نڤیسینگه‌ها پاسپۆرتان ل ئاكرێ دێ هێته ڤه‌كرن
ئاكرێ، ره‌مه‌زان هه‌رنی:
ب بڕیاره‌كا حوكمه‌تا هه‌رێما كوردستانێ فه‌رمانا ڤه‌كرنا نڤیسینگه‌ها پاسپۆرتان بۆ قه‌زایێن ئاكرێ و زاخۆ و سۆران هاته‌دان و ل ده‌مێ بۆری نڤیسینگه‌هێن زاخۆ و سۆران هاتنه ڤه‌كرن و كاروبارێن ڤه‌كرنا نڤیسینگه‌ها ئاكرێ ژی ب دووماهی هاتینه و دێ هێته ڤه‌كرن.
عه‌قید ده‌ریان محه‌مه‌د ئه‌مین، رێڤه‌به‌رێ نڤیسینگه‌ها پاسپۆرتێن ئاكرێ بۆ رۆژناما ئه‌ڤرۆ راگه‌هاند: “ژ به‌ر نه‌بوونا ئاڤاهیه‌كێ باش ڤه‌كرنا نڤیسینگه‌ها پاسپۆرتێن ئاكرێ گیرۆ بوو، چه‌ندین جارا مه ئاڤاهی ده‌ستنیشانكرن ب كێر نه‌دهاتن و دووماهیك جار ئاڤاهیه‌كێ گونجایی هاته دیتن و نوكه نڤیسینگه‌ها ئاكرێ یا به‌رهه‌ڤه و ل نێزیك دێ هێته ڤه‌كرن”.
گوتژی: “ب ڤه‌كرنا نڤیسینگه‌ها پاسپۆرتێن ئاكرێ، دێ بیته ئه‌گه‌رێ كارئاسانیێ بۆ وه‌لاتیێن قه‌زایێن ئاكرێ و به‌رده‌ڕه‌ش بۆ دروستكرنا پاسپۆرتان، دیسا ئه‌و قه‌ره‌بالغیا ل سه‌ر پاسپۆرتا دهۆكێ ژی دێ كێم بیت، ئه‌ڤه پێنگاڤه‌كا باشه حوكمه‌تا هه‌رێما كوردستانێ هاڤێتی كو نڤیسینگه‌ها پاسپۆرتان ل پڕانیا قه‌زایان بهێنه ڤه‌كرن”.
عه‌قید ده‌ریان محه‌مه‌د ئاشكرا ژی كر، ئاڤاهی و ستافێ كاركرنێ ب دووماهیك هاتینه و كه‌ره‌سته ژی هه‌موو د به‌رهه‌ڤن، ب تنێ یا مای ب فه‌رمی نڤیسینگه‌ه بهێته ڤه‌كرن و گۆت: “ئه‌م چاڤه‌رێ دكه‌ین د ڤان چه‌ند رۆژێن بهێن دا بهێته ڤه‌كرن”.
