نوونەرێ حكومەتا هەرێمێ ل بەغدا سەرەدانا دەستەیا گشتیا چاڤدێریا داهاتێ حكومەتا فیدرال كـر
فارس عیسا، نوونەرێ حكومەتا هەرێما كوردستانێ ل بەغدا، دوهی 20/7/2025 سەرەدانا دەستەیا گشتیا چاڤدێریا داهاتێ حكومەتا فیدرال كر و ژ لایێ خانم (سۆزان عەبدوللا محەمەد) ڤە پێشوازی لێ هاتە كرن.
د روونشتنەكێ دا دانوستاندن ل سەر وان ئاریشەیان هاتە كرن، یێن د ناڤبەرا حكومەتا هەرێما كوردستانێ و حكومەتا فیدرال دا ماینە هەلاویستی، ب تایبەت ژی پرسا دارایی و داكۆكیكرن ل سەر بەهرا هەرێمێ د بودجەیا حكومەتا فیدرال دا، هەروەسا چاوانیا بهێزكرنا پەیوەندیان د ناڤبەرا دام و دەزگەهێن فەرمی یێن هەرێما كوردستانێ و حكومەتا فیدرال دا، ژ بۆ هندێ هەموو كێشە ل دووڤ یاسا و دستۆری د ناڤبەرا هەردو حكومەتان دا بهێنە چارەكرن.
خانم (سۆزانێ) دیاركر كو ئەو دێ هەموو بزاڤێن خوە تەرخانكەت بۆ چارەكرنا هەموو ئاریشەیێن دارایی د ناڤبەر حكومەتا فیدرال و یا هەرێمێ دا و ژ لایێ خوە ڤە (فارس عیسا) نوونەرێ حكومەتا هەرێما كوردستانێ ل بەغدا، سوپاسیا وێ خانمێ كر ژ بۆ هاریكاری و پشتەڤانیا وێ ل گەل نوونەراتیا حكومەتا هەرێما كوردستانێ ژ بۆ چارەكرنا هەر جۆرە ئاریشەیەكێ ل سەر بنیاتێ بەرژەوەندیا گشتی.
