نڤستیێن شكهفتێ میرم بۆری
گهلێن رۆژهلاتا ناڤین گرفتێن ئهقلی بهری یێن هزری و بیاڤێن دی ههنه! ئهقلێ خهلكێ ڤێ دهڤهرێ هێشتا ل سهردهمێ ئهفسانێ دژیت و ڤان ئهفسانان وهك ژێدهر بۆ سهرهدهری و بهرسینكگرتنا ئارێشێن خوه بكاردئینن. ئهڤ یهكه نه تهنێ ژ خهلكێ نۆرمال دگریت، بهلكو رهوشهنبیر و سیاسهتمهدار ژی خوهدانێ ههمان ئهقل و رهفتارانه! ئهڤ تێگههشتنه بووینه دیارده و مێتۆدێ ژیانێ، كو بریارێن چارهنڤیس پێ دهێنهدان. لهورا ئهڤ ههموو وهرار و گوههرینێن گلۆبالێ چ باندۆرێ ل سهر ڤان جوره ئهقلان ناكهت، چنكو ئهقلهكێ دوورپێچ و دهرگرتیه. ههرچهنده زانست دیاردهكا مرۆڤاتیه بۆ راڤهكرنا بوون و ههبوونێ دهێته بكارئینان، لێ ل نك مه هێشتا ئهفسانه ڤێ رۆلی دبینیت. وهك چهوا تێكههلیا زانست و ئهقلی كارهكێ دیالێكتیكه، وهسا تێكههلیا ئهفسانه و ئهقلێ مرۆڤێ كورد كارهكێ دیالێكتیكیه! وهك چهوا ئهقلێ مرۆڤی دهڤهرێ ههمبهر دیرۆك و زانستی لهنگ بوویه، وهسا ئیرۆ ژی ب ههمان ئالاڤ و تێگههشتن سهرهدهری دگهل پێشهات و گلۆبالێ دهێتهكرن.
راسته دیرۆك ب خوه ئهوه مرۆڤ راستیا خوه ناس بكهت، بهلێ ل رۆژهلاتا ناڤین پتر سهرهدهری دگهل دیرۆك وهك “پهسن، ڤهگێران و چیرۆك” ژ زانستی كریه. ئهركێ سهرهكیێ دیرۆكی هوور بینیا د راستیا دیرۆكێ دایه، چنكو تێگههێ دیرۆك و فهلسهفێ ب ههڤرا دهێته گرێدان. ئێدی گرێدانا كریار و دیاردا دیرۆكێ كارێ سهرهكیێ دیرۆكنڤیسانه، ئانكو “داكو ئهم خوه وهك دیرۆك ژ رابردویی رزگار بكهین، دڤێت ئهم ب كووری ههر تشتێ رابردوی ڤهكۆلین/ ڤولتێر”( ). ل سهر ڤان پاشخانان ئهگهر مرۆڤ رهوشا مه ب ئاوایهكێ نژیارگهری بخوینیت، دێ بۆ مرۆڤی خویا بیت، پرۆسێسا ركماكی و سنێلیێ زالی سهر ههموو “سیاسهت، رهوشهنبیری، دیپلۆماسی و.. . ” كوردی بوویه. ئهڤه وهدكهت ئهم ئهرێنیێن خوه ب رێكا نهرێنی بپیڤین و راستكرنا شاشیێن خوه ب شاشیان راست بكهین. مرۆڤ دكاریت ئاستێ كمباخی و ئالۆزیا رهوشا مه، دگهل نڤستیێن “ئهصحاب الكهف” ههڤبهر بكهت، مرۆڤ ب ڤێ ههڤبهركرنێ پتر برین و گرفتێن خوه یێن كوور دبینیت. ب راستی هزر و ئهقلێ مه یێ سیاسی مینا نڤستیێن شكهفتێنه، بنێره دهما ئهڤ نڤستیه ژ خهو رابووین، دیتن گهلهك گوههرین ل دهردۆرێن وان درستبووینه. ئێدی زانی هشمهندی و بوهایێن وان دگهل سهردهمێ نوو ناگونجن! ب ڤی ئاوایی ئهم ژی رهوشا خوه گهلهك نێزیكی نڤستیێن شكهفتێ دبینین. لهورا دبێژینه سهرۆك و رههبهرێن خوه ئهڤ ئهزموونا باشوور سهركهڤیت یان بنگهڤیت، ئهنجام یهكه، چونكو ئهقل و هشمهندیا رههبهر و دهسهلاتا كوردی ب زهلالی دیاركر، ئهو ههموو تراژیدیێن ب سهرێ گهلێ كورد هاتین، لایهنهكێ مهزن ژ “سادهی، نهزانهبوون و نهرژدیا” سیاسهت و ئیستیراتیژیا شاشا رههبهرێن مه بوو، بهلێ دیسان ئهم نهفرهتان ل “ئای دل، قهدهرێ و فهلهكێ” دبارینین! ههروهها دهسكهتێن گهلێ كورد ژی (“حكومهتا شێخ مهحموود/ ئهنجامێن شهرێ جیهانێ یهكهم”، “حكومهتا مهابات/ ئهنجامێن شهرێ جیهانێ دووههم” و “سهرهلدانا بوهارا 1991/ ئهنجامێ شهرێ سار” بوو)، بهلێ ئهم گهلهك پهسنا خوه پێ دكهین! ب ئهنجام ڤان 25 سالێن دهسهلاتا باشوور پرسیار و گومانهكا مهزن ل ههمبهر تێگههێن “كوردینی، كورداتی، تهڤگهر، شۆرش، رزگاری، سهرۆك، رههبهر، ههڤوهلاتیبوون، ژێیاتی و.. . “دروستكر. لهورا ئهڤ سیمبۆل و پهیكهرێن د سهرێ خهلكی دا هاتینه رستن، هێدی هێدی ههلوهریان! ئها ئهڤه دبێژیته مه ئهنجامێن ئهزموونا باشوور ب ههر ئاوایهكێ ههبن، دبێژین “میرم بۆری”!
• ئهندامێ پهرلهمانێ عێراقێ یه
