نڤسێن بێده‌نگ
باكوور و شه‌ر و كورد
ده‌وله‌تا تورك ژ بۆ قركرنا كوردا دیسا فه‌رمان دا و ل باكوورێ كوردستان ده‌ست ب كوشتنا گه‌لێ كورد دكن. وه‌ك كو هون ژی دزانن حكومه‌تا ئاكه‌پێ جزیرێ بانگێن ماموستا و كارمه‌ندێن ده‌وله‌تێ كر و پشتێ ڤالاكرنا جزیرێ بریارا ئۆپه‌راسیۆنه‌ك مه‌زن دا. ئهڤ ئۆپه‌راسیۆن ب 10 هه‌زار له‌شكه‌رێن تورك و گه‌له‌ك تانك و تۆپێن وان ده‌ستپێكریه.
ژ ئالیه‌كێ دن هێ ژی ل ناڤچه‌یا ئامه‌دێ سوورێ ئۆپه‌راسیۆنێن ده‌وله‌تێ به‌رده‌وام دكه‌ت. 15 رۆژه كو ده‌وله‌ت ل سوورێ ده‌ركه‌تنا ده‌رڤه قه‌ده‌خه كریه و هه‌ر رۆژ ب سه‌یاره‌یێن زرخی و تیمێن تایبه‌ت هێریشێ گه‌ل دكه‌ت. یانی ده‌وله‌ت ژی باش دزانت كو گه‌لێ كورد سه‌رێ خوه ناته‌وینه و نزانم جارا چه‌نده‌مینه كو ده‌وله‌ت ڤان ئۆپه‌راسیۆنا ددۆمینت. ب راستی ژی هه‌تا ڤی وه‌ختی ژی گه‌لێ كورد هێ ده‌ست ب به‌رخوه‌دانێ نه‌كریه. یانی وه‌ك مژارا رۆژاڤا و پاراستنا كۆبانێ هێ بانگاوازیا به‌رخوه‌دانێ نه‌هاتیه كرن. لێ هه‌گه‌ر ره‌وش ب ڤی حالی به‌رده‌وام بكه‌ت، دیاره كو د ده‌مه‌ك نێزیك دا دێ گه‌ل ب خوه بانگه‌وازیه‌ك وسان بكه و ئێدی شه‌ر دێ دژوار ب بت.
من جاره‌ك دن ژی د نڤسێن خوه دا به‌حس كربوو كو هه‌م ده‌وله‌ت هه‌م ژی په‌كه‌كه ئێدی ب هه‌موو هێزێن خوه وێ شه‌ری بكن. نه ب ته‌نێ ل چیا ل باژار و كۆلانا وێ ئهڤ شه‌ره به‌رده‌وام بكه‌ت. هه‌تا كو ئالیه‌ك ب سه‌ر بكه‌ڤه‌ت. یانی داخوازا حكومه‌تا ئاكه‌پێ ئه‌وه كو ب سه‌ركه‌ڤت و ل باكوورێ كوردستان ته‌ئسیرا په‌كه‌كێ كێم بكه‌ت. ژ به‌ر وێ ژی حكومه‌تا ئاكه‌پێ ژ ده‌ما 7ێ خزیرانێ و ڤردا ل به‌ر پۆلیتیقایا شه‌ر دخه‌بتت. ده‌وله‌ت ل جزیرێ زارۆكه‌ك 11 سالی دكوژت و دبێژت كو من ته‌رۆریسته‌ك كوشت! ده‌ما مرۆڤ دپرسه، چاوا زارۆكه‌ك 11 سالی دبه ته‌رۆریست? ده‌وله‌ت دبێ كو ئه‌و رۆكه‌تا دگه‌رینه! یانی ده‌وله‌ت ژ بۆ كوشتنا كوردا ژ بۆ خوه رێ دیتیه و مخابن هه‌تا ئیرۆ چاوا كو گه‌له‌ك كه‌س ب ئاوه‌یه‌كی ڤه‌شارتی و تاری هاتنه كوشتن دیاره كو وێ ب ڤێ حالێ ژی به‌رده‌وام بكه‌ت.
د ده‌مه‌ك نێزیك دا ئێدی كه‌س نابێژت كو خه‌نده‌ق بێواته‌نه ئان ژی نه‌وه‌ختێ خه‌نده‌قا بوو. وێ هه‌ر كه‌س بێژت كو ئهڤ قركرنا كوردا یه و سه‌رێ خوه راكن. یانی كورد ب بانگه‌وازیا كوشتنا كوردا وێ سه‌رهلدانا خوه پێك بینه و یا راست ژی ئهڤ ژه‌نده باش خویا دكه‌ت. ژ به‌ر كو حكومه‌تا ئاكه‌پێ ژ بریارا خوه ڤه‌ناگه‌ره و سه‌رۆكوه‌زیر دبێژت: “ئه‌مێ گه‌ڕه‌ك ب گه‌ڕه‌ك، كۆلان ب كۆلان، مال ب مال ئۆپه‌راسیۆنێن خوه بدۆمینن و هه‌موویان پاقژ بكن! یانی ئهڤ تێ وێ واته‌یێ كو ل باكوورێ كوردستان ئێدی شه‌ر ل هه‌ر جیهی ده‌ست پێ دكه‌ت. گه‌لۆ كو شه‌ر ئه‌وقاس دژوار ببت، دێ رۆلێ په‌كه‌كێ، یه‌په‌گێ و پێشمه‌رگه‌یان وێ چ بت? یانی كو ل باكوور گه‌ل ب ته‌ڤاهی سه‌رێ خوه هلبده‌ت وێ پێشمه‌رگه‌یێن باشوور چ به‌رسڤ بدن? ئهڤ به‌رسڤه گه‌له‌كا گرینگه ژ به‌ر كو سبه رۆژا كوردا گرێدایێ یه‌كتیا كورد و كوردستانێ یه.
به‌رهه‌ڤكرن: ئه‌ڤرۆ
