نڤیسینگەها پاسپۆرتێن ئەلكترۆنی ل زاخۆ هاتە ڤەكرن
زاخۆ، عەلی حاجی:
د رێورەسمەكێ تایبەت دا ب ئامادەبوونا گوهدار شێخۆ، سەرپەرشتێ ئیدارەیا سەربخوە یا زاخۆ ئاڤاهی و نڤیسینگەها پاسپۆرتێن ئەلكترۆنی ل زاخۆ هاتە ڤەكرن.
د كۆنگرەكێ رۆژنامەڤانی دا گوهدار شێخۆ دیار كر، جهێ شانازیە نڤیسینگەها پاسپۆرتێن ئەلیكترۆنی ل زاخۆ هاتیە ڤەكرن، ل دووڤ كارنامەیا كابینەیا نەهێ ب سەروكاتیا مەسرور بارزانی كو زێدەتر خزمەتا وەلاتیان بهێتە كرن د بیاڤێن جودا دا و نەهێلانا روتینیێ د ناڤ رێڤەبەریێن حكومەتێ دا و گۆت: “ل نڤیسینگەها زاخۆ وەلاتی دشێن د دەمژمێرەكێ دا پاسپۆرتا خوە یا نوو وەربگرن، بەری نوكە ژ بەر دووراتیا د ناڤبەرا پاسپۆرتێن زاخۆ و بانكێ دا هندەك كێشە بۆ وەلاتیان دروست دبوون، بەلێ د نوكە دا ئەو كێشەیە ژی نەمان و وەلاتی دشێن بێ هەبوونا كێشەیا بانكێ مامەلەیێن پاسپۆرتێن خوە ب رێڤە ببەن”.
ناڤبری گۆتژی: “د دەمەكێ نێزیك دا دێ پڕۆژەیێ (هەژمارا من) ل زاخۆ دەست پێكەت و وەلاتی دشێن ب ڕێیا وێ كارتێ پارەیێ پاسپۆرتا خوە بدەن و دروستكرنا وێ كارتێ ژی كار ئاسانییەكە بۆ وەلاتیێن مە”.
