نوژداره‌كا ئێزدی خه‌لاته‌كێ نیڤده‌وله‌تی وه‌ردگریت
دهۆك، له‌زگین جوقی:
نوژداره‌كا ئێزدی كو تایبه‌تمه‌ندا نه‌خۆشیێن ژنانه خه‌لاته‌كێ نیڤده‌وله‌تی وه‌رگرت، ژبه‌ر خزمه‌تكرنا رزگاربوویێن ئێزدی و بو روژناما ئه‌ڤرۆ گۆت: ژ سالا 2014ێ ده‌مێ خه‌لكێ شنگالێ تووشی جینوسایدێ بووین من قه‌ستا ناڤ ئاواران كر و من خزمه‌تێن ته‌ندروستی پێشكیشی وان كچ و ژنێن ژ ده‌ستێن تیرۆرستێن داعش رزگاربوی كرینه و هه‌تا نها 1200 ئافره‌ت هاتینه ده‌ف من و چاره‌سه‌ریا وان من كریه.
د. نه‌غه‌م حه‌سه‌ن، تایبه‌تمه‌ندا نه‌خۆشیێن ژنان دیار كر كو خه‌لاتێ (نانسن) یێ مافێ مرۆڤی سالانه پێشكێشی وان كه‌سان دكه‌ن یێن خزمه‌تێن مرۆڤایه‌تی پێشكیشی خه‌لكی دكه‌ن و گۆت: (ئه‌ڤ ساله ئه‌ز هاتمه هه‌لبژارتن و من خه‌لاتی (نانسن) یێ نیڤدوله‌تی و مافێ مرۆڤی ل وه‌لاتێ سویسرا وه‌رگرت).
د. نه‌غه‌مێ گۆتژی: (گه‌له‌ك كچێن ئێزدی یێن من چاره‌سه‌ر كرین نوكه ل سه‌ر مافێ مرۆڤی و ئاشتیێ ل سه‌رانسه‌ری جیهانێ كار دكه‌ن.
دكتوره‌یێ زێده‌تر گۆت: (زوربه‌یا كچ و ژنێن ئێزدی تووشی ده‌رده‌سه‌ریێن مه‌زن بووینه و تیرۆرستێن داعش گه‌له‌ك زولم ل كچ و ژنێن مه كریه د ماوێ ڤان سالان دا من هه‌ست ب ئێش و ئازارێن وان كر و ئه‌س بو وان ئێشام).
تایبه‌تمه‌ندا نه‌خوشیێن ژنان ئه‌و چه‌نده ژی گۆت: (ئه‌م ده‌نگێ رزگاربوویێن ئێزدی دگه‌هینینه ده‌وله‌تان و هیڤیا مه ئه‌وه مافێ رزگاربویان نه‌هێته به‌رزه كرن و پشته‌ڤانیا رزگاربوویان بهێته كرن، چونكی ب راستی گه‌له‌ك پێدڤی ب خزمه‌تێ نه دناڤ كه‌مپان دا و ره‌وشا وان یا باش نینه گه‌له‌ك رزگاربوویی هه‌نه هه‌تا نوكه هێشتا خێزانێن خوه نه دیتینه، ژبه‌ر جینوسایدا شنگالێ هه‌موو ئه‌ندامێن خێزانا خوه ژ ده‌ست داینه تیرۆرستێن داعش گه‌له‌ك خه‌لكێ بێ گونه‌ه یێ شنگال كوشتینه و بێ سه‌روشوون كرینه و هیشتا چاره‌نڤیسێ گه‌له‌ك كه‌سان دیار نینه ئه‌ڤه هه‌موو كارتیكرنێ ل ده‌روونێ رزگاربویان دكه‌ت).
د به‌رده‌وامیا ئاخفتنێن خوه‌دا د. نه‌غه‌مێ گۆت: د گه‌له‌ك به‌رنامێن ژێكجۆدا دا من كار كریه ژ بو خزمه‌تا رزگاربوویان ژ وان ژی سه‌نته‌رێ چاره‌سه‌ری و پشته‌ڤانیا رزگاربوویان ل دهۆكێ من ل ڤی جهی هزار و 200 حاله‌تێن رزگاربوویان دیتنیه هه‌روه‌سا د به‌رنامێ ئه‌لمانی دا من كار كریه ژ بۆ چوونا رزگاربوویان بۆ ده‌رڤه‌ی وه‌لاتی، هه‌تا هزار رزگاربوویان دگه‌ل خێزانێن خوه ژی مفادار بوینه و به‌رده‌وام بۆ دیتنا ره‌وشا رزگاربوویان من كار كریه و گه‌هاندیه ده‌وله‌تان داكو پشته‌ڤانی ل رزگاربوویان بهێته كرن و زارۆكێن 12 سالی یێن تووشی نه‌خوشیا په‌نجه‌شێرێ بوین ئه‌م ره‌وانه‌ی ئیتالیا دكه‌ین ژ بۆ وه‌رگرتنا چاره‌سه‌ریێ.
