نڤیسینگه‌ها رزگاركرنا ره‌ڤاندیێن ئێزدی ژ دهۆكێ بۆ هه‌ولێر دهێته ڤه‌گوهاستن
دهۆك، له‌زگین جوقی:
سه‌رپه‌رشتێ باده‌كا رزگاركرنا ره‌ڤاندیێن ئێزدی دیار كر، بڕیار هاته‌دان نڤیسینگه‌ها رزگاركرنا ره‌ڤاندیێن ئێزدی ژ دهۆكێ بۆ هه‌ولێرێ بهێته ڤه‌گوهاستن و دبێژیت: ل رۆژا 15/7/2021ێ نڤیسینگه‌ها رزگاركرنا ره‌ڤاندیان ل هه‌ولێرێ دێ ده‌ست ب كارێ خوه كه‌ت.
خه‌یری بۆزانی، سه‌رپه‌رشتێ باده‌كا رزگاركرنا ره‌ڤاندیێن ئێزدی بۆ رۆژناما ئه‌ڤرۆ خویا كر، ب بڕیارا نێچیرڤان بارزانی، سه‌رۆكی هه‌رێما كوردستانێ نڤیسینگه‌ها رزگاركرنا ره‌ڤاندیێن ئێزدی ژ دهۆكێ بۆ هه‌ولێرێ دێ هێته ڤه‌گوهاستن و ل هه‌ولێرێ ل سه‌ر كارێ خوه یێ رزگاركرنا ره‌ڤاندیان یا به‌رده‌وام بیت و گۆت: “پتر كار ل سه‌ر دیكومێنتكرنێ دێ هێته ئه‌نجامدان و نڤیسینگه‌ه پتر دێ نێزیكی قۆنسلخانه و ریكخراوان بیت باشتر كار دێ هێته كرن”.
گۆتژی: “شه‌ش هزار و 417 كچ و ژن و زارۆیێن ئێزدیان ل شنگالێ ل رۆژا 3/8/2014ێ ژلایێ تیرۆرستێن داعش ڤه هاتنه ره‌ڤاندن و ب بڕیارا حكومه‌تا هه‌رێما كوردستانێ ل وی ده‌می نڤیسینگه‌هه‌ك بۆ رزگاركرنا ره‌ڤاندیێن ئێزدی ل دهۆكێ هاته ڤه‌كرن، هه‌ر ژ هینگێ وه‌ره هه‌تا نوكه ل سه‌ر كارێ رزگاركرنا ره‌ڤاندیێن ئێزدی یا به‌رده‌وامه و هه‌تا نوكه سێ هزار و 545 كچ و ژن و زارۆ رزگاركرینه و هێشتا چاره‌نڤیسێ دو هزار و 768 ره‌ڤاندیان ژی یێ دیار نینه”.
