نوونەرا پارێزگەهێ پێدڤی ب پشتەڤانییا دارایی یە
د داخویانیەكێ دا سەرۆكا یانەیا ئافرەتێن دهۆكێ دیار كر بتنێ ئێك مەهـ مایە بۆ وەرزێ نوو یا خولا فوتسالا ئیراقێ وەكو نوونەرا پارێزگەهێ تیما مە هێشتا نەشییا بەرهەڤییان بكەت، ژبەر نەبوونا پشتەڤانییا دارایی و د شیان دا نینە مووچەكێ كێم ژی بۆ یاریزانێن كچ یێن پارێزگەهێ پەیدا بكەن.
زێدەتر جریسك یۆنس بۆ رۆژنامەیا ئەڤرۆ گۆت: ئەڤە بۆ ماوەكە ئەم یێ بزاڤێ دكەین ژلایێ دارایی ڤە پشتەڤانییا تیما مە یا فوتسالێ بهێتە كرن پێخەمەت بەرهەڤی بۆ خولا ئیراقێ یا فوتسالێ، مە نڤێسارێن فەرمی بۆ هەمی لایەنێن پەیوەندیدار و پارێزگەها دهۆكێ هنارتینە و داخوازا پشتەڤانییا دارایی بۆ نوونەرا ئێكانە یا پارێزگەهێ د خولا ئیراقێ دا كرییە پێخەمەت پشكدارییەكا سەرفەراز و ناڤێ دهۆكێ بلند بكەین، لەوما ب هیڤی نە ئەو لایەنێن مە داخواز ژێ كری تایبەت پارێزگارێ دهۆكێ كو هەردەم پشتەڤانێ وەرزشێ و گەنجانە تایبەت یاریزانێن كچ یێن باژێرێ خوە بكەت.
ژلایەكێ دووڤە ناڤهاتی ئەوچەندە ژی دیار كر ب هیڤی نە زووترین دەم پشتەڤانیێ بكەن ژبەركو دوور نینە هەكە نە هاتە كرن، ئەوا پلان و بەرنامە هاتینە رێكئێخستن و شیانێن پشكداریێ نابن و هەروەسان كچێن دهۆكێ دێ بێ هیڤی بن ژ خولێ و ئەو گەشبینی نامینت و گۆت: وەكو كارگێرییا یانەیا ئافرەتێن دهۆكێ پلان و بەرنامە بۆ وەرزێ نوو یێ خول و قارەمانیێن ئیراقێ و كوردستانێ داناینە كو ب پلانەكا دووم درێژ ژ تازەپێگەهشتییان دەستپێكرییە پێخەمەت ئاڤاكرنا نڤشەكێ نوو ژ یاریزانێن كچی یێن پارێزگەهێ ژ دایكبوویێن دناڤبەرا 2007-20013ێ بووینە لەوما هەبوونا پشتەڤانیێ دێ بنیاتێ وەرزشا كچان بهێزتر لێكەت.
