دەنگدان پرۆسه‌كا ئازاد بۆ گه‌هاندنا ده‌نگه‌كێ ئازا
شڤان سالم گولى
دیاره پشتی پێكهاتنا ده‌وله‌تا ئیراقا نوی، پشتی ژناڤبرنا رژێما به‌عسی ل ئیراقێ، ئیراق ب رواله‌ت به ب وه‌لاته‌ك دیمۆكرات و فیدرالیه‌تا هه‌رێما كوردستانێ ڤه چوو، و ئه‌ڤ چه‌نده ده‌لیڤه‌كا باش بوویه بۆ مه وه‌ك كوردان بۆ هندێ كو شه‌ڕێ مان و ب ده‌ستڤه‌ئینانا ماف و ده‌ستكه‌فتان و پاراستنا وان، ئێدی ل شوینا كوسك و چه‌په‌ران ڤه‌گوهێزین بۆ هۆلا ئه‌نجوومه‌نێ نوونه‌ران ل به‌غدا، له‌وما ژی پرۆسا ده‌نگدانێ پرۆسه‌یه‌كا ئازاده بۆ گه‌هاندنا ده‌نگێ ئازا یێ گه‌لێ كورد، چووپێ نه‌ڤێت هه‌تا كو ژمارا كورسیێن كوردان ل جڤاتا نوونه‌ران زۆرتر بیت، سه‌نگ و رۆلێ كوردان د بریارا سیاسی و ئاراسته‌كرنا سیاسه‌تا ده‌وله‌تا ئیراقێ دا دیارتر و كاریگه‌رتر بوویه و دبیت، له‌وما هه‌تا مه بڤێت ئه‌و رۆل و پێگه‌یا كوردان رۆژ ب رۆژ به‌ر ب ب هێزبوونێ ڤه بچیت، جارێ پێنگاڤا هه‌ری گرنگ پشكداربوونا هه‌ره زۆرینه‌یا تاكێ كوردستانیه د ڤێ پرۆسێ دا، ئه‌ڤه ئه‌مانه‌ته‌كێ نه‌ته‌وه‌یی و نشتمانی یه لسه‌ر ملێن هه‌ر تاكه‌كێ كورد، زێده‌باری ئه‌ركێ ئایینی ژی، لێ ب مخابنی ڤه ئه‌وا ئه‌وم كورد به‌رده‌وام ژێ دنالین به‌رتوبه‌لاڤبوونا هێزێن كوردی و دویڤه‌لانكینا هنده‌ك ژ هێز و ئالیێن سیاسی بوویه د سالێن بوری دا بو خواست و ڤیانا هێزێن هه‌رێمی و ئالیێن هه‌ڤدژ دگه‌ل قه‌وارێ هه‌رێمێ و دژی گه‌شه‌كرن و وه‌رارا وێ، و ئه‌وا لڤێرێ بۆ مه كوردان ب گشتی ئێكلاكه‌ر و هێز و سه‌نگا ڤیان و په‌یوه‌ستبوونا مه ب خاك و نیشتمان و ده‌ستكه‌فتان ڤه دیار دكت، ئه‌وه كو ئه‌م ب گشتی د ڤان هه‌لبژارتنێن پێشوه‌ختدا پشكداریه‌كا كاڕا بكین و ده‌نگه‌كێ ئازا بگه‌هینێن هه‌ردو ئالیێن دویڤه‌لانك و هێز و ئالیێن سیاسی ل ئیراقێ و وێ لیستێ و وان كاندیدان بگه‌هینین ئه‌وێن كو نوونه‌راتیا وێ پارتیێ بكن یا كو ب مێژوو و كریار سه‌لماندی به‌ره‌ڤانیكه‌رێ راست و درستێ خاك و پیۆزی و سه‌روه‌ریێن گه‌لێ كوردستانێ ب هه‌موو پێكهاته‌یان ڤه بوویه و پارێزه‌رێ راسته‌قینه‌یێ ماف و ده‌ستكه‌فتانه، ژ لایه‌كێ دیڤه دا بۆ هه‌موو وه‌لاتێن جیهانێ دیار ببت كو كورد خودان ئیراده‌یه‌كا پولاینه و ب هیچ ئاوایه‌كێ هێز و ئالیێن كرێگری نوونه‌راتیا خه‌لكێ كوردستانێ ناكن، لسه‌ر ڤی بنیاتێ ئه‌ركه لسه‌ر ملێن هه‌ر تاكه‌كێ ڤی جڤاكی رۆلێ هه‌ری كاریگه‌ر ببینت لسه‌ر ئاراسته‌كرنا هاوه‌لاتیان دا بۆ هاندانێ ژ بووی پشكداربوونا د پرۆسا هه‌لبژارتنان دا و یا ژ وێ گرنگتر گه‌هاندنا ده‌نگێن ئازا و بوێر بۆ سه‌پاندنا ئیرادا گه‌لێ كورد.
