نڤیسەر و ڤەكۆلەر داود مراد خەتاری ب مەدالیا زێڕی هاتە خەلاتكرن
شاكر ئەتروشی:
ب چاڤدێریا (د.عەلی تەتەر) پارێزگەرێ دهۆكێ، روونشتنێن بەرنامەیێ (شەڤبێریكێن رەمەزانێ 4) ئەوێ ژلایێ رێڤەبەریا رەوشەنبیری و هونەری ل قەزایا سێمێلێ دهێنە گێڕان د بەردەوامن و ل شەڤا دەربازبووی، هەڤدە ل سەر هەژدەی ڤێ مەهێ دو پەنەل هاتنە گێڕان، یا ئێكێ (د. فاخر حەسەن گولی) ڕاگرێ كولیژا زانستێن مرۆڤایەتی ل زانكۆیا زاخۆ سمینارەك ل بن ناڤێ (دیرۆكا نڤیسینێ ل دەڤەرا بەهدینان) د پەنەلێ دویێ ژی خەلاتێ زێڕی یێ ئەڤ سالە پێشكێشی نڤیسەر و ڤەكۆلەرێ دێرین (داود مراد خەتاری) هاتە كرن و بەرێز (ئحسان ئامێدی) بەرپرسێ ناڤەندا خانی یا رەوشەنبیری و راگەهاندنێ ئەو مەدالی ب سنگێ وی ڤەكر.
ئیسماعیل هاجانی، رێڤەبەرێ رێڤەبەریا رەوشەنبیری و هونەری ل قەزایا سێمێلێ، د پەیڤەكێ دا سوپاسیا پارێزگەرێ دهۆكێ و قائیمقامێ قەزا سێمێلێ و رێڤەبەریا گشتی یا رەوشەنبیری و هونەری ل پارێزگەها دهۆكێ كر كو ئەڤە چارسالن ب بەردەوامی پشتەڤانیێ ل بەرنامەیێ شەڤبێركێن رەمەزانێ دكەن و گۆت هەلبژارتنا نڤیسەر و ڤەكۆلەر(داود مراد خەتاری) بۆ وەرگرتنا خەلاتێ زێڕی یێ ئەڤ سالە ب زانابوون و ل دووف هندەك پیڤەران هاتیە دەستنیشانكرن، چنكو ناڤبری هەتا نوكە (52) پەرتووكێن چاپكری هەنە، هەروەسا (17) پەرتووك ژی بۆ چاپێ دبەرهەڤن و (48) سمینار ژی دبۆارێ كارەستا شنگالێ دا و رەڤاندنا كچ و ژنێن ئێزدی ل ناڤحوە و دەرڤەی كوردستانێ پێشكێشكرینە، لەورا ژ هەژی ڤێ خەلاتكرنێ بوو.
ل دووماهیێ ژی نڤیسەر و ڤەكۆلەر(داود مراد خەتاری) د پەیڤەكێ دا خۆشحالیا خوە بڤێ خەلاتكرنێ دەربڕی و سوپاسیا رێڤەبەریا رەوشەنبیری و هونەری ل قەزایا سێمێلێ و دیاركر كو ئەو وەك نڤیسەر و ڤەكۆلەر دێ ل سەر كارێ خوە یێ بەردەوام بیت.
