژانه ل هنده‌ك پازینخانان سرا پانزینێ دروست دبیت”.
نوونه‌رێ كۆمپانیا مه‌تین گۆتژی: “نوكه لیتره‌كا پانزینا كار ب 660 دینارانه، یا محه‌سه‌ن ژی ب 800 بۆ 825 دینارانه، دیسا ئه‌م پێشبینی دكه‌ین، كو پانزین هێشتا گران ببیت، هه‌كه پانزینا نورمال ئه‌رزان ببیت، دێ جۆرێن دیتر ژی ئه‌رزان بن، ئه‌ڤه بۆ نه‌بوونا به‌رهه‌مێ خومالی ڤه‌دگه‌ریت، رۆژانه پارێزگه‌ها دهۆكێ پێدڤی ب ملیۆنه‌ك و 700 هزار لیترێن پانزینێ هه‌یه، ب تایبه‌تی ژی د وه‌رزێ هاڤینێ دا، لێ نوكه ئه‌و رێژا پێدڤی ناگه‌هیت، له‌وما بهایێ پانزینێ گران بوویه”.
