نڤیسێن بێ ده‌نگ
د سه‌ری دا ل باكوورێ كوردستان و ب ته‌ڤاهیێ توركیا مخابن مافێن رۆژنامه‌ڤانا نه‌ما یه. ل سه‌ر بریارا حكومه‌تا ئاكه‌پێ پۆلیس گهیشتن هه‌ر ده‌رفه‌تێ كو كه‌سێن ژ وان گومان تێن كرن وه‌رن بن چاڤكرن و د وان بن چاڤكرنا دا ژی 72 سه‌عه‌ت د ده‌ستێن پۆلیسان دا بێ سووج و بێ دادگه‌ه وه‌رن ئاسته‌نگكرن. یانی ده‌ما پۆلیس بخوازن دكارن وه ئاسته‌نگ بكن و بنچاڤ ژی بكن. وه‌ك كو هون ژی دزانن و ب رایا گشتی ره ژی هاته پارڤه‌كرن د رۆژا داویا سالێ دا ل ئامه‌دێ مه‌شه‌ك پێك هات و پۆلیسان د ده‌ما داخویانیێ دا هێریشێ په‌رلامه‌نته‌ران و گه‌ل كر. مخابن د وێ رۆژێ دا گه‌له‌ك كه‌س هاتن بن چاڤكرن. لێ یا هه‌ری بالكێش كو كامیره‌مانێ من هاته بن چاڤكرن. چما بالكێش بوو? ژ به‌ر كو كامیره‌مانێ من كارێ خوه دكر و ده‌ستوورا وی یا ژ ئالیێ سه‌رۆكوه‌زیر ژی هه‌بوو. لێ وه‌ك كو من هنه‌ك به‌رێ ژی ئانی زمان، ده‌ما پۆلیس بخوازن دكارن وه بن چاڤ بكن.
من ژ بۆ پاراستنا مافێن خوه یێ رۆژنامه‌ڤانیێ و پاراستنا كامیره‌مانێ خوه به‌رخوه‌دانه‌ك نیشان دا و ئهڤ به‌رخوه‌دان بوو نموونه‌یه‌ك ژ بۆ رۆژنامه‌ڤانا. ب راستی ژی هه‌م ل باكوورێ كوردستان، هه‌م ل توركیا و هه‌م ژی ل ده‌رڤایێ توركیا گه‌له‌ك كه‌س ئه‌و به‌رخوه‌دانا من پیرۆز كرن. لێ ئه‌ز دبێژم كو ئه‌و به‌رخوه‌دان مافه‌ك مرۆڤاهی بوو. یانی به‌ریا مافێن رۆژنامه‌ڤانیێ مافێن مرۆڤاهیێ بوو.
ژ بۆ چ ده‌وله‌ت ژ رۆژنامه‌ڤانا عاجزه? چما ده‌وله‌ت ناهێله رۆژنامه‌ڤان كارێن خوه بكن? ئان ژی ژ بۆ چ ده‌وله‌ت هێریشێ رۆژنامه‌ڤانێن كورد دكه‌ت? ب راستی به‌رسڤا ڤان پرسا جودا جودا نه! لێ یا هه‌ری گرنگ ئه‌وه كو حكومه‌تا ئاكه‌پێ ل هه‌مبه‌رێ خوه ئۆپۆزسیۆنێ ناخوازت. ژ به‌ر كو ئه‌و رۆژنمنه‌ڤانێ كو نه د بن كۆنترۆلا وان دا نه ژ ئالیه پۆلێسان ڤا تێن ئاسته‌نگكرن. د سالێن 90ی دا ژی ل باكوور ره‌وش وه‌سان بوو. مخابن ئیرۆ دیسا ره‌وش ب ڤی حالی یه. حكومه‌تا ئاكه‌پێ دبێژت: “كو مافێن رۆژنامه‌ڤان خه‌تا مه یا سۆره! كا ئه‌م چما وێ خه‌تا سۆر نابینن! ئان ژی ئه‌و خه‌تا سۆر ژ بۆ كیژان رۆژنامه‌ڤانا یه? گه‌لۆ ئێ كو د بن كۆنترۆلا وه دا نه?
من ل هه‌مبه‌رێ سه‌یاره‌یه‌ك زرخی ل به‌ر خوه دا و رایا گشتی هشیار كر. گه‌له‌ك كه‌سێن ناڤدار ب ڤێ بوویه‌رێ دا پشته‌ڤانیا من ژی كرن و گۆتن كو رۆژنامه‌ڤانتی ئه‌ڤه. لێ ئه‌ز دبێژم كو نه ب ته‌نێ ژ بۆ رۆژنامه‌ڤانا، ژ بۆ هه‌موو كه‌سان ئهڤ ماف پێوسته كو وه‌ره پاراستن. یانی د سه‌ری دا مافێن مرۆڤا پێوسته كو وه‌رن پاراستن. لێ مخابن ل توركیا نه مافێن مرۆڤا ما یه نه ژی مافێن رۆژنامه‌ڤانا. وه‌ك كو ون ژی دزانن مافێن په‌رلامه‌نته‌رێن كورد ژی نه‌ما یه! یانی ئێدی پۆلیسێن ده‌وله‌تا تورك هێریشێ په‌رلامه‌نته‌رێن كورد ژی دكه‌ت و په‌رلامه‌نته‌رێن هه‌لبژارتی د بن خوه دا دبینت! ئهڤ ژی دده‌ت خویاكرن كو حكومه‌تا ئاكه‌پێ هه‌ر ده‌رفه‌ت دایه پۆلیسان. مخابن هه‌تا كی ده‌رێ و ئهڤ ره‌وشه دێ جت، نزانم. لێ دزانم كو ئێدی سه‌برا گه‌ل نه‌ما یه و رۆژنامه‌ڤان ژی ژ بۆ ڤان هێریشان پێوسته كو بێده‌نگ نه‌مینن. ژ به‌ر كو ئیرۆ ل سه‌ر مه قه‌ومی ئه‌و بوویه‌ر وێ سبێ ل سه‌ر یه‌كه دن! خه‌تا سیاسه‌تا ئاكه‌پێ یا سۆر هه‌یه لێ مخابن نه ژ بۆ مافێن مرۆڤا یه. ژ به‌ر وێ هشیار بن و خوه بپارێزن. ده‌ما كامیره بهێن گرتن گه‌لۆ وێ چ بێ سه‌رێ مه !
