نوونەرێن پارێزگەھێ دێ ھەمبەری ھێزا یانێن ھەولێر و سلێمانیێ بیت
ئەڤرۆ،
چاڤەڕێ یە پێنچ شەمبی و ئەینیا بھێت یاریێن قۆناغا دوێ یا خولا تەپاپیێ یا کوردستانێ بۆ یانێن پلا نایاب بھێنە ئەنجامدان پشتی بۆ ماوێ دو حەفتیا ھاتیە راوەستاندن، ھەردو یانێن پارێزگەھێ دھۆک و زاخۆ دێ گرنترین یاریێن خوە یێن ڤێ گەڕێ ژ دەرڤەیی یاریگەھێن خوە بنە مێڤانێن یانێن باژێرێ ھەولێرێ و سلێمانیێ ب ئۆمێدا دەستپێکەکا باش و ئەنجامێن سەرکەفتی.
ل رۆژا پێنچ شەمبی تیما تەپاپیێ یا یانا دھۆکێ ل باژێرێ پیرمام دێ بیتە مێڤانا یانا پێشمەرگەیا ھەولێرێ ئێک ژ یاریێن کۆپیتکا ڤێ گەڕێ، یانا پارێزگەھێ پشتی قۆناغا ئێکێ ب لاوازترین ئەنجام دوماھی ئینایی و رێزا حەفتێ ب حەفت خالان دھێت دێ بزاڤێ کەت ب سەرپەرشتیا راھێنەرێ خوە یێ نوو ھەرمان سالحی سەرکەفتنا ئێکێ تۆماربکەت و قەرەبوویا یاریا بوری بھێتەکرن ل گەل خودانێن ئەردی ئەوا ب١٣ خالان سەرێ لیستێ دھێت و سەرکەفتن دیاریا ئێکێ دا لسەر دھۆکێ تۆمارکربوو ب گۆلەکێ بێی بەرامبەر، پێشمەرگا ھەولێرێ تیمەکا ب سانەھی نابیت و دێ بزاڤێن پاراستنا سەرێ لیستێ کەت.
ژلایەکێ دیڤە یانا زاخۆ ئێک ژ ھەڤڕکێن بھێز د خولێ دا دێ بیتە مێڤانا نەوروز ل باژێرێ سلێمانیێ، کوڕێن خابیری ١٢ خال کۆمکرینە و رێزا دوێ دھێت ھەمبەری وێ یانا نەوروز ب نەە خالان رێزا چارێ یە، دێ یاریەکا پری ھەڤڕکی و بھێز بیت ژبۆ بدەستڤەئینانا سێ خالێن یاریێ،ئەرکێ یانا پارێزگەھێ ب زەحمەتە وەکو یاریا دھۆکێ لێ ب سەرپەرشتیا راھێنەرێ خوە محەمەد یوسف دێ پشتبەستن لسەر زاخا یاریزانا و پلانێن تایبەت شیانێن ئەنجامێن باش ھەبن.
دھەمان روژ دا ھەولێر مێڤانداریا برایەتی کەت، دیسان یاریێن رۆژا ئەینی: سۆران× شێروانە، ئارارات× پێشمەرگا سلێمانی، چەمچەمال× سیروانی نوو، ھندرین× دەربەندیخان.
