نڤێسه‌ر و هه‌ڤكێشه‌یا سیاسی د قووناغا ئه‌ڤرۆ دا
رۆلی نڤیسكاری دهه‌ڤكێشه‌یێن سیاسی دا، بۆچی ل هه‌می وه‌لاتان نڤیسكار خودان هه‌لویسته و ل سه‌ر ئاستێ سیاسی رۆلی خوه یی هه‌ی پتری سیاسه‌تمه‌داران و ل ڤیره به‌ره‌ڤاژی یه؟ ب دیتنا من نڤیسه‌رێ مه نه پشكه‌كه ژ هه‌ڤكێشا سیاسی به‌لكو روویكه ژ روویێن سیاسیان و ل دووڤ رازه‌مه‌ندیا وان دبه‌زیت و سیاسه‌تا وان په‌یره‌و دكه‌ت، هه‌لبه‌ت حزبێن سیاسی زۆر بهیا قه‌له‌مان كڕینه دبن چه‌نگێن خوه دا و پاپه‌ندی رێنما و راسپاردێن وانه و ژ به‌ر هندێ ژی نه‌شێن هه‌ڤسه‌نگیێ بێخنه نڤیسینێن خوه و ده‌ربرینه‌كا ئازادانه ژ وان نڤیسینان بكن و هه‌روه‌سا نه‌شێن ب ئاسانی چ هه‌لویستان وه‌رگرن چونكو هێشتا فێری هندێ نه‌بووینه و ده‌مه‌ك درێژ بۆ دڤێت، هه‌كه هاتوچوو هه‌لۆیسته‌ك وه‌رگرت ژی ئه‌و هه‌لویست دێ یێ شه‌رمینۆك بیت دێ مژارا وی وه‌كی یا وی نڤێژكه‌ری بیت ئه‌وێ نڤێژا بێ ده‌ستنڤێژ دكه‌ت ب تنێ دا بێژن نڤێژكه‌ره، ب هزرا من نڤیسه‌ران چ رۆلێ خوه نینه نه ل سه‌ر ئاستێ چاكسازیا جڤاكی و نه ل سه‌ر ئاستێ نه‌هێلانا گه‌نده‌لیێ، قه‌له‌مێن نڤیسه‌ران یێن هاتینه هه‌لاویستی ژبه‌ر كو سیاسیان شیان زۆربه‌یا قه‌له‌مان بخوه ڤه گرێبدن و به‌رێ قه‌له‌مان ئاراسته‌ی جهه‌كێ دی بكن و به‌رژه‌وه‌ندیێن وان بپارێزن و به‌ره‌ڤانیێ ژ وان بكه‌ن و راستییان ڤه‌شێرن و روویێ ره‌شێ ئه‌دایا حوكمه‌تێ بخه‌ملینن، به‌لێ ل ڤێ داویێ پیچ پیچه ترسا ڤه‌دره‌ڤیت و قالبێن ترسێ ل به‌ر نڤیسینێن وێره‌ك یێن دحه‌لهن و هنده‌ك قه‌له‌مان شیان وێره‌كیێ بده‌نه‌خوه مفایی ژ هه‌مه‌ۆریا حیزبان ببینن و بزاڤێ دكن به‌لێ هێشتا گه‌له‌ك رێیا مایی و پێدڤیه گه‌له‌ك قه‌له‌م ببنه قوربانی تاكو قه‌له‌مێن دیتر ب ئازادانه بشێن زێده‌گاڤیێن سیاسه‌تمه‌دار و سه‌ركردێن مه‌زن ره‌سوا و شه‌رمزاركه‌ن و ئه‌ركێ خوه‌یێ راسته‌قینه‌یی و به‌رپرسیارانه ب هێزا ئازادا بێسنۆر ل به‌رامبه‌ر جڤاك و ملله‌تێ خوه ئه‌داكه‌ت.
