نڤیسەر ژ خواندەڤـانـان پترن یـان بەروڤـاژی؟
ئیسماعیل بادی
كار و بزاڤا چاپكرنێ ل كوردستانێ رۆژ بۆ رۆژێ بەر ب پێشڤەیە و رۆژ نینە هەكە چەند پەرتووك ژ چاپێ دەرنەكەڤن، پترییا نڤیسەران ژی گازندێ دكەن، كو پشتەڤانییا وان ناهێنەكرن و بەرهەمێ وان هەر وەكو (خانی)ێ مەزن گۆتی رەواجا خۆ نینە و بازارەكێ كەسادە. بەلێ دەما سەرەدانا پەرتووكفرۆشان دكەین، ب ڕاستی جهـ ل ناڤ پەرتووكخانێن وان نینە، كو پەرتووكێن نوی پێشچاڤ بكەن بۆ بكڕ و خواندەڤانان.
ئەڤێ كریارێ، گەلەك تا و چق ژێ دچن، ئەرێ ڕاستە پشتەڤانی كرن ل نڤیسەران نینە، یان وەكو پێدڤی و ب عەدالەت ناهێتە ئەنجامدان؟
ئەرێ ڕاستە رەواجا هەمی بەرهەمان نینە یان تنێ یا هندەكان نینە؟
باشە ئەگەر پشتەڤانی نینە و رەواج نینە، پا ئەڤ هەمی چاپكرنە بۆ چنە و ئەو چ مەزاختنە دهێتەكرن ژ لایێ نڤیسەران ڤە، یان ژی وەسا دیارە پترییا وان نە ژ كیستێ وانە؟! چ كەسەك، لایەنەك، دەزگەهەك پشتەڤانییا چاپێ لێ دكەت یان ژی چەند دانەیان ژێ دكڕن وەكو پشتەڤانی بۆ نڤیسەران هەر وەكو ناڤەندا خانی یا رەوشەنبیری و ڕاگەهاندنێ ئەڤە چەندین سالە وێ پشتەڤانی ڤی كاری دكەت ژبلی زنجیرەیا چاپكرنێ.
ژ وان سەرهاتیین چاپكرنێ، ب ڕاستی هندەك پەرتووك مخابن ئەو مەزاختی لێ دهێتە كرن، چونكو هەكە بەلاڤكرنا وێ ب هەروە نەبیت، من نە باوەرە خواندەڤانەك (هزارەكێ ژی) پێ بدەت!! ئەڤان جۆرە پەرتووكان، بها و گرانی و سەنگا پەرتووكێن باش و ب مفا ژی شكاندییە و بازارێ پەرتووكان دشێین بێژین یێ (رەزیل) كری.
بەری چەندەكێ، پەرتووكەك هاتە چاپكرن، هەلبەت ب چەند دانەیێن كێم، جهەكێ رەوشەنبیری (من نەڤێت ناڤان بێژم!!) كۆمەكا وان پەرتووكان ژ نڤیسەری كڕین وەكو پشتەڤانی، دەما من پرسیار ژ خودانێ پەرتووكێ كری، چەند لێ مەزختییە و بایێ چەندێ وی جهێ رەوشەنبیری ژێ كڕین، ڤەڕێژا دووماهیێ نڤیسەر لڤێرە ب (100,000) سەد هزرا دیناران فایدە بوو، ژبلی هەكە هندەك فرۆتبنە جهەكێ دیتر و ل بازاری ژی نزانم كا چ هاتینە فرۆتن یان كەسێ مەرحەبای لێ نەكرییە!!.
فەرە ژ بۆ چاپەمەنییان ژ لایێ جهێن شۆلەژێ ڤە هندەك مەرج بهێنە دانان، نە هەر كەسێ خۆ كرە هۆزانڤان و چیرۆكنڤیس و ڕۆمانڤنیس، كو هێشتا كۆمەكا هۆزانا و چیرۆكا و رۆمانەك ژی نەخواندییە، ببیتە نڤیسەر، ژبلی زمان و ڕێنڤیس هەر چنە.. ئەگەر زمانێ كوردی وەسا بڕێڤە بچیت، دێ ل پاشەرۆژێ گەلەك ب گرانی ل سەر مە تەخا نڤیسەر و رەوشەنبیران ڕاوەستیت!.
