نڤیسینگەهێن فرۆكەڤانیێ ل دهۆكێ د ڕەوشەكا لاواز دانە
سندس سالح سلێڤانەیی:
خودانێ نڤیسینگەها فرۆكەڤانیێ ل دهۆكێ دیاركر، نوكە نێزیكی (100) نڤیسینگەهێن فرۆكەڤانیێ ل سنۆرێ پارێزگەها دهۆكێ هەنە و كارێ وان یێ سەرەكی دابینكرنا تیكێتێن فرۆكە یانە بۆ گەشتیاران، هەروەسا پەیداكرنا هەر جۆرە ئاسانكاریەكێ بۆ گەشتیاران و گۆت: مە پەیوەندیێن باش ل گەل رێڤەبەریا گشتی یا گەشت و گوزارێ ل پارێزگەها دهۆكێ و ئێكەتیا كۆمپانیێن فرۆكەڤانی هەنە و ل گەل مە دهاریكارن.
ساندوڤان عەلی، خودانێ نڤیسینگەها (سون سوز) یا فرۆكەڤانیێ بۆ رۆژنامەیا ئەڤرۆ گۆت: ئەم سەر ب وەزارەتا گەشت و گۆزارێ ڤەینە، ل حكومەتا هەرێما كوردستانێ، ب مخابنی ڤە دێ بێژم ژ بەر رەوشا نوكە و گیرۆبوونا موچەیێن فەرمانبەرێن هەرێما كوردستانێ كارێ مە گەلەك لاواز بوویە و ئەڤە گازندەیا خودانێن هەموو نڤیسینگەهێن فرۆكەڤانیێ و وەكو مە گۆتی نێزیكی (100) نڤیسینگەهێن ب ڤی جۆری ل سنۆرێ پارێزگەها دهۆكێ هەنە.
زێدەتر گۆت: هەر نڤیسینگەهەكێ ژی چەندین كارمەند ل دەف كاردكەن و ب مووچەیێ خوە خێزانێن خوە پێ ب رێڤە دبەن، لێ مخابن نوكە ئەو هەموو نەمایە و رەوش گەلەكا ئالۆزە و ئەم دبینین تاكە ڕێ بۆ چارەسەریا ڤێ چەندێ كێشەیێن مە یێن هەرێمی، ب تایبەت یێن درایی بهێنە چارەسەركرن و مووچە د دەمێ خوە دا بهێنە بەلاڤكرن دا رەوشا مە هەموویان پێكڤە باشتر لێ بهێت و بازاڕێ مە گەرمتر لێ بهێت و داخوزێ ژ رێڤەبەریا رێڤەبەریا گشتی یا گەشت و گوزارێ ل پارێزگەها دهۆكێ دكەین، هەر چەندە ل گەل مە یا هاریكارە بەس بشێن پتر هاریكاریا مە بكەن و بزاڤێ بكەن هەر چو نەبیت هندەك جۆرە ئاسانكاریان بۆ مە دابین بكەن، ژ وانا هەكە بشێن هندەك هندەك باجەیان ل سەر مە كێم بكەن.
