نڤیسەر و رۆژنامەڤانێ بەرنیاس(بلند محەمەد) ی وەغەرا دووماهیێ كر
خالد عەلی
دوهی رۆژا دوشەمبی رێكەفتی 14/7/2025 هەلبەستڤان ورۆماننڤیس و رۆژنامەڤانێ بەرنیاسێ پارێزگەها دهۆكێ (بلند محەمەد)ی وەغەرا دووماهیێ كر..
هەژییە بێژین كو خودێ ژێ رازی ئێك ژ نڤیسەرێن دیاربوو و خودان رۆلەكێ بەرچاڤ بوو د هەردو گۆرەپانێن ئەدەبی و رۆژنامەڤانی دا ل پارێزگەها دهۆكێ.. ل سالا (1968) ل باژێرێ دهۆكێ ژدایكبوویە، هەلگرێ باوەرنامەیا دبلۆم ب زمانێ كوردی بوویە. ناڤەراستا سالێن هەشتێیان دەست ب نڤیسینێ کریە و ب شعرێ دەستپێکریە، ل رۆژنامە و کۆڤارێن کوردی یێن وی سەردەمی بەرهەمێن خوە بەلاڤکرینە وەکو، (هاوکاری، بزاڤ، کاروان، بەیان).
ژبەر ئەگەرێن سیاسی ل سالا 1985 د ژیێ سنێلەیێدا ژلایێ رژێما بەعسڤە هاتە گرتن و ب 10 سالان ژ لایێ (محكمه الثورە) ل عێراقێ هاتە حوكمكرن و كەتە زیندانا ئەبوغرێب.
بۆ ماوەیێ چەند سالان سكرتێرێ نڤیسینێ ل رۆژنامەیا ئەڤرۆ بوو و هەر وەسا گەلەك پۆست و پایە ل گەلەك دەزگەهێن میدیایێ وەرگرتبوون.. هەر وەسا ب دەهان پەرتووك (هەلبەست – چیرۆك – رۆمان) چاپكرینە و ئێك ژ نڤیسەرێن بەردوام بوو یێن بۆ رۆژنامەیا ئەڤرۆ ب گشتی و بەرپەرێ ئەدەبی ب تایبەت دنڤیسی.. سەرانسەر ماوەیێ بۆری زنجیرەیەكا بیرهاتنێن وی یێن سەردەمێ زیندانێ ل سەر بەرپەرێ دیرۆك د رۆژنامەیا ئەڤرۆ دا هاتن بەلاڤكرن.
ئەم ب ناڤێ رۆژنامەیا ئەڤرۆ سەرخۆشییێ ل هەمی نڤیسەر، رەوشەنبیر، هەڤال و بنەمالا نڤیسەر و رۆماننڤیس (بلند محەمد)ی دکن، ژ خودێ دخوازین گیانێ وی ل بەهەشتا بەرین شاد بکت، و سەبر هەدارێ بدتە دۆست و كەسوكارێن وی.
